ନ୍ୟାୟ ଅପେକ୍ଷାରେ କୁସ୍ତିଯୋଦ୍ଧା ; ନବମ ଦିନରେ ଧାରଣା

ନୂଆଦିଲ୍ଲୀ : ଦିଲ୍ଲୀର ଜନ୍ତର-ମନ୍ତ୍ରର ଠାରେ କୁସ୍ତିଯୋଦ୍ଧାଙ୍କ ଧାରଣା ନବମ ଦିନରେ ପହଞ୍ଚିଛି । କୁସ୍ତିଯୋଦ୍ଧାମାନେ ନ୍ୟାୟ ଦାବିରେ ଧାରଣାରେ ବସିଛନ୍ତି । ଯେପର୍ଯ୍ୟନ୍ତ ନ୍ୟାୟ ନମିଳିଛି ସେପର୍ଯ୍ୟନ୍ତ ଧାରଣା ଜାରି ରହିବ । କୁସ୍ତିଯୋଦ୍ଧା କହିଛନ୍ତି ଯେ, କୁସ୍ତିସଂଘ ଆନ୍ଦୋଳନକୁ ଭିନ୍ନରୂପ ଦେବାକୁ ଚେଷ୍ଟା କରୁଛି । ହେଲେ ନ୍ୟାୟାଳୟ ଉପରେ ପୂର୍ଣ୍ଣ ଭରସା ରହିଛି ।

କୌଣସି ଖେଳାଳୀଙ୍କ ଉପରେ ଅପରାଧିକ ମାମଲା ନଥିବା ବେଳେ ବ୍ରିଜଭୂଷଣଙ୍କ ଭଳି ଜଣେ ଦୁର୍ଦ୍ଦାନ୍ତ ଅପରାଧୀ ଏବେ କୁସ୍ତି ମହାସଂଘର ସଂପାଦକ ଭାବେ ରହିଛନ୍ତି । ଆଇନଗତ ପ୍ରକ୍ରିୟା ଉପରେ କୁସ୍ତିଯୋଦ୍ଧାଙ୍କର କିଛି କହିବାର ନାହିଁ । ଅନେକ ରାଜ୍ୟର ଖେଳାଳିମାନେ ସମର୍ଥନ କରୁଛନ୍ତି । ଆଗକୁ ଲଢେଇ ଜାରି ରହିବ ବୋଲି କୁସ୍ତି ଯୋଦ୍ଧା କହିଛନ୍ତି । ସେପଟେ ରାଜନୈତିକ ସମର୍ଥନ ଯୋଗୁଁ ଏହି ଆନ୍ଦୋଳନ ଜୋର ଧରୁଛି ବୋଲି ବ୍ରିଜଭୂଷଣ କହିଛନ୍ତି ।