ଆଜି ସ୍ମାଇଲ୍ ଡେ’ ! କେମିତି ଆରମ୍ଭ ହୋଇଥିଲା ଏହି ଦିନ ? ଜାଣନ୍ତୁ…
ହସ, ଇଶ୍ୱରଙ୍କ ଅବଦାନ ବୋଲି କୁହାଯାଏ । ଛୋଟ ପିଲାଟିର କଅଁଳ ଓଠରେ ହସ ଟିକେ ହେଉ କି ବୟସ୍କଙ୍କ ମୁହଁରେ, ଏହା ସମସ୍ତଙ୍କୁ ଆନନ୍ଦ ଆଣିଦିଏ । ଅନେକ ଦୁଃଖକଷ୍ଟ ଜୀବନ ଯନ୍ତ୍ରଣା ଭିତରେ ଏଇ ହସ ଟିକିଏ ପାଇଁ ସମସ୍ତେ ଚାହିଁଥାନ୍ତି । ହସର ମାଧୁର୍ଯ୍ୟ ଅନେକଙ୍କ ପାଇଁ ଖୁସି ଆଣିଦେଇଥିବା ବେଳେ ନିଜ ସ୍ୱାସ୍ଥ୍ୟ ପାଇଁ ଏହା ବହୁ ଉପକାରୀ ଭାବେ ବିବେଚିତ ହୋଇଥାଏ । ଏମିତିକି ସୁସ୍ୱାସ୍ଥ୍ୟ, ସୁସ୍ଥ ମାନସିକତା ପାଇଁ ହସର ଆବଶ୍ୟକତା ଉପରେ ଚିକିତ୍ସକ ତଥା ସାଧୁସନ୍ଥମାନେ ସର୍ବଦା ପରାମର୍ଶ ଦେଇଆସିଛନ୍ତି ।
୧୯୯୯ ମସିହାରୁ ପ୍ରତିବର୍ଷ ଅକ୍ଟୋବର ପ୍ରଥମ ଶୁକ୍ରବାର ଦିନଟିକୁ “ସ୍ମାଇଲ୍ ଡ଼େ” ଭାବେ ପାଳନ କରାଯାଉଛି । ଏହି ଦିବସର ଆରମ୍ଭ କରିଥିଲେ ହାରୱେ ବଲ । ବହୁତ ଖୁସି ହେଲା ପରେ ନିଜର ଖୁସିକୁ ସ୍ମାଇଲ୍ ଚିତ୍ର ମାଧ୍ୟମରେ ସାଙ୍ଗସାଥିଙ୍କୁ ପଠେଇ ଖୁସି ବ୍ୟକ୍ତ କରାଯାଇଥାଏ । ବର୍ଷରେ ଗୋଟିଏ ଦିନକୁ ସ୍ମାଇଲ ଦିବସ ଭାବେ ସମର୍ପିତ କରିବା ପାଇଁ ଏହାର ପରିକଳ୍ପନା ହୋଇଥିଲା ।
ଜୀବନ କାଳରେ ପ୍ରତ୍ୟେକ ମଣିଷ ଖୁସିରେ ରହିବାକୁ ଚାହାଁନ୍ତି । କେହିକେହି ସବୁବେଳେ ଖୁସି ରହିବାକୁ ନିଜେ ଅଭ୍ୟାସ ମଧ୍ୟ କରିଥାନ୍ତି । ତେବେ ମାନସିକ ସ୍ତରରେ ଖୁସି ରହିବା ପାଇଁ କେହିକେହି ପୂଜାପାଠ ପୁସ୍ତକ ଅଧ୍ୟୟନ, ପର୍ଯ୍ୟଟନ, ସାଙ୍ଗସାଥିଙ୍କ ସହ ଉତ୍ତମ ସମ୍ପର୍କକୁ ଆଦରି ନେଇଥାନ୍ତି । ମାନସିକ ସ୍ତରରେ ଖୁସି ରହିଲେ ଶାରିରୀକ ସ୍ତରରେ ସୁସ୍ଥ ରହି ହେବ, ଏହା ବିଭିନ୍ନ ସ୍ତରରେ ମତ ପ୍ରକାଶ ପାଇଛି । ନିଜେ ଖୁସି ରହିବା ସହ ଅନ୍ୟମାନଙ୍କୁ ଖୁସି ରଖିବା ଦାୟୀତ୍ୱ ଆମ ସମସ୍ତଙ୍କର ।
