ଦିଲ୍ଲୀ ଏନସିଆରରେ ଲାଗୁ ହେଲା ୱାର୍କ ଫର୍ମ ହୋମ

ଦିଲ୍ଲୀ : ରାଜଧାନୀ ଦିଲ୍ଲୀ ସମେତ ଦିଲ୍ଲୀ ଏନସିଆରରେ ପ୍ରଦୂଷଣର ମାତ୍ରା ବଢ଼ିଚାଲିଥିବା ବେଳେ ଅଣନିଶ୍ୱାସୀ ହେଲାଣି ଦିଲ୍ଲୀ । ପ୍ରଦୂଷଣ କାରଣରୁ କୋର୍ଟ ପୁଣି ଦିଲ୍ଲୀ ଏନସିଆରରେ ଲକଡାଉନ୍ ଘୋଷଣା କରିବାକୁ ନିଷ୍ପତ୍ତି ନେଇଥିଲା । ରାଜଧାନୀ ଦିଲ୍ଲୀରେ କେତେକ ପ୍ରତିବନ୍ଧକ ଲଗାଯାଇଥିଲା ବର୍ତ୍ତମାନ ଦିଲ୍ଲୀ ଏନସିଆରରେ ମଧ୍ୟ କିଛି ପ୍ରତିବନ୍ଧକ ଲାଗୁ କରାଯିବ । ଦିଲ୍ଲୀ ସରକାର ୟୁପି, ପଞ୍ଜାବ, ହରିୟାଣା ସହ ଆଲୋଚନା କରି ଏନସିଆରରେ ୱାର୍କ ଫର୍ମ ହୋମର ପ୍ରସ୍ତାବ ରଖିଛି । ଏଥିସହ ସମସ୍ତ ନିର୍ମାଣ କାର୍ଯ୍ୟ ଉପରେ ପ୍ରତିବନ୍ଧକ ଲଗାଇବା ସହ ଶିଳ୍ପାନୁଷ୍ଠାନମାନ ବନ୍ଦ କରିବାକୁ ଦାବି କରିଛି ।

ଦିଲ୍ଲୀ ପର୍ଯ୍ୟାବରଣ ମନ୍ତ୍ରୀ ଗୋପାଳ ରାୟ ପଞ୍ଜାବ, ହରିୟାଣା ଏବଂ ୟୁପି ସହ ହୋଇଥିବା ଆଲୋଚନାରେ ଏନସିଆରରେ ୱାର୍କ ଫର୍ମ ହୋମ ଲାଗୁ କରିବାର ପ୍ରସ୍ତାବ ରଖିଛନ୍ତି । ଏଥିସହ ଏନସିଆରରେ ସମସ୍ତ ନିର୍ମାଣ କାର୍ଯ୍ୟ ଉପରେ ପ୍ରତିବନ୍ଧକ ଲଗାଇବା ସହ ଶିଳ୍ପାନୁଷ୍ଠାନମାନ ବନ୍ଦ ରଖିବାକୁ ନିଷ୍ପତ୍ତି ନିଆଯାଇଛି । ଏହି ବୈଠକ ସୁପ୍ରିମକୋର୍ଟର ଆଦେଶନୁସାରେ ଆୟୋଜନ କରାଯାଇଥିଲା । ଦିଲ୍ଲୀରେ ଏହି ପ୍ରଦୂଷଣର ମାତ୍ରା ହ୍ରାସ କରିବା ନିମନ୍ତେ ଅନ୍ୟ ଏନସିଆର ରାଜ୍ୟ ସହ ଆଲୋଚନା କରିବାକୁ ସୁପ୍ରିମ କୋର୍ଟ ନିର୍ଦ୍ଦେଶ ଦେଇଥିଲେ । ଏନସିଆରରେ ୱାର୍କ ଫର୍ମ ହୋମ ଲାଗୁ କରିବାକୁ ସୁପ୍ରିମ କୋର୍ଟ ମଧ୍ୟ ପ୍ରସ୍ତାବ ରଖିଥିଲା । ଏହି ବୈଠକରେ ଅନ୍ୟ ରାଜ୍ୟମାନେ ମଧ୍ୟ କେତେକ ପ୍ରସ୍ତାବ ରଖିଛନ୍ତି ବୋଲି ଗୋପାଳ ରାୟ କହିଥିଲେ । ଏବେ କେବଳ କମିଶନଙ୍କ ନିଷ୍ପତ୍ତିକୁ ଅପେକ୍ଷା ।

ଗତ ଶନିବାର ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲ ଗୋଟିଏ ସପ୍ତାହ ପାଇଁ ସ୍କୁଲ ବନ୍ଦ ରଖିବାକୁ ଘୋଷଣା କରିଥିଲେ । ଏଥିସହ ସେ ନିର୍ମାଣ କାର୍ଯ୍ୟ ଉପରେ ମଧ୍ୟ ରୋକ ଲଗାଇଥିଲେ ଏବଂ ସରକାରୀ କର୍ମଚାରୀଙ୍କୁ ୱାର୍କ ଫର୍ମ ହୋମ କରିବାକୁ ନିର୍ଦ୍ଦେଶ ଦେଇଥିଲେ । ଗୋପାଳ ରାୟ କହିଥିଲେ DPCC ଟିମ୍ ଗତ କାଲି ସମସ୍ତ ଅଞ୍ଚଳର ସ୍ଥିତି ପରଖି ପ୍ରଦୂଷଣର ମୁଖ୍ୟ କାରଣ ଖୋଜିଥିଲେ । ନିର୍ମାଣ କାର୍ଯ୍ୟ ହିଁ ପ୍ରଦୂଷଣର ମୁଖ୍ୟ କାରଣ । ଏଣୁ କନଷ୍ଟ୍ରକସନ କାମରେ ରୋକ ଲଗାଇଲେ ପ୍ରଦୂଷଣର ମାତ୍ରା ହ୍ରାସ କରାଯାଇପାରିବ ବୋଲି ସେ କହିଥିଲେ ।