କରୋନାକୁ ନେଇ କେଜ୍ରିଓ୍ୱାଲଙ୍କ ପ୍ରେସମିଟ୍, କହିଲେ କଟକଣା ମାନିଲେ ହେବନି ଲକଡାଉନ

ନୂଆଦିଲ୍ଲୀ: ସାରା ଦେଶରେ କରୋନା ସଂକ୍ରମଣ ହୁ ହୁ ହୋଇ ବଢ଼ିବାରେ ଲାଗିଛି । ଗତ ୨୪ ଘଣ୍ଟାରେ ଦେଶରେ ଦେଢ଼ ଲକ୍ଷରୁ ଅଧିକ ଆକ୍ରାନ୍ତ ଚିହ୍ନଟ ହୋଇଛନ୍ତି । ଦେଶର ସବୁଠାରୁ ଅଧିକ କରୋନା ଆକ୍ରାନ୍ତ ସଂଖ୍ୟା ରାଜଧାନୀ ଦିଲ୍ଲୀ ଓ ମୁମ୍ବାଇରୁ ଚିହ୍ନଟ ହେଉଛନ୍ତି । ଦିଲ୍ଲୀରେ ଆକ୍ରାନ୍ତ ବଢ଼ିବା ପରେ ରବିବାର ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ୱାଲ ଏକ ପ୍ରେସ କନଫରମେନ୍ସ କରିଥିଲେ । ଏହି ପ୍ରେସ୍ କନଫରମେନ୍ସରେ ସେ କହିଥିଲେ କି ଯଦି ଦିଲ୍ଲୀବାସୀ କଟକଣା ମାନିବେ, ମାସ୍କ ପିନ୍ଧିବେ ତେବେ ଦିଲ୍ଲୀରେ ଲକଡାଉନ କିମ୍ବା ସଟଡାଉନ ହେବ ନାହିଁ ।

ଅରବିନ୍ଦ କେଜ୍ରିଓ୍ୱାଲ ଆହୁରି କହିଛନ୍ତି କି ଭୟ କରିବାର କୌଣସି କାରଣ ନାହିଁ । କାରଣ ଦ୍ୱିତୀୟ ଲହର ତୁଳନାରେ ଦିଲ୍ଲୀରେ ମୃତ୍ୟୁ ହାର ଯଥେଷ୍ଟ କମ ରହିଛି  । ଆବଶ୍ୟକ ଅନୁସାରେ ବେଡ ଓ ମେଡିସିନ୍ ମହଜୁଦ ରହିଛି  । ଲୋକେ ସଚେତନ ରହିଲେ କରୋନାର ଭୟ ରହିବ ନାହିଁ ବୋଲି କହିଛନ୍ତି ଦିଲ୍ଲୀ ମୁଖ୍ୟମନ୍ତ୍ରୀ  । ଦିଲ୍ଲୀରେ ଏବେ ଦୈନିକ ସଂକ୍ରମଣ ୨୦ ହଜାର ପାର କରିଛି  । ଏହାର ମୁକାବିଲା ପାଇଁ ଦିଲ୍ଲୀ ସରକାର ତୟାର ଥିବା କହିଛନ୍ତି ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ୱାଲ । ଅନ୍ୟପକ୍ଷରେ କରୋନା ସଂକ୍ରମଣକୁ ରୋକିବା ପାଇଁ ଦିଲ୍ଲୀରେ ଜାରି ରହିଛି ସାପ୍ତାହିକ କର୍ଫ୍ୟୁ । ଶୂନଶାନ ଲାଗୁଛି ରାଜଧାନୀ ଦିଲ୍ଲୀ  । ଶୁକ୍ରବାର ରାତି ୧୦ଟାରୁ ଦିଲ୍ଲୀରେ କର୍ଫ୍ୟୁ ଲାଗୁ ହୋଇଛି ।