ଅମାନବିକାତର ସୀମା ଡେଇଁଲେ ଶାଶୂଘର ଲୋକ, ବିବାହର ୮ ମାସ ପରେ କଲେ ଏମିତି…

ଆସିକା: ନିର୍ଯାତନାର ନିର୍ଦ୍ଦୟ କାହାଣୀ । ନିଷ୍ଠୁର ହେଲେ ଶାଶୂ, ଶ୍ୱଶୁର । ମାଡ଼ ମାରିଲେ, ବୋହୂର ହାତଗୋଡ଼ ବାନ୍ଧି ଡୋଲିରେ ଫିଙ୍ଗିଦେଲେ । ରାତି ସାରା ରକ୍ତାକ୍ତ ବୋହୂ ଡୋଲି ଭିତରେ ପାଇଲା ଅସହ୍ୟ କଷ୍ଟ । ଗଞ୍ଜାମ ଜିଲ୍ଲା ବୁଗୁଡ଼ା ଥାନା ମଙ୍ଗରାଜପୁର ଡାଙ୍ଗିସାହିରେ ଏପରି ଏକ ଅଭାବନୀୟ ଘଟଣା ଦେଖିବାକୁ ମିଳିଛି । ଏଭଳି ଘଟଣା ସମସ୍ତଙ୍କୁ ସ୍ତବ୍ଧ କରି ଦେଇଥିବା ବେଳେ ଶାଶୂଘର ଲୋକଙ୍କ ଉପରେ ଉଠିଛି ଅସମାହିତ ପ୍ରଶ୍ନ ।

ନିଜ ଝିଅ ହୋଇଥିଲେ କଣ ଏମିତି କରିଥାନ୍ତେ ଶାଶୂ । ନା ଜନ୍ମକଲା ଝିଅକୁ ମାଡ଼ମାରି ହାତଗୋଡ଼ ବାନ୍ଧିବା ପରେ ଡୋଲିରେ ଏମିତି ରକ୍ତାକ୍ତ ଅବସ୍ଥାରେ ଫିଙ୍ଗି ଦେଇଥାନ୍ତେ ଶ୍ୱଶୁର । ଶାଶୂଘର ଲୋକ କେତେ ଯେ ନିର୍ଦ୍ଦୟ ହୋଇପାରନ୍ତି, ତା’ର ପ୍ରମାଣ ଦେଇଛନ୍ତି ମଙ୍ଗରାଜପୁର ଡାଙ୍ଗିସାହିର ଏହି ପରିବାର । ମାତ୍ର ଆଠ ମାସ ତଳେ ବୋହୂ କରି ଆଣିଥିଲେ ପରିବାର ଲୋକ । ବିବାହ ପରଠୁ ନବବଧୂଙ୍କୁ ଶାଶୂଘର ଲୋକେ ନିର୍ଯାତନା ଦେଇ ଆସୁଥିଲେ ।

ରବିବାର ବିଳମ୍ବିତ ରାତିରେ ଶାଶୂଘର ଲୋକ ଦେଖାଇଥିଲେ ଅସଲ ରୂପ । ବୋହୂକୁ ମାଡ଼ ମାରି ଲହୁଲୁହାଣ କରିବା ପରେ ମନ ସେତିକିରେ ବୁଝିନଥିଲା । ବୋହୂର ହାତ ଗୋଡ଼ ବାନ୍ଧି ଡୋଲିରେ ପକାଇ ଦେଇଥିଲେ ଶାଶୂଘର ଲୋକ । ରାତି ତମାମ ନବବଧୂ ଡୋଲିରେ ରକ୍ତାକ୍ତ ଅବସ୍ଥାରେ ଛଟପଟ ହୋଇଥିଲେ । ସକାଳୁ ବାପଘର ଲୋକ ଓ ଗ୍ରାମବାସୀ ଉଦ୍ଧାର କରିଥିଲେ । ଗୁରୁତର ଅବସ୍ଥାରେ ତାଙ୍କୁ ମେଡିକାଲରେ ଭର୍ତ୍ତି କରାଯାଇଛି । ଘଟଣାରେ ପୋଲିସ ଶାଶୂଘରର ୨ ଜଣଙ୍କୁ ଅଟକ ରଖି ପଚରାଉଚରା କରୁଛି ।