ଗାଁରେ ସଚେତନତା ରାଲି ବାହାର କରିବା ସହ ମଦ ବନ୍ଦ ପାଇଁ ପୋଲିସକୁ ମହିଳା ଦେଲେ ଦାବିପତ୍ର

ସୋନପୁର: ବେଆଇନ ମଦ ବିକ୍ରି ବନ୍ଦ ପାଇଁ ମହିଳାଙ୍କ ଅଭିନବ ପ୍ରତିବାଦ । ଶତାଧିକ ମହିଳା ଗାଁରେ ମଦ ବନ୍ଦ ପାଇଁ ସଚେତନତା ରାଲି କରିବା ସହ ଥାନା ଅଧିକାରୀଙ୍କୁ ଦେଲେ ଦାବିପତ୍ର । ସୁବର୍ଣ୍ଣପୁର ଜିଲ୍ଲା ଡୁଙ୍ଗୁରିପାଲି ବ୍ଲକ ରାମପୁର ଗାଁରେ ଦେଖିବାକୁ ମିଳିଛି ଏଭଳି ଦୃଶ୍ୟ ।

ଗାଁର ଏସଏଚଜି ଓ ଶତାଧିକ ମହିଳା ରାମପୁରରେ ସମ୍ପୂର୍ଣ୍ଣ ମଦ ବନ୍ଦ ଦାବି ନେଇ ସଚେତନ ରାଲି କରି ଗାଁ ପରିକ୍ରମା ପରେ ଥାନାର ଦ୍ୱାରସ୍ଥ ହୋଇଛନ୍ତି l ସମ୍ପୂର୍ଣ୍ଣ ମଦ ବନ୍ଦ ଦାବି ନେଇ ଥାନା ଅଧିକାରୀଙ୍କୁ ଲିଖିତ ଅଭିଯୋଗ କରିଛନ୍ତି l ଏହାସହ ସୋନପୁର ବିଧାୟକ ନିରଞ୍ଜନ ପୂଜାରୀ ଓ ରାମପୁର ଅତିରିକ୍ତ ତହସିଲଦାରଙ୍କୁ ମଧ୍ୟ ଏକ ଦାବିପତ୍ର ପ୍ରଦାନ କରିଛନ୍ତି l

ମହିଳାମାନେ ଅଭିଯୋଗ କରିଛନ୍ତି, ଗାଁର କିଛି ବ୍ୟକ୍ତି ଦେଶୀ ଚୋରା ମଦ ରଖି ବିକ୍ରି କରୁଛନ୍ତି l ଫଳରେ ଗାଁ ଲୋକେ ମଦ ପିଇ ଘରେ ଓ ଗାଁରେ ଅଶାନ୍ତ ବାତାବରଣ ସୃଷ୍ଟି କରୁଛନ୍ତି l