ହସଖୁସିରେ ପରିବାର ସହ ବସି ଖାଉଥିଲେ ଗୁପଚୁପ୍, ନିମିଷକେ ଚାଲିଗଲା ପ୍ରାଣ
ସୁନ୍ଦରଗଡ଼: ମୃତ୍ୟୁ କେତେବେଳେ, କେଉଁଠି, କେମିତି ଆସେ କେହି ଜାଣିପାରନ୍ତି ନାହିଁ । ବିଶ୍ୱାସ ନହେବା ଭଳି ଏମିତି ଏକ ଘଟଣା ଘଟିଛି ସୁନ୍ଦରଗଡ଼ ଜିଲ୍ଲାର ସରଫଗଡ଼ ଗାଁରେ । ଯେଉଁଠି ପରିବାର ସହ ହସଖୁସିରେ ଗୁପଚୁପ୍ ଖାଉଥିବା ଜଣେ ମହିଳାଙ୍କ ଅଚାନକ ମୃତ୍ୟୁ ହୋଇଛି । ସ୍ୱାମୀ କାମରୁ ଫେରିବା ବେଳେ ଗୁପଚୁପ୍ ଆଣି ଘରକୁ ଆସିଥିଲେ ।
ତାପରେ ସପରିବାର ବସିଥିଲେ ଗୁପଚୁପ୍ ଖାଇବାକୁ । ଫୁଲମତି ପିଲାଙ୍କୁ ଗୁପଚୁପ୍ ଖାଇବାକୁ ଦେବା ସହ ନିଜେ ଖାଉଥିଲେ । ହେଲେ ହଠାତ୍ ତଣ୍ଟିରେ ଲାଗିଗଲା ଗୁପଚୁପ୍ । ଫୁଲମତି ହୋଇଗଲେ ଶ୍ୱାସରୁଦ୍ଧ । ପରିବାର ସଙ୍ଗେ ସଙ୍ଗେ ଫୁଲମତିଙ୍କୁ ମେଡିକାଲ ନେବା ପାଇଁ ଆମ୍ବୁଲାନ୍ସ ଡାକିଥିଲେ । ମେଡିକାଲରେ ଡାକ୍ତର ଫୁଲମତି କିଷାନଙ୍କୁ ମୃତ ଘୋଷଣା କରିଛନ୍ତି ।
କରୋନା କାୟା ବିସ୍ତାର କରି ଚାଲିଥିବା ବେଳେ ଆପଣ ଯଥାସମ୍ଭବ ବାହାର ଖାଦ୍ୟରୁ ଦୂରେଇ ରୁହନ୍ତୁ । ବିଶେଷ କରି ଗୁପଚୁପ୍ ଭଳି ଫାଷ୍ଟଫୁଡକୁ ନା କୁହନ୍ତି । ଯଦି ଖାଉଛନ୍ତି ତାହେଲେ ଯଥେଷ୍ଟ ସାବଧନତା ଅବଲମ୍ବନ କରନ୍ତୁ । ଗୁପଚୁପକୁ ସିଧା ପାଟି ଭିତରକୁ ନ ଡିଆଁଇ ଚୋବାଇ କରି ଖାଆନ୍ତୁ ।
