ରାଜଧାନୀରେ ଡେଙ୍ଗୁ ଆତଙ୍କ, ଗତ ୨୪ ଘଣ୍ଟାରେ ୨୯ ଡେଙ୍ଗୁ ରୋଗୀ ଚିହ୍ନଟ

ଭୁବନେଶ୍ୱର: ରାଜଧାନୀ ଭୁବନେଶ୍ୱରରେ ବେକାବୁ ହେଉଛି ଡେଙ୍ଗୁ। ୨୪ ଘଣ୍ଟାରେ ପୁଣି ୨୯ ଜଣ ଡେଙ୍ଗୁ ରୋଗୀ ଚିହ୍ନଟ ହୋଇଛନ୍ତି। ନୂଆ ଆକ୍ରାନ୍ତଙ୍କୁ ମିଶାଇ ଭୁବନେଶ୍ୱରରେ ଆକ୍ରାନ୍ତଙ୍କ ସଂଖ୍ୟା ୪୮୨କୁ ବୃଦ୍ଧି ପାଇଛି। ବୁଧବାର ୩୨ଜଣ ଡେଙ୍ଗୁରୋଗୀ ଚିହ୍ନଟ ହୋଇଥିଲେ। ବର୍ତ୍ତମାନ ସୁଦ୍ଧା ଭୁବନେଶ୍ୱରରେ ସ୍ୱାସ୍ଥ୍ୟ ଟିମ ଦ୍ୱାରା ମୋଟ ୫ ହଜାର ୧୭୮ଟି ଘର ବୁଲି ତଥ୍ୟ ସଂଗ୍ରହ କରାଯାଇଛି। ସେହିପରି ୨୧ ହଜାର ୪୯୮ ଲୋକଙ୍କ ସ୍ୱାସ୍ଥ୍ୟଗତ ତଥ୍ୟ ସଂଗ୍ରହ କରାଯାଇଛି। ୧୩୯୦ ସ୍ଥାନରୁ ଡେଙ୍ଗୁ ମଶାର ସମ୍ଭାବ୍ୟ ବଂଶ ବୃଦ୍ଧିକୁ ରୋକାଯାଇଛି। ୫୩୩ଟି ସ୍ଥାନରେ ଏଡିସ ମଶାର ଲାର୍ଭା ଦେଖାଯାଇଛି। ଏଣୁ ସଚେତନତା ସହ ସଫେଇ ଉପରେ ଗୁରୁତ୍ୱ ଦେଇଛି ବିଏମସି।