ପାକିସ୍ତାନ ଫେରିଯିବେ କି ସୀମା ହାଇଦର ମିଳିଗଲା ଜବାବ…
1 min read
ନନ୍ଦିଘୋଷ ବ୍ୟୁରୋ: ପାକିସ୍ତାନ ଫେରିବେ କି ସୀମା ହାଇଦର ? ନିଜ ପିଲା ଏବଂ ସ୍ବାମୀଙ୍କୁ ଛାଡି କେବେ ଫେରିବେ ସୀମା ? ଏମିତି ସମସ୍ତଙ୍କ ମନରେ ସୀମାଙ୍କୁ ନେଇ ଅନେକ ପ୍ରଶ୍ନ । ଜମ୍ମୁ-କାଶ୍ମୀରର ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣ ପରେ ଭାରତ ସରକାର ପାକିସ୍ତାନୀ ନାଗରିକମାନଙ୍କୁ ଦେଶ ଛାଡିବାକୁ ନିର୍ଦ୍ଦେଶ ଦେଇଛନ୍ତି। ଯାହାକୁ ନେଇ ଲୋକମାନେ ଲୋକମାନେ ପାକିସ୍ତାନରୁ ଅବୈଧ ଭାବରେ ଭାରତ ଆସିଥିବା ସୀମା ହାଇଦରଙ୍କ ବିଷୟରେ ପ୍ରଶ୍ନ ଉଠାଇଛନ୍ତି। ସେ କେବେ ଫେରିବେ ପାକିସ୍ତାନ । ତେବେ ନୋଏଡା ପୋଲିସ ସୀମା ହାଇଦରଙ୍କ ପାକିସ୍ତାନ ଫେରିବା ଉପରେ କହିଛି ଯେ କେନ୍ଦ୍ର ସରକାରଙ୍କ ଠାରୁ ମିଳିଥିବା ନିର୍ଦ୍ଦେଶ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
ସୀମା ହାଇଦରଙ୍କ ଓକିଲ ଏପି ସିଂହ କହିଛନ୍ତି ଯେ ସୀମାଙ୍କୁ ଏହି ମାମଲାରେ କେନ୍ଦ୍ର ସରକାର ଏବଂ ୟୁପି ପୋଲିସ ପକ୍ଷରୁ କୌଣସି ନୋଟିସ୍ ମିଳିନାହିଁ। କୋର୍ଟଙ୍କ ନିର୍ଦ୍ଦେଶରେ ସୀମା ଏବେ ବି ରାବୁପୁରା ଗାଁରେ ରହୁଛନ୍ତି। ସୀମା ହାଇଦରଙ୍କ ମାମଲା ୟୁପି ଏଟିଏସ୍ ଦ୍ୱାରା ତଦନ୍ତ କରାଯାଇଥିଲା, ଯେଉଁଥିରେ ସେମାନେ କିଛି ପାଇ ନଥିଲେ। ଏହି ମାମଲାରେ, ଏବେ ନୋଏଡା ପୋଲିସ ମଧ୍ୟ କହିଛି ଯେ ସେମାନେ ସୀମା ସମ୍ପର୍କରେ କୌଣସି ନିର୍ଦ୍ଦେଶ ପାଇନାହାଁନ୍ତି। ଏହି ମାମଲା କୋର୍ଟରେ ଅଛି। ଯାହା ନିର୍ଦ୍ଦେଶ ମିଳିବ, ତା’ ଉପରେ କାର୍ଯ୍ୟାନୁଷ୍ଠାନ ନିଆଯିବ।
ପ୍ରଧାନମନ୍ତ୍ରୀ-ମୁଖ୍ୟମନ୍ତ୍ରୀଙ୍କ ନିକଟରେ ଆବେଦନ
୨୨ ଏପ୍ରିଲରେ ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣରେ ୨୬ ଜଣ ନିର୍ଦ୍ଦୋଷ ଲୋକଙ୍କ ମୃତ୍ୟୁ ହୋଇଥିଲା। ଏହି ଆକ୍ରମଣ ପାକିସ୍ତାନୀ ଆତଙ୍କବାଦୀମାନେ କରିଥିଲେ, ଯାହା ପରେ ଭାରତ ସରକାର ପାକିସ୍ତାନ ପ୍ରତି କଠୋର ଆଭିମୁଖ୍ୟ ଗ୍ରହଣ କରିଥିଲେ ଏବଂ ସାର୍କ ଭିସା ଛାଡ଼ ନୀତି ଅନୁଯାୟୀ ଏହାର ନାଗରିକମାନଙ୍କୁ ଦିଆଯାଉଥିବା ସୁବିଧାକୁ ବନ୍ଦ କରିଦେଇଥିଲେ। ଭାରତ ସରକାରଙ୍କ ଦ୍ୱାରା ପାକିସ୍ତାନୀ ନାଗରିକମାନଙ୍କୁ ଦେଶ ଛାଡିବା ପାଇଁ ଏକ ନିର୍ଦ୍ଦେଶ ଜାରି କରାଯାଇଥିଲା। ଏହି ସମୟରେ, ଲୋକମାନେ ସୀମା ହାଇଦରଙ୍କ ଉପରେ ମଧ୍ୟ ନଜର ରଖିଛନ୍ତି। ଏଠାରେ ସୀମା ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ନିବେଦନ କରିଛନ୍ତି ଯେ ସେ ଏବେ ଭାରତର ବୋହୂ ଏବଂ ତାଙ୍କୁ ଏଠାରେ ରହିବାକୁ ଅନୁମତି ଦିଆଯାଉ।
ସୀମା ଅବୈଧ ଭାବରେ ଭାରତକୁ ଆସିଥିଲେ
ପାକିସ୍ତାନର ବାସିନ୍ଦା ସୀମା ହାଇଦର ୟୁପି ନୋଏଡାର ବାସିନ୍ଦା ସଚିନ ମୀନାଙ୍କୁ ବିବାହ କରିଛନ୍ତି। PUBG ଖେଳୁଥିବା ସମୟରେ ଉଭୟଙ୍କ ପରିଚୟ ହୋଇଥିଲା। ସୀମା ବିବାହିତ ଏବଂ ତାଙ୍କର ଚାରୋଟି ସନ୍ତାନ ଅଛନ୍ତି। ସେ ତାଙ୍କ ପିଲାମାନଙ୍କ ସହିତ ପାକିସ୍ତାନରୁ ନେପାଳରେ ପହଞ୍ଚିଥିଲେ ଏବଂ ଏଠାରୁ ସେ ମେ ୨୦୨୩ରେ ବେଆଇନ ଭାବରେ ଭାରତରେ ପ୍ରବେଶ କରିଥିଲେ। ସେ ତାଙ୍କର ସମସ୍ତ ଚାରି ପିଲାଙ୍କୁ ସାଙ୍ଗରେ ନେଇ ଆସିଥିଲେ। ସେ ଏଠାକୁ ଆସି ହିନ୍ଦୁ ରୀତିନୀତି ଅନୁସାରେ ସଚିନଙ୍କୁ ବିବାହ କରିଥିଲେ। ନିକଟରେ ଉଭୟଙ୍କର ଏକ ସନ୍ତାନ ମଧ୍ୟ ହୋଇଛି ।
