ଗୁପକାର ମେଣ୍ଟର ମହାରଣନୀତି: ଉଠିବ ଧାରା ୩୭୦ ପ୍ରସଙ୍ଗ, ଜାମ୍ମୁ-କାଶ୍ମୀର ବିକାଶ ପାଇଁ ହେବ ଆଲୋଚନା

ନୂଆଦିଲ୍ଲୀ: ଦିଲ୍ଲୀରେ ସ୍ବର ଶାଣିତ କରିବେ ଜାମ୍ମୁ-କାଶ୍ମୀର ନେତା । ୨୪ ତାରିଖରେ ପ୍ରଧାନମନ୍ତ୍ରୀ ଡାକିଥିବା ବୈଠକରେ ଉଠିବ ଅନେକ ପ୍ରସଙ୍ଗ । ଆଜି ଫାରୁକ ଅବଦୁଲ୍ଲାଙ୍କ ଘରେ ବସିଥିବା ଗୁପକାର ମେଣ୍ଟର ବୈଠକରେ ପ୍ରସ୍ତୁତ ହୋଇଛି ବ୍ଲୁ ପ୍ରିଣ୍ଟ । ଧାରା ୩୭୦ ମୁଖ୍ୟ ପ୍ରସଙ୍ଗ ହେବ ବୋଲି କହିଛନ୍ତି ନ୍ୟାସନାଲ କନଫରେନ୍ସ ମୁଖ୍ୟ ଫାରୁକ ଅବଦୁଲ୍ଲା । ପିଏମଙ୍କ ବୈଠକରେ ଜାମ୍ମୁ-କାଶ୍ମୀରେ ବିଧାନସଭା ନିର୍ବାଚନ ନେଇ ଆଲୋଚନା ହେବ ।

ଗୁପକାର ମେଣ୍ଟର ମେଗାପ୍ଲାନ୍ । ଏକାଠି ହେଲେ ସବୁ ନେତା । ପିଏମଙ୍କ ବୈଠକରେ ଉଠିବ ଜାମ୍ମୁ-କାଶ୍ମୀର ପ୍ରସଙ୍ଗ । ମଙ୍ଗ ସମ୍ଭାଳିବେ ଫାରୁକ ଅବଦୁଲ୍ଲା । ଦିଲ୍ଲୀ ଦରବାରରେ ପୁଣି ଥରେ ନିଜର ଦାବି ରଖିବେ ଜାମ୍ମ-କାଶ୍ମୀର ନେତା । ଆସନ୍ତା ୨୪ ତାରିଖରେ ପ୍ରଧାନମନ୍ତ୍ରୀ ଡାକିଥିବା ବୈଠକରେ ସାମିଲ ହେବେ ଗୁପକାର ମେଣ୍ଟର ସମସ୍ତ ନେତା । ଏ ନେଇ ଆଜି ନ୍ୟାସନାଲ କନଫରେନ୍ସ ମୁଖ୍ୟ ଫାରୁକ ଅବଦୁଲ୍ଲାଙ୍କ ଘରେ ବସିଥିଲା ଗୁପକାର ମେଣ୍ଟର ଗୁରୁତ୍ବପୂର୍ଣ୍ଣ ବୈଠକ । ପିଏମ ଡାକିଥିବା ବୈଠକରେ ସମସ୍ତ ନେତା ସାମିଲ ହେବେ । ପୂର୍ବ ଦାବି ସରକାରଙ୍କ ପାଖରେ ଦୋହରା ଯିବବୋଲି କହିଛନ୍ତି ଫାରୁକ ଅବଦୁଲ୍ଲା ।

ଦିଲ୍ଲୀରେ ଉଠିବ ପୁରୁଣା ଦାବି । ତେବେ କି ଦାବି ରଖିବେ ଗୁପକାର ନେତା ? ସେ ନେଇ ଆରମ୍ଭ ହୋଇଛି କଳ୍ପନାଜଳ୍ପନା । କୁହାଯାଉଛି, ଧାରା ୩୭୦ ଓ ୩୫-ଏ ହେବ ମୁଖ୍ୟ ପ୍ରସଙ୍ଗ । ଏଥି ସହ ଯେଉଁ ଲୋକଙ୍କୁ ଜେଲରୁ ରଖାଯାଇଛି ସେମାନଙ୍କୁ ବାହାର କରିବାକୁ ଦାବି ଉଠାଯିବ । ବାହାର ଜିଲ୍ଲାରେ ଥିବା ଲୋକଙ୍କୁ ଜାମ୍ମୁ-କାଶ୍ମୀର ଫେରାଇ ଆଣିବା । ଟୁରିଜିମ୍ ଓ ଟ୍ରାନ୍ସପୋର୍ଟ ଉପରେ ଧ୍ୟାନ ଦେବା ପ୍ରସଙ୍ଗ ଉଠାଇବେ ନେତା । ତେବେ ଧାରା ୩୭୦କୁ ନେଇ ଆଭିମୁଖ୍ୟ ସ୍ପଷ୍ଟ ଥିବା କହିଛନ୍ତି ପୂର୍ବତନ ମୁଖ୍ୟମନ୍ତ୍ରୀ ମେହେବୁବା ମୁଫତୀ ।

ଆସନ୍ତା ୨୪ ତାରିଖରେ ପ୍ରଧାନମନ୍ତ୍ରୀ ଡାକିଥିବା ବୈଠକରେ ଜାମ୍ମୁ-କାଶ୍ମୀରର ଆଠ ରାଜନୈତିକ ଦଳର ୧୪ ଜଣ ନେତାଙ୍କୁ ନିମନ୍ତ୍ରଣ କରାଯାଇଛି । ବୈଠକରେ ବିଧାନସଭା ନିର୍ବାଚନ ନେଇ ଆଲୋଚନା ହେବାର ସମ୍ଭାବନା ରହିଛି ।