ନନ୍ଦିଘୋଷ ବ୍ୟୁରୋ : ଆଜିଠୁ ବସୁଛି ସଂସଦର ସ୍ଵତନ୍ତ୍ର ଅଧିବେଶନ। ୩ ଦିନ ଧରି ଏହି ଅଧିବେଶନ ଚାଲିବ। ମହିଳା ସଂରକ୍ଷଣ ବିଲ୍ ଉପରେ ଆଲୋଚନା ହୋଇ ଏହାକୁ ପାସ୍ କରାଇବାକୁ କେନ୍ଦ୍ର ସରକାର ଲକ୍ଷ୍ୟ ରଖିଛନ୍ତି। ସରକାର ଆଗତ କରିବେ ୩ଟି ପୃଥକ ବିଲ। ମହିଳା ସ୍ଥାନ ସଂରକ୍ଷଣ ନେଇ ସଂସଦର ଉଭୟ ଗୃହରେ କେନ୍ଦ୍ର ସରକାର ଆଗତ କରିବେ ନାରୀଶକ୍ତି ବନ୍ଦନ ଅଧିନିୟମ ସଂଶୋଧନ ବିଲ ୨୦୨୬। ସୀମାପୁନଃନିର୍ଦ୍ଧାରଣ ବିଲ ୨୦୨୬ ଏବଂ କେନ୍ଦ୍ରଶାସିତ ଅଞ୍ଚଳ ନିୟମ (ସଂଶୋଧନ) ବିଲ ୨୦୨୬। ଏହି ତିନୋଟି ଯାକ ବିଲ ମହିଳା ସଂରକ୍ଷଣ ଲାଗୁ କରିବା ପାଇଁ ଉଦ୍ଦିଷ୍ଟ ।
ଲୋକସଭା ଆସନ ସୀମା ପୁନଃନିର୍ଦ୍ଧାରଣ ପାଇଁ ଏକ ଏକ କମିଶନ ଗଠନ କରାଯିବ। ସେହି କମିଶନର ସୁପାରିଶ ଅନୁସାରେ ଲୋକସଭା ଆସନର ସୀମା ପୁନଃନିର୍ଦ୍ଧାରଣ ହେବ। ତେବେ ବାକି ଦୁଇଟି ବିଲ୍ – ପାଇଁ ଦରକାର ସଂଖ୍ୟା। ମହିଳାଙ୍କୁ ୩୩ ପ୍ରତିଶତ ସଂରକ୍ଷଣ ଦେବା ପାଇଁ ନାରୀ ବନ୍ଦନ ଅଧିନିୟମ ଓ କେନ୍ଦ୍ରଶାସିତ ଅଞ୍ଚଳ ନିୟମ (ସଂଶୋଧନ) ବିଲ ୨୦୨୬ ପାଇଁ ସମ୍ଵିଧାନର ସଂଶୋଧନ ଆବଶ୍ୟକ। ଏଥିପାଇଁ ସ୍ଵତନ୍ତ୍ର ବହୁମତ ଦରକାର। ଅର୍ଥାତ ଉଭୟ ଗୃହରେ ପୂର୍ଣ୍ଣ କ୍ଷମତାର ଦୁଇ ତୃତୀୟାଂଶ ସଭ୍ୟ ଉପସ୍ଥିତ ରହିବେ ଓ ତା ପର ବହୁମତରେ ବିଲ୍ ପାସ୍ ହେବା ଦରକାର। ଯଦି କିଏ କକ୍ଷତ୍ୟାଗ କରେ କିମ୍ଵା ଅନୁପସ୍ଥିତ ରହେ, ତେବେ ମ୍ୟାଜିକ ନମ୍ଵର କମିଯିବ। ସଂଖ୍ୟା ଦୃଷ୍ଟିରୁ ସରକାର ଏହି ଦୁଇଟି ବିଲ୍ ପାସ୍ କରାଇବା କଷ୍ଟ ହୋଇପାରେ।
କାରଣ ଏନଡିଏର ନିଜସ୍ଵ ସଂଖ୍ୟା ନାହିଁ। ଲୋକସଭାର ମୋଟ ୫୩୭ ଜଣ ସଭ୍ୟ ଥିବା ବେଳେ ଏହାର ଦୁଇ ତୃତୀୟାଂଶ ହେଉଛି ୩୬୦। ଏନଡିଏ ସଂଖ୍ୟା ହେଉଛି ୨୯୩। ଏହାକୁ ଆହୁରି ଦରକାର ୬୭ ଜଣଙ୍କ ସମର୍ଥନ। ସେହିପରି ରାଜ୍ୟସଭାର ମ୍ୟାଜିକ ନମ୍ଵର ହେଉଛି ୧୬୩। ଏନଡିଏ ଓ ସହଯୋଗୀ ସଭ୍ୟଙ୍କ ସଂଖ୍ୟା ୧୪୨ ହେଉଥିବା ବେଳେ ବିଲ୍ ପାସ୍ ପାଇଁ ଆହୁରି ଦରକାର ୨୧ ଜଣଙ୍କ ସମର୍ଥନ। ଯଦିଓ ବିରୋଧୀ ମହିଳା ସଂରକ୍ଷଣ ବିଲକୁ ସମର୍ଥନ କରୁଛନ୍ତି, ତେବେ ଲୋକସଭା ସୀମା ପୁନଃନିର୍ଦ୍ଧାରଣ ବିଲକୁ ସେମାନେ ବିରୋଧ କରୁଛନ୍ତି। ତେଣୁ ସରକାରଙ୍କୁ କଷ୍ଟ ହୋଇପାରେ ବିଲ ପାସ୍ କରାଇବା।
