ଚିକେନ ଭଲ ହୋଇନି କହିବା ପଡ଼ିଲା ମହଙ୍ଗା, ପତିଙ୍କୁ ପିଟିପିଟି ମାରଦେଲେ ପତ୍ନୀ

ପାଟନା: ବିହାରର ପଶ୍ଚିମ ଚମ୍ପାରନ୍ ଜିଲ୍ଲାରେ ଜଣେ ପତ୍ନୀ ନିଜ ସ୍ୱାମୀଙ୍କୁ ପିଟିପିଟି ହତ୍ୟା କରିଛନ୍ତି। ସ୍ୱାମୀଙ୍କ ଦୋଷ ହେଉଛି ଯେ ତାଙ୍କ ପତ୍ନୀ ଖାଇବାକୁ ଦେଇଥିବା ଚିକେନ୍‌ରେ ଅଧିକ ଲୁଣ ରହିଥିଲା। ଯେତେବେଳେ ସ୍ୱାମୀ ପତ୍ନୀଙ୍କୁ ଏ କଥା କହିଥିଲେ ସେ ରାଗି ଯାଇଥିଲେ। ସେହି ସମୟରେ ମହିଳାଙ୍କ ଭଉଣୀ ମଧ୍ୟ ସେମାନଙ୍କ ଘରେ ଥିଲେ। ମହିଳା ଜଣକ ତା’ପରେ ଭଉଣୀ ସହିତ ସ୍ୱାମୀଙ୍କୁ ଏତେ ମାଡ ମାରିଥିଲେ ଯେ ତାଙ୍କ ଜୀବନ ଚାଲିଯାଇଥିଲା । ହତ୍ୟା ଅଭିଯୋଗରେ ପୋଲିସ ଉଭୟ ଭଉଣୀଙ୍କୁ ଗିରଫ କରିଛି।

ମୃତକଙ୍କ ନାମ ଶମଶେର ଆଲାମ ଛଦ୍ମନାମ ଲାଲୁ ବୋଲି ଜଣାପଡିଛି। ତାଙ୍କ ପତ୍ନୀ ଶେହନାଜ ବେଗମ୍ ଏବଂ ନାବାଳିକା ଭଉଣୀଙ୍କୁ ପୋଲିସ ଗିରଫ କରିଛି। ଶମଶେର ଏବଂ ଶେହନାଜଙ୍କର ତିନୋଟି ସନ୍ତାନ ଅଛନ୍ତି। ଅଭିଯୋଗ ହୋଇଛି ଯେ ଚିକେନ୍‌ରେ ଅତ୍ୟଧିକ ଲୁଣ ଥିଲା, ଯାହା ବିଷୟରେ ଶମଶେର ଆଲାମ ପରିବାର ନିକଟରେ ଅଭିଯୋଗ କରିଥିଲେ। ଏହା ପରେ ସ୍ୱାମୀ-ସ୍ତ୍ରୀଙ୍କ ମଧ୍ୟରେ ଝଗଡା ଆରମ୍ଭ ହୋଇଥିଲା।

ଦୁହିଁଙ୍କ ମଧ୍ୟରେ ଝଗଡା ଏତେ ଉଗ୍ର ରୂପ ନେଇଥିଲା ଯେ ଶେହନାଜ ବେଗମ୍ ଏକ ଲୁହା ରଡ ଏବଂ ବାଡି ଆଣି ଶମଶେରଙ୍କୁ ପିଟିବା ଆରମ୍ଭ କରିଥିଲେ । ନିଜ ଜୀବନ ରକ୍ଷା କରିବାକୁ ଶମଶେର ଉଭୟ ମହିଳାଙ୍କ ସାମ୍ନାରେ ଭିକ ମାଗିଥିଲେ। କିନ୍ତୁ ଉଭୟ ଭଉଣୀ ମାଡ ମାରିବା ପରେ ଏତେ ରକ୍ତସ୍ରାବ ହୋଇଥିଲା ଯେ ତାହା ଅଟକାଇବା ସମ୍ଭବ ହୋଇ ପାରିନଥିଲା।

ଉଭୟଙ୍କ ତିନି ପିଲା ମଧ୍ୟ ଏଥିରେ ହସ୍ତକ୍ଷେପ କରିବାକୁ ଚେଷ୍ଟା କରିଥିଲେ। କିନ୍ତୁ ମହିଳାମାନେ ତାଙ୍କୁ ଅନ୍ୟ ଏକ କୋଠରୀରେ ତାଲା ପକାଇ ଦେଇଥିଲେ। ତା’ପରେ ସେ ଶମଶେରଙ୍କୁ ପିଟିବାକୁ ଲାଗିଲେ।

ଚିତ୍କାର ଶୁଣି ପଡୋଶୀ ମଧ୍ୟ ତାଙ୍କ ଘରେ ପହଞ୍ଚିଥିଲେ। ଭିତରର ଦୃଶ୍ୟ ଦେଖି ସମସ୍ତେ ଆଶ୍ଚର୍ଯ୍ୟ ହୋଇଯାଇଥିଲେ ।

ରକ୍ତ ଜୁଡୁବୁଡୁ ଅବସ୍ଥାରେ ଶମଶେରଙ୍କୁ ଉଦ୍ଧାର କରି ପୋଲିସକୁ ସୂଚନା ଦେଇଥିଲେ ପଡୋଶୀ। ସେତେବେଳକୁ ଶମଶେରଙ୍କ ମୃତ୍ୟୁ ହୋଇଯାଇଥିଲା।