କେଉଁଠି ଅଛନ୍ତି ଇମ୍ରାନ ଖାନଙ୍କ ପତ୍ନୀ ବୁଶରା ବିବି, ମିଳୁନି ସୁରାଗ ..

ନନ୍ଦିଘୋଷ ବ୍ୟୁରୋ: କେଉଁଠି ଅଛନ୍ତି ଇମ୍ରାନ ଖାନଙ୍କ ପତ୍ନୀ ବୁଶରା ବିବି । ନିଖୋଜ ବୁଶରା ବିବିଙ୍କୁ ଖୋଜିବାକୁ ଚାରିଆଡେ ଘୁରିବୁଲୁଛି ପାକିସ୍ତାନ ପୋଲିସ । ୧୯କୋଟି ପାଉଣ୍ଡ ଦୁର୍ନୀତି ମାମଲାରେ ଫସିଥିବା ବୁଶରା ବିବି କୋର୍ଟରେ ହାଜର ହେଉନଥିବାରୁ ତାଙ୍କୁ ଖୋଜା ଚାଲିଛି । ଲଗାତାର ୮ଟି ଶୁଣାଣୀ ସମୟରେ ବୁଶରା କୋର୍ଟରେ ଅନୁପସ୍ଥିତି ଥିବାରୁ ତାଙ୍କ ନାଁରେ କୋର୍ଟ ଓ୍ବାରେଣ୍ଟ ଜାରୀ କରିଛନ୍ତି ।

ଜଷ୍ଟିସ ନାସିର ଜାଭେଦ୍ ରାଣା କୋର୍ଟରେ ହାଜର ନହେବା ପାଇଁ ତାଙ୍କ ଆବେଦନକୁ ପ୍ରତ୍ୟାଖ୍ୟାନ କରିଛନ୍ତି। ସେବେଠାରୁ ବୁଶରାଙ୍କୁ ଗିରଫ କରିବା ପାଇଁ ଖୋଳତାଡ ଆରମ୍ଭ କରାଯାଇଛି । ବୁଶରା ବିବି ବର୍ତ୍ତମାନ ଖେଓ୍ବର ପଙ୍ଖତୁନଖୱା ପ୍ରଦେଶର ରାଜଧାନୀ ପେଶୱାରରେ ରହୁଛନ୍ତି । ଖେଓ୍ବର ପଙ୍ଖତୁନଖୱା ଠାରେ ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ଦଳ ପାକିସ୍ତାନ ତେହେରିକ-ଇ-ଇନସାଫ କ୍ଷମତାରେ ଅଛି।

ବୁଶରାଙ୍କୁ ଗିରଫ କରିବାକୁ ଯାଇଥିଲେ ଟିମ୍

ମିଡିଆ ରିପୋର୍ଟ ଅନୁଯାୟୀ ଯେ ଟିମ୍ ବୁଶରା ବିବିଙ୍କୁ ଗିରଫ କରିବା ପାଇଁ ନଭେମ୍ବର ୨୩ରେ ପେଶୱାର ଯାଇଥିଲେ । ଯେତେବେଳେ ଅଧିକାରୀମାନେ ବୁଶରା ବିବିଙ୍କ ଘରେ ଗିରଫ ୱାରେଣ୍ଟ ଦେଖାଇଥିଲେ, ସେତେବେଳେ ସେ ଘରେ ଉପସ୍ଥିତ ନଥିଲେ । ଏହି କାରଣ ପାଇଁ ଟିମକୁ ଖାଲି ହାତରେ ଫେରିବାକୁ ପଡିଥିଲା ।

ବୁଶରା ବିବିଙ୍କ ବିରୋଧରେ ଅଭିଯୋଗ

ଉଭୟ ଇମ୍ରାନ ଖାନ ଏବଂ ବୁଶରା ବିବିଙ୍କ ଉପରେ ୧୯କୋଟି ପାଉଣ୍ଡର ଅପବ୍ୟବହାର କରିଥିବା ଅଭିଯୋଗ ହୋଇଛି, ଯାହା ବ୍ରିଟେନର ନ୍ୟାସନାଲ କ୍ରାଇମ ଏଜେନ୍ସି ଦ୍ୱାରା ସମ୍ପତ୍ତି ବ୍ୟବସାୟୀଙ୍କ ସହ ହୋଇଥିବା ଚୁକ୍ତି ଅନୁଯାୟୀ ପାକିସ୍ତାନକୁ ଫେରସ୍ତ କରାଯାଇଥିଲା। ଏହି ଅର୍ଥ ପାକିସ୍ତାନର ଜାତୀୟ ରାଜକୋଷ ପାଇଁ ଉଦ୍ଦିଷ୍ଟ ଥିଲା, କିନ୍ତୁ ଏହା ବିଶ୍ୱବିଦ୍ୟାଳୟ ଏବଂ ବ୍ୟକ୍ତିଗତ ଲାଭ ପାଇଁ ବ୍ୟବହୃତ ହୋଇଥିଲା । ବୁଶରା ବିବି ଅଲ-କାଦିର ଟ୍ରଷ୍ଟର ଟ୍ରଷ୍ଟି ଭାବରେ ଏହି ଚୁକ୍ତିରୁ ଲାଭବାନ ହୋଇଥିବା ଅଭିଯୋଗ ହୋଇଛି। ବୁଶରା ମଧ୍ୟ ଝେଲମର ଅଲ-କାଦିର ବିଶ୍ୱବିଦ୍ୟାଳୟ ପାଇଁ ୪୫୮ କେନାଲ ଜମି ଅଧିଗ୍ରହଣ କରିଥିବା ଅଭିଯୋଗ ହୋଇଛି।