ଜଗନ୍ନାଥଙ୍କୁ କଣ ପାଇଁ ଲାଗି କରାଯାଏ ଫୁଲୁରୀ ତେଲ ? ଜାଣନ୍ତୁ…

ପୁରୀ: କୋଭିଡ୍ କଟକଣାରେ ଚାଲିଛି ରଥ ନିର୍ମାଣ । ପାଖେଇ ଆସୁଛି ଘୋଷଯାତ୍ରା । ଅଣବସରରେ ଠାକୁର । ଜଗାକୁ ଜ୍ୱର ହୋଇଥିବା ବେଳେ ସେବାରେ ନିୟୋଜିତ ସେବାୟତଙ୍କ ସ୍ୱାସ୍ଥ୍ୟ ଉପରେ ଗୁରୁତ୍ୱ ଦେଇଛି ଶ୍ରୀମନ୍ଦିର ପ୍ରଶାସନ । ସ୍ନାନ ପୂର୍ଣ୍ଣିମାରେ ୧୦୮ କଳସ ଜଳରେ ସ୍ନାନ ପରେ ଜରରେ କମ୍ପୁଛି ଶ୍ରୀଅଙ୍ଗ । ସେଥିରୁ ଉପଶମ ପାଇଁ ଫୁଲୁରୀ ତେଲ ଲାଗି କରାଯିବ ।

ଏହି ଦିବ୍ୟ ତେଲର ପ୍ରସ୍ତୁତି ମଧ୍ୟ ନିଆରା । ବିଶେଷ ଭାବେ ପ୍ରସ୍ତୁତି ହେଉଥିବା ଏହି ତେଲ ସ୍ନାନପୂର୍ଣ୍ଣିମାର ପୂର୍ବବର୍ଷଠାରୁ ପ୍ରସ୍ତୁତ କରାଯାଇଥାଏ । ଏହି ତେଲର ମୁଖ୍ୟ ଉପାଦାନ ହେଉଛି- ଘଣାପେଡ଼ା ରାଶି ତେଲ, ମଲ୍ଲୀ, ମାଳତୀ, କିଆ, କେତକୀ, ଜାଇ, ଯୁଇ, ଚନ୍ଦନ ଏବଂ ଯବଧାନ । ଋତୁ ଅନୁସାରେ ଉପଲବ୍ଧ ହେଉଥିବା ବିଭିନ୍ନ ସୁବାସିତ ଫୁଲକୁ ନେଇ ପ୍ରାୟ ୨୪ ପ୍ରକାର ଉପାଦାନରେ ଏହା ପ୍ରସ୍ତୁତ ହୋଇଥାଏ ।

ପୂର୍ବବର୍ଷ ହେରାପଞ୍ଚମୀ ଦିନ ଗୋଟିଏ ବିଶେଷ ମାଟିପାତ୍ରରେ ଏହି ସବୁ ଉପାଦାନକୁ ନିବୁଜ କରି ମାଟି ତଳେ ରଖାଯାଇଥାଏ । ସ୍ନାନଯାତ୍ରାର ଗୋଟିଏ ଦିନ ପୂର୍ବରୁ ଏହାକୁ ମାଟିତଳୁ ବାହାର କରାଯାଇଥାଏ । ଅଣବସର ପଞ୍ଚମ ଦିନରେ ଏହି ଦିବ୍ୟ ତେଲ ବଡ଼ ଓଡ଼ିଆ ମଠରୁ ଶ୍ରୀମନ୍ଦିରକୁ ନିଆଯାଇଥାଏ । ଏହା ପରେ ପତି ମହାପାତ୍ରଙ୍କ ଦ୍ୱାରା ସଂସ୍କାର କରାଯାଇଥାଏ । ଏହା ପରେ ସେବକମାନେ ମହାପ୍ରଭୁଙ୍କ ଶରୀରରେ ଏହାକୁ ପ୍ରଲେପ କରିଥାଆନ୍ତି ।

ଅନ୍ୟପଟେ ସେବାୟତଙ୍କ ରୋଗ ପ୍ରତିଷେଧକ ଶକ୍ତି ବୃଦ୍ଧି ଉପରେ ଗୁରୁତ୍ୱ ଦିଆଯାଇଛି । ଆର୍ସେନିକ ଏଏଲବି ୩୦ ହୋମିଓପାଥିକ ଔଷଧ ପ୍ରଶାସନ ପକ୍ଷରୁ ବିଭିନ୍ନ ନିଯୋଗକୁ ପ୍ରଦାନ କରାଯାଇଛି ।ରଥଖଳାରେ ଚାଲିଛି ତିନି ରଥର ନିର୍ମାଣ କାର୍ଯ୍ୟ । ତିନି ରଥର ଭୂଇଁ ନିର୍ମାଣ ଶେଷ କରାଯାଇ କଇଁଚି, ବଡ଼ ପୋଟଳ ପକାଯାଇଛି । ଏହାପରେ ପୋଟଳ, ପାରାଭାଡ଼ି, ଦୁଆର ଘୋଡ଼ା, ପ୍ରଭା, ବେଦୀ ସିଂହାସନ ନିର୍ମାଣ କାର୍ଯ୍ୟ ଜାରି ରହିଛି । ତିନି ରଥର ଚିତ୍ରକାର ସେବକମାନେ ରଥରେ ରଙ୍ଗ ଦେବା କାର୍ଯ୍ୟ ଜାରି ରଖିଥିବା ବେଳେ ରଥ ନିର୍ମାଣର ପ୍ରାୟ ୭୦ ପ୍ରତିଶତ କାର୍ଯ୍ୟ ଶେଷ ହୋଇଛି ।