ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଜନ୍ମଦିନକୁ ଜାତୀୟ ବେରୋଜଗାର ଦିବସ ରୂପେ ପାଳିଲେ ବିରୋଧୀ

ଭୁବନେଶ୍ୱର,୧୭ ।୯(ବ୍ୟୁରୋ)-  ସେପ୍ଟେମ୍ବର ୧୭ ତାରିଖ । ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ୭୦ ତମ ଜନ୍ମଦିନ । ପ୍ରଧାନମନ୍ତ୍ରୀଙ୍କ ଏହି ଜନ୍ମଦିନକୁ ଭାଜପା ପକ୍ଷରୁ ବିଭିନ୍ନ ଢଙ୍ଗରେ ପାଳନ କରାଯାଉଛି । ଏହି  କାର୍ଯ୍ୟକ୍ରମକୁ ସପ୍ତାହେବ୍ୟାପୀ ସେବା ସପ୍ତାହ ବୋଲି ମଧ୍ୟ କୁହାଯାଇଛି । ହେଲେ ଟୁଇଟର ଜଗତ ତଥା ସୋସିଆଲ ମିଡିଆରୁ ମୋଦିଙ୍କ ଜନ୍ମଦିନରେ ଟ୍ରେଣ୍ଡ ହୋଇଥିବା ଏକ ବିଷୟ ତାଙ୍କ ଜନ୍ମଦିନକୁ ପାଣିଚିଆ କରିବା ପରି ମନେ ହେଉଛି ।

ବିରୋଧୀ କଂଗ୍ରେସ ଏବଂ ଅନ୍ୟାନ୍ୟ ଦଳ ପକ୍ଷରୁ #NationalUnemploymentDay ଟ୍ରେଣ୍ଡ କରାଯାଉଛି । ବିଜେପି ନେତୃତ୍ୱାଧୀନ ଜାତୀୟ ଗଣତାନ୍ତ୍ରିକ ମେଣ୍ଟ(ଏନ୍ ଡି ଏ) ପକ୍ଷରୁ ଅତୀତରେ ନିଆଯାଇଥିବା ତ୍ରୁଟିପୂର୍ଣ୍ଣ ଅର୍ଥନୈତିକ ନିଷ୍ପତ୍ତି, ରୋଜଗାର ସୃଷ୍ଟି ନ ହେବା ବିଷୟକୁ ବିରୋଧୀ ପ୍ରସଙ୍ଗ କରିଛନ୍ତି । କରୋନା ମହାମାରୀ କାରଣରୁ ଏହା ବିରୋଧରେ ବଡ଼ ବଡ଼ ସଭା ସମିତି ଅନୁମତି ନାହିଁ । ତେଣୁ ଏକ ପ୍ରତୀକାତ୍ମକ ବିରୋଧ ଉଦ୍ଦେଶ୍ୟରେ ଏପରି ଟ୍ରେଣ୍ଡି କରାଯାଇଥିବା ଜଣାପଡିଛି ।  ଗୁରୁବାର ସକାଳୁ ପ୍ରଧାନମନ୍ତ୍ରୀ ଜନ୍ମଦିନ ଉପଲକ୍ଷେ ତାଙ୍କୁ ଶୁଭେଚ୍ଛା ଜଣାଇ ଲକ୍ଷାଧିକ ଟୁଇଟ୍ କରାଯାଇଛି । ସାମନ୍ତରାଳ ଭାବେ ନିଯୁକ୍ତି ଦାବି କରି #NationalUnemploymentDay ଟ୍ରେଣ୍ଡ କରାଯାଇଛି ।

କଂଗ୍ରେସ ଶାସିତ ରାଜ୍ୟଗୁଡିକରେ ଏହି ହ୍ୟାସଟ୍ୟାଗ ଟ୍ରେଣ୍ଡ କରାଯିବାସହ ଛାତ୍ର ଓ ଯୁବ କଂଗ୍ରେସ ପକ୍ଷରୁ ପ୍ରତିବାଦ କରାଯାଇଛି । ଦେଶରେ ଜୟପୁର, ରାୟପୁର, ପୁଡୁଚେରୀ,ଚଣ୍ଡିଗଡ,ମୁମ୍ବାଇ ଇତ୍ୟାଦି ସ୍ଥାନରେ ଏହି ପ୍ରତୀକାତ୍ମକ ବିକ୍ଷୋଭ କରାଯାଇଛି । କେତେକ ସ୍ଥାନରେ କଂଗ୍ରେସ କର୍ମୀମାନେ ଚା ଏବଂ ପକୋଡି ପ୍ରସ୍ତୁତି କରି ବିକୁ ଥିବା ମଧ୍ୟ ଲକ୍ଷ୍ୟ କରାଯାଇଛି । ଅନୁରୂପଭାବେ ଓଡ଼ିଶାରେ କଟକ ଏବଂ ଭୁବନେଶ୍ୱର ମଧ୍ୟ ଯୁବ କଂଗ୍ରେସ ପକ୍ଷରୁ ମୋଦିଙ୍କ ଜନ୍ମଦିନକୁ ବେରୋଜଗାର ଦିବସ ରୂପେ ପାଳନ କରାଯାଇଛି ।