କୃଷି ବିଲକୁ କାହିଁକି ବିରୋଧ କରୁଛନ୍ତି କୃଷକ ? ଜାଣନ୍ତୁ କାରଣ

ନୂଆଦିଲ୍ଲୀ: କେନ୍ଦ୍ର ସରକାରଙ୍କ କୃଷି ଆଇନ (Farms Law 2020) ବିରୋଧରେ ବିରୋଧ ଜାରି ରହିଛି । ଏନେଇ ଗୁରୁବାର ଏବଂ ଶୁକ୍ରବାର ଦିନ ପଞ୍ଜାବ ଏବଂ ହରିୟାଣାର ହଜାର ହଜାର କୃଷକ ଦିଲ୍ଲୀରେ ବିକ୍ଷୋଭ ପ୍ରଦର୍ଶନ କରୁଛନ୍ତି । ଏହାସହ  ‘ଦିଲ୍ଲୀ ଚାଲୋ ମାର୍ଚ୍ଚ’ ଆରମ୍ଭ କରିଦେଇଛନ୍ତି । ଏହି ପଦଯାତ୍ରାକୁ ବନ୍ଦ କରିବା ପାଇଁ ହରିୟାଣା ଏବଂ ପଞ୍ଜାବ ସରକାର ନିଜ ସୀମା ସିଲ୍ କରିଛନ୍ତି। ଏନେଇ ଅଧିକ ପୋଲିସ  ଫୋର୍ସ ମଧ୍ୟ ମୁତୟନ କରାଯାଇଛି । ତେବେ ପଟିୟାଲା ଅମ୍ବାଲା ହାଇୱେରେ କୃଷକଙ୍କୁ ରୋକିବାକୁ ଉଦ୍ୟମ କରିଛି ପୋଲିସ । ସେମାନଙ୍କ ଉପରକୁ ଲୁହବୁହା ଗ୍ୟାସ୍ ଓ ପାଣି ମାଡ଼ କରୁଛନ୍ତି ।

ତେବେ ଯେଉଁ ବିଲକୁ ମୋଦି ସରକାର ଚାଷୀଙ୍କ ପାଇଁ ବରଦାନ ବୋଲି କହୁଛନ୍ତି ସେହି ବିଲ ବିରୋଧରେ କାହିଁକି କୃଷକମାନେ ଆନ୍ଦୋଳନ କରୁଛନ୍ତି । ଆସନ୍ତୁ ଜାଣିବା ଆନ୍ଦୋଳନର ମୂଳ କାରଣ କ’ଣ ?

୧. କୃଷକମାନଙ୍କର ସବୁଠାରୁ ବଡ ଭୟ ହେଉଛି MSP ବା ସର୍ବନିମ୍ନ ସହାୟତା ମୂଲ୍ୟର ସମାପ୍ତି । ଏହି ବିଲ୍ ମାଧ୍ୟମରେ ସରକାର ମଣ୍ଡି ବାହାରେ କୃଷି ବ୍ୟବସାୟର ରାସ୍ତା ଖୋଲିଛନ୍ତି।

ସୂଚନାଯୋଗ୍ୟ ଯେ, ମଣ୍ଡି ବାହାରେ ମଧ୍ୟ ଟ୍ରେଡ ଅଞ୍ଚଳ ଘୋଷଣା କରାଯାଇଛି । ମଣ୍ଡି ଭିତରେ ଲାଇସେନ୍ସପ୍ରାପ୍ତ ବ୍ୟବସାୟୀମାନେ ଚାଷୀଙ୍କ ଠାରୁ ସେମାନଙ୍କର ଉତ୍ପାଦକ ଉପରେ ଏମଏସପି ଦେଇଥାନ୍ତି । ଯଦିଓ ବ୍ୟବସାୟ କରୁଥିବା ଲୋକଙ୍କ ପାଇଁ ଏମଏସପି ମାନଦଣ୍ଡ ପ୍ରସ୍ତୁତ ହୋଇନାହିଁ । ତେଣୁ, ବଜାର ବାହାରେ ଏମଏସପି ମିଳିବା ନେଇ କୌଣସି ନିଶ୍ଚିତତା ମଧ୍ୟ ନାହିଁ ।

୨. ସରକାର ବିଲରେ ମଣ୍ଡି ହଟାଇବା ନେଇ କୌଣସି ସ୍ଥାନରେ ବି ଉଲ୍ଲେଖ କରିନାହାଁନ୍ତି, କିନ୍ତୁ ଏହାର ପ୍ରଭାବ ମଣ୍ଡିଗୁଡ଼ିକୁ ନଷ୍ଟ କରିପାରେ । ଆଉ ଏହାକୁ ସନ୍ଦେହ କରି ଭୟଭୀତ ହୋଇପଡିଛନ୍ତି ଚାଷୀକୂଳ । ଏହି ପ୍ରସଙ୍ଗରେ, କୃଷକ ଏବଂ ଖୁଚୁରା ବ୍ୟବସାୟୀ ଏକାଠି ଅଛନ୍ତି । ସେମାନଙ୍କ ଅନୁସାରେ, ମାଣ୍ଡି ରହିଲେ ତ ସେମାନେ ଏମଏସପିରେ ନିଜ ଉତ୍ପାଦଗୁଡ଼ିକୁ ବିକ୍ରି କରିପାରିବେ ।

୩. ଏହି ବିଲରେ ‘ ଗୋଟିଏ ଦେଶ ଦୁଇଟି ମାର୍କେଟ୍’ ଭଳି ପରିସ୍ଥିତି ସୃଷ୍ଟି ହେଉଥିବାର ଦେଖାଯାଇଛି । କାରଣ ମଣ୍ଡି ଭିତରେ ଟିକସ ଦିଆଯିବ ଏବଂ ମଣ୍ଡି ବାହାରେ କୌଣସି ଟିକସ ରହିବ ନାହିଁ । ବର୍ତ୍ତମାନ, ମଣ୍ଡି ବାହାରେ  ଯେଉଁ ବ୍ୟବସ୍ଥା ସରକାର କରିଛନ୍ତି, ସେଥିରେ ବ୍ୟବସାୟୀଙ୍କୁ କୌଣସି ଟିକସ ଦେବାକୁ ପଡିବ ନାହିଁ । ଯେତେବେଳେ କି, ମଣ୍ଡି ଭିତରେ ୬ରୁ ୭ ପ୍ରତିଶତ ଟିକସ ଲାଗିଥାଏ ।

୪. କୃଷକମାନଙ୍କ ତରଫରୁ କୁହାଯାଉଛି ଯେ, ବ୍ୟବସାୟୀ ୬-୭ ପ୍ରତିଶତ ଟିକସ ନଦେଇ ସେ ମଣ୍ଡି ବାହାରୁ ମଧ୍ୟ କୃଷି ଉତ୍ପାଦ କିଣିପାରିବ । ଯେଉଁଠାରେ ସେମାନଙ୍କୁ କୌଣସି ଟିକସ ଦେବାକୁ ପଡିବ ନାହିଁ । ଏହି ନିଷ୍ପତ୍ତି ଦ୍ୱାରା ମଣ୍ଡି ବ୍ୟବସ୍ଥା ସମ୍ପୂର୍ଣ୍ଣ ପ୍ରଭାବିତ ହେବ । ମଣ୍ଡି କମିଟି ଦୁର୍ବଳ ହେଲେ ଚାଷୀ ଧୀରେ ଧୀରେ ବଜାରକୁ ଯିବେ । ଯେଉଁଠାରେ ତାହାର ଉତ୍ପାଦର ମୂଲ୍ୟ ବା ଏମଏସପି ସରକାର ସ୍ଥିର କରିଥିବା ମୂଲ୍ୟ ଠାରୁ ଅଧିକ ବି ହୋଇପାରେ ଓ କମ୍ ବି ।

୫. ତେବେ ଏହି ବିଲକୁ ବିଶେଷକରି ପଞ୍ଜାବ ଏବଂ ହରିୟାଣା ସରକାର ଭୟ କରୁଛନ୍ତି, କାରଣ ଯଦି ଘରୋଇ କ୍ରେତାମାନେ ଚାଷୀଙ୍କଠାରୁ ସିଧାସଳଖ ଧାନ କିଣନ୍ତି, ତେବେ ସେମାନେ ମଣ୍ଡିରେ ମିଳୁଥିବା ଟିକସ ହରାଇବେ । କାରଣ ଉଭୟ ରାଜ୍ୟ ମଣ୍ଡିରୁ  ବଡ଼ ଧରଣ ଟିକସ ପାଆନ୍ତି, ଯାହାକୁ ସେମାନେ ବିକାଶ କାର୍ଯ୍ୟରେ ବ୍ୟବହାର କରନ୍ତି । ତେବେ ହରିୟାଣାରେ ବିଜେପି ଶାସନ ଅଛି ତେଣୁ ଏଠାରେ ଶାସକ ଦଳ ନେତା ଏହି ପ୍ରସଙ୍ଗରେ ମୌନବ୍ରତ ଅବଲମ୍ବନ କରିଛନ୍ତି ।

୬. ତେବେ ଏହି ବିଲରେ ଆଉ ଏକ ଆଇନ ରହିଛି । ଯେଉଁଥିରେ ଚାଷୀଙ୍କ କୋର୍ଟକୁ ଯିବାର ଅଧିକାର ଛଡ଼ାଇ ନିଆଯାଇଛି । କମ୍ପାନୀ ଏବଂ କୃଷକଙ୍କ ମଧ୍ୟରେ ବିବାଦ ହେଲେ ଏସଡିଏମ ଏହାର ବିଚାର କରିବ । ସେମାନଙ୍କର ଆବେଦନ କୋର୍ଟରେ ନୁହେଁ ବରଂ ଡିଏମରେ ହେବ। ତେବେ କୃଷକମାନେ ଡିଏମ, ଏସଡିଏମ ଉପରେ ବିଶ୍ୱାସ କରନ୍ତି ନାହିଁ କାରଣ ସେମାନେ ଭାବନ୍ତି ଯେ, ଏହି ଦୁଇଟି ପଦବୀରେ ବସିଥିବା ଲୋକମାନେ ସରକାରଙ୍କର ଆଉ କେବେ ବି କୃଷକଙ୍କ ସ୍ୱାର୍ଥକୁ ଦେଖିବେ ନାହିଁ ।

୭. କେନ୍ଦ୍ର ସରକାର ଯାହା ଆଇନରେ ଉଲ୍ଲେଖ କରି ନାହାଁନ୍ତି ତାହା ବାହାରେ ପ୍ରତିଶ୍ରୁତି ଦେଉଛନ୍ତି । ଏହି କାରଣରୁ କୃଷକମାନଙ୍କ ମଧ୍ୟରେ ଦ୍ୱନ୍ଦ୍ୱ ଦେଖା ଦେଇଛି । ସରକାର ଏମଏସପି ଜାରି ରହିବା ଏବଂ ମଣ୍ଡି ବନ୍ଦ ନ ହେବାର ପ୍ରତିଶ୍ରୁତି ଦେଉଛନ୍ତି । କିନ୍ତୁ ଏ କଥା ସେ ଆଇନରେ ଉଲ୍ଲେଖ କରୁ ନାହାଁନ୍ତି । ତେଣୁ ସନ୍ଦେହ ଏବଂ ଦ୍ୱନ୍ଦ୍ୱ ରହିଛି । ତେବେ କୃଷକଙ୍କ ଏହି ଭୟକୁ ସରକାର ଆରମ୍ଭରୁ ଖାରଜ କରୁଛନ୍ତି।