ନନ୍ଦିଘୋଷ ବ୍ୟୁରୋ : ଜୁଲାଇ ୪ରେ ଅନୁଷ୍ଠିତ ବ୍ରିଟେନ୍ ନିର୍ବାଚନରେ ୧୪ ବର୍ଷ ଧରି ଶାସନରେ ଥିବା କଞ୍ଜରଭେଟିବ୍ ପାର୍ଟି ପରାଜୟର ସ୍ୱାଦ ଚାଖିଛି । କିନ୍ତୁ ଭାରତୀୟ ବଂଶୋଦ୍ଭବ ଶିବାନୀ ରାଜା ଲିସେଷ୍ଟର ଇଷ୍ଟ୍ ସଂସଦୀୟ ଆସନରେ ବିଜୟୀ ହୋଇଛନ୍ତି। କଞ୍ଜରଭେଟିଭ୍ ପାର୍ଟିରୁ ଲଢ଼ିଥିବା ଗୁଜରାଟୀ ମୂଳର ୨୯ ବର୍ଷୀୟା ବିଜିନେସ୍ଓମେନ୍ ଶିବାନୀ ଲେବର ପାର୍ଟିର ଭାରତୀୟ ବଂଶୋଦ୍ଭବ ରାଜେଶ ଅଗ୍ରଓ୍ବାଲଙ୍କୁ ୧୪,୫୨୬ ଭୋଟରେ ହରାଇଛନ୍ତି।
ଏହି ଆସନରେ ଲେବର ପାର୍ଟି ୩୭ ବର୍ଷ ଧରି ପ୍ରତିନିଧିତ୍ୱ କରିଆସିଥିଲା। ଶିବାନୀ ପାର୍ଲାମେଣ୍ଟରେ ଗୀତା ଧରି ଏମ୍ପି ଭାବେ ଶପଥ ନେଇ ଚର୍ଚ୍ଚାକୁ ଆସିଛନ୍ତି। ଶିବାନୀଙ୍କ ବ୍ୟତୀତ ଅନ୍ୟ ୨୭ ଜଣ ଭାରତୀୟ ବଂଶୋଦ୍ଭବ ହାଉସ୍ ଅଫ୍ କମନ୍ସକୁ ନିର୍ବାଚିତ ହୋଇଛନ୍ତି। ୬୫୦ ଆସନ ମଧ୍ୟରୁ ଋଷି ସୁନକଙ୍କ କଞ୍ଜରଭେଟିଭ୍ ପାର୍ଟିକୁ ୧୨୧ (ପୂର୍ବାପେକ୍ଷା ୨୫୦ କମ୍) ଆସନ ମିଳିଥିବାବେଳେ ଲେବର ପାର୍ଟିକୁ ୪୧୨ ସିଟ୍ରେ ସଫଳତା ମିଳିଛି। ଲେବର ପାର୍ଟି ଲିଡର କିର୍ ଷ୍ଟର୍ମର ନୂଆ ପ୍ରଧାନମନ୍ତ୍ରୀ ହୋଇଛନ୍ତି।
ଶିବାନୀ ୨୯ ବର୍ଷିୟା ଭାରତୀୟ ବଂଶୋଦ୍ଭବ । ସେ ତାଙ୍କ ପରିବାରର ପ୍ରଥମ ବ୍ରିଟିଶ ନାଗରିକ । ଶିବାନୀଙ୍କ ପିତାମାତା ୧୯୭୦ ମସିହାରେ କେନିଆରୁ ଇଂଲଣ୍ଡ ଲିସେଷ୍ଟରକୁ ଆସିଥିଲେ । ଏହା ପରେ ୧୯୯୪ ଜୁଲାଇ ୨୧ରେ ଲିସେଷ୍ଟରରେ ଶିବାନୀଙ୍କ ଜନ୍ମ ହୋଇଥିଲା । ବ୍ରିଟେନରେ ବଢିବା ସତ୍ତ୍ୱେ ଶିବାନୀ ଭାରତୀୟ ସଂସ୍କୃତି ଏବଂ ପରମ୍ପରା ସହିତ ଏବେ ବି ଜଡିତ ରହିଛନ୍ତି । ଏକ ଗୁଜୁରାଟୀ ପରିବାରରୁ ଆସିବା ସହ ସେ ରାଜନୀତି ଏବଂ ଫ୍ୟାମିଲି ବିଜନେସ ସହ ଜଡିତ ରହିଛନ୍ତି । ସେ ୨୦୧୭ରେ ମିସ୍ ଇଣ୍ଡିଆ ୟୁକେ ବ୍ୟୁଟି ପ୍ରୋଜେଟରେ ମଧ୍ୟ ଭାଗ ନେଇଥିଲେ ଏବଂ ସେଥିରେ ସେ ସେମି- ଫାଇନାଲିଷ୍ଟ ମଧ୍ୟ ହୋଇଥିଲେ ।
