ସେନା ହେଲିକପ୍ଟର ଦୁର୍ଘଟଣାରେ ଏକାକୀ ଜୀବିତ ଗ୍ରୁପ କ୍ୟାପଟେନ୍ ବରୁଣ ସିଂହ, ଏହା ପୂର୍ବରୁ ବି ମୃତ୍ୟୁକୁ ଦେଇଥିଲେ ମାତ୍…

କନ୍ନୁର: ତାମିଲନାଡୁରେ ସେନା ହେଲିକପ୍ଟରର ଦୁର୍ଘଟଣାରେ ଆହତ ହୋଇଥିବା ଗ୍ରୁପ କ୍ୟାପଟେନ୍ ବରୁଣ ସିଂହଙ୍କ ଚାଲିଛି ଚିକିତ୍ସା । ଓ୍ବେଲିଂଟନ ସେନା ହସ୍ପିଟାଲରେ ଚିକିତ୍ସତ ହେଉଛନ୍ତି ବରୁଣ ସିଂହ। ଏକ ସ୍ବତନ୍ତ୍ର ଡାକ୍ତରୀ ଦଳ ତାଙ୍କର ଚିକିତ୍ସା ଜାରି ରଖିଛନ୍ତି । ତେବେ ଅଧିକ ଚିକିତ୍ସା ପାଇଁ ଆବଶ୍ୟକସ୍ଥଳେ ତାଙ୍କୁ କୋଏମ୍ବାଟୁର ନିଆଯାଇପାରେ ବୋଲି ସୂଚନା ମିଳିଛି ।

ହାଲୁକା ଲଢୁଆ ବିମାନ ବା ଏଲସିଏର ଦକ୍ଷ ପାଇଲଟ ବରୁଣ ଗତବର୍ଷ ଅକ୍ଟୋବର ୧୨ ତାରିଖରେ ଏକ ବଡ ଦୁର୍ଘଟଣାରୁ ଆଶ୍ଚର୍ଯ୍ୟଜନକ ଭାବେ ରକ୍ଷା ପାଇଥିଲେ।  ହେଲିକେପ୍ଟର ଦୁର୍ଘଟଣା ହେବା ସମୟରେ ସେଥିରେ ଥିଲେ ବରୁଣ । ଗ୍ରୁପ କ୍ୟାପଟେନ୍ ବରୁଣ ସିଂହଙ୍କୁ ଗଣତନ୍ତ୍ର ଦିବସରେ ଶୌର୍ଯ୍ୟ ଚକ୍ରରେ ସମ୍ମାନିତ କରାଯାଇଥିଲା ।

ଏକଦା ଏଲସିଏର ଫ୍ଲାଇଟ କଣ୍ଟ୍ରୋଲ ସିଷ୍ଟମ ଓ ଲାଇଫ ସପୋର୍ଟ ଏନଭିରନମେଣ୍ଟ କଣ୍ଟ୍ରୋଲ ସିଷ୍ଟମ ସଜଡାଯିବା ପରେ ଉକ୍ତ ବିମାନର ଉଡାଣ ଆରମ୍ଭ କରିଥିଲେ । ବିମାନଟି ଅତି ଉଚ୍ଚରେ ଉଡୁଥିବାବେଳେ ଏହାର କକପିଟ ପ୍ରେସରାଇଜେସନ ସିଷ୍ଟମ ଫେଲ୍ ହୋଇଯାଇଥିଲା । ଏହା ସହ ଫ୍ଲାଇଟ କଣ୍ଟ୍ରୋଲ ସିଷ୍ଟମ ବି ଅଚଳ ହୋଇଯାଇଥିବାରୁ ଏକ ଭୟଙ୍କର ଦୁର୍ଘଟଣା ଅବଶ୍ୟମ୍ଭାବୀ ଥିଲା । ମାତ୍ର ନିଜର ପାରଦର୍ଶିତା, ଅସାଧାରଣ ସାହସ, ବୁଦ୍ଧି ଯୋଗୁ ସେ ପୁନର୍ବାର ବିମାନକୁ ନିୟନ୍ତ୍ରଣକୁ ଆଣିଥିଲେ ବରୁଣ। ବିମାନ ଅବତରଣର ଫର୍ମୂଲା ଅନ୍ୟ ପାଇଲଟଙ୍କ ଲାଗି ବି ଅନନ୍ୟ ଉଦାହରଣ ସୃଷ୍ଟି କରିଥିଲା । ଏହି ସାହସିକତା ଲାଗି ତାଙ୍କୁ ଶୌର୍ଯ୍ୟ ଚକ୍ର ଉପାଧିରେ ଭୂଷିତ କରାଯାଇଥିଲା।

ବରୁଣ ଉତ୍ତରପ୍ରଦେଶର ଦେବରିଆ ଜିଲ୍ଲାର ବାସିନ୍ଦା। ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହଙ୍କ ସମେତ ସଭିଏଁ ବରୁଣଙ୍କ ଆଶୁ ଆରୋଗ୍ୟ କାମନା କରିଛନ୍ତି।

ଅଧିକ ପଢନ୍ତୁ- ସେନାର ସବୁଠୁ ସୁରକ୍ଷିତ ହେଲିକପ୍ଟର MI-17V-5; ପ୍ରଧାନମନ୍ତ୍ରୀ ବି କରନ୍ତି ଯାତ୍ରା  

ଉଲ୍ଲେଖଯୋଗ୍ୟ, ଭାରତୀୟ ବାୟୁ ସେନାର MI-17V5 ହେଲିକପ୍ଟରରେ ଲେକ୍ଟର ସିରିଜରେ ଯୋଗ ଦେବାକୁ ଯାଉଥିଲେ ସିଡିଏସ୍ ବିପିନ ରାୱତ। ଏହି ହେଲିକପ୍ଟରରେ ଚିଫ୍ ଡିଫେନ୍ସ ଷ୍ଟାଫ ବିପିନ୍ ରାଓ୍ୱତଙ୍କ ସହ ତାଙ୍କ ପତ୍ନୀ ମଧୁଲିକା ରାଓ୍ୱତ, ବ୍ରିଗେଡିଅର ଏଲଏସ ଲିଦର, ଲେପ୍ଟନାଣ୍ଟ କର୍ଣ୍ଣେଲ ହରଜିନ୍ଦର ସିଂ, ନାୟକ ଗୁରୁସେବକ ସିଂହ, ନାୟକ ଜିତେନ୍ଦ୍ର କୁମାର, ଲାନ୍‌ସ ନାୟକ ବିବେକ କୁମାର, ଲାନ୍‌ସ ନାୟକ ବି. ସାଇତେଜା ଏବଂ ହାବିଲଦାର ସତପାଲ ଥିଲେ । ଏମାନଙ୍କ ବ୍ୟତୀତ ଦୁଇ ଜଣ ପାଇଲଟ ଏବଂ ହେଲିକପ୍ଟରର ଟେକ୍ନିକାଲ ଷ୍ଟାଫ୍ ଉପସ୍ଥିତି ଥିଲେ । ୧୪ ଜଣଙ୍କ ମଧ୍ୟରୁ ୧୩ ଜଣଙ୍କ ମୃତ୍ୟୁ ହୋଇଥିବା ନେଇ ବାୟୁ ସେନା ଟ୍ୱିଟ୍ କରି ସୂଚନା ଦେଇଥିଲା।