୧୦୪ ଯାତ୍ରୀଙ୍କ ସହ ସୁଡଙ୍ଗ ଭିତରେ ଗାଏବ ହୋଇଗଲା ଟ୍ରେନ୍ !

ଟ୍ରେନ୍ ଓ ରହସ୍ୟମୟୀ ପ୍ଲାଟଫର୍ମ ବାବଦରେ ଅନେକ କଥା ଶୁଣିବାକୁ ମିଳେ । କିନ୍ତୁ ଇଟାଲିର ଗୋଟିଏ ଟ୍ରେନ୍ ଯେଉଁଭଳି ରହସ୍ୟଜନକ ଭାବେ ଏକ ସୁଡଙ୍ଗ ଭିତରୁ ଗାଏବ ହୋଇଯାଇଥିଲା ସେଭଳି ଘଟଣା ବିଶ୍ୱରେ ଆଉ କେଉଁଠି ଘଟିନାହିଁ । ସେହି ଘଟଣାକୁ ୧୦୯ ବର୍ଷ ବିତିଯାଇଥିଲେ ବି ଏପର୍ଯ୍ୟନ୍ତ ଜଣା ପଡିନି ଯେ, ଟ୍ରେନ୍ ଓ ଏହାର ଯାତ୍ରୀ କୁଆଡେ ଗଲେ ?

୧୦୪ ଯାତ୍ରୀ,ଗୋଟିଏ ଟ୍ରେନ୍ ଓ ୧୦୯ ବର୍ଷର ରହସ୍ୟ

୧୯୧୧ ମସିହାରେ ଏହି ରହସ୍ୟମୟ ଘଟଣା ଘଟିଥିଲା । ଇଟାଲିର ଜେନେଟି ନାମକ ଗୋଟିଏ କମ୍ପାନୀର ଟ୍ରେନ୍ ତା’ର ଗନ୍ତବ୍ୟସ୍ଥଳରେ ପହଂଚିବା ପୂର୍ବରୁ ଏକ ସୁଡଙ୍ଗ ମଧ୍ୟରେ ରହସ୍ୟଜନକ ଭାବେ ଗାଏବ ହୋଇଯାଇଥିଲା ।  ଟ୍ରେନ୍ ଗାଏବ ହେବା ବେଳେ ସେଥିରେ ସର୍ବମୋଟ ୧୦୬ ଜଣ ଥିଲେ । କୁହାଯାଏ ଯେ,ଏହି ଟ୍ରେନ କୌଣସି ପରଲୌକିକ ଶକ୍ତି ସାହାଯ୍ୟରେ ଟାଇମ୍ ଟ୍ରାଭେଲ କରିଛି ।

ପୁରା ଘଟଣା କ’ଣ ଥିଲା ?

ଜୁନ୍ ୧୯୧୧ । ଇଟାଲି ରେଳ କଂପାନୀ ଜେନେଟି ତାର ନୂଆ ମଡେଲର ଟ୍ରେନରେ ଯାତ୍ରୀଙ୍କୁ ମାଗଣା ବୁଲାଇବା ଅଫର ଦେଇଥିଲା ।  ଟ୍ରେନରେ ୧୦୦ ଜଣ ଯାତ୍ରୀଙ୍କ ସହ ୬ ଜଣ କର୍ମଚାରୀ ପ୍ରଥମ ଯାତ୍ରାରେ ବାହାରିଥିଲେ । ଟ୍ରେନ୍ ଭିତରେ ଖାଦ୍ୟ ପଦାର୍ଥର ଭଲ ବ୍ୟବସ୍ଥା ଥିଲା ।  ଯାତ୍ରୀ ନିଜ ଗନ୍ତବ୍ୟସ୍ଥଳରେ ପହଂଚିବାକୁ ଅପେକ୍ଷା କରିଥିଲେ । କିନ୍ତୁ ଗନ୍ତବ୍ୟସ୍ଥଳରେ ପହଂଚିବା ପୂର୍ବରୁ ଏକ ସୁଡଙ୍ଗ ଭିତରେ ଟ୍ରେନ୍ ଅଚାନକ ଗାଏବ ହୋଇଯାଇଥିଲା । ଟ୍ରେନକୁ ଖୋଜା ଯାଇଥିଲା କିନ୍ତୁ ଟ୍ରେନ ମିଳି ନଥିଲା । ଟ୍ରେନ୍ ଓ ଯାତ୍ରୀ କୁଆଡେ ଗଲେ କେହି ମଧ୍ୟ ଜାଣି ପାରିନଥିଲେ ।

୧୦୬ ଯାତ୍ରୀଙ୍କ ମଧ୍ୟରୁ ୨ ଜଣ ମିଳିଥିଲେ

ପୁରା ଟ୍ରେନ୍ ଗାଏବ ହୋଇଥିଲା । କିନ୍ତୁ ମିଳିଥିଲେ ମାତ୍ର ୨ ଜଣ ଯାତ୍ରୀ । ସେହି ଦୁଇ ଯାତ୍ରୀ ମଧ୍ୟ ମାନସିକ ଭାବେ ବିକ୍ଷିପ୍ତ ଥିଲେ । ସେମାନେ କେମିତି ଟ୍ରେନରୁ ବାହାରିଲେ,ଟ୍ରେନରେ କ’ଣ ହୋଇଥିଲା କିଛି ମଧ୍ୟ କହି ପାରିନଥିଲେ । ଅନେକ ବର୍ଷ ଚିକିତ୍ସିତ ହେବା ପରେ ଉଭୟ ଠିକ୍ ହୋଇଥିଲା । ଆଉ କେବଳ ଏତିକି ମନେ ପକାଇ ପାରିଥିଲେ ଯେ, ସୁଡଙ୍ଗ ଭିତରେ ଟ୍ରେନ୍ ଥିବା ବେଳେ ଧଳା ରଙ୍ଗର ଧୁଆଁ ବଗି ଭିତରେ ଭର୍ତ୍ତି ହୋଇଯାଇଥିଲା । ଯାତ୍ରୀ ଭୟଭୀତ ହୋଇପଡିଥିଲେ । କୌଣସି ମତେ ଏହି ଦୁଇ ଜଣ ଟ୍ରେନ୍ ଭିତରୁ ବାହାରକୁ ଆସିଥିଲେ କିନ୍ତୁ ସେମାନେ କେମିତି ବାହାରକୁ ଆସିଲେ ସେ ବାବଦରେ ଉଭୟଙ୍କର କିଛି ମଧ୍ୟ ମନେ ନଥିଲା ।

ଟାଇମ୍ ଟ୍ରାଭେଲ ?

ଏହି ଘଟଣା ପରେ ଉକ୍ତ ସୁଡଙ୍ଗକୁ ବନ୍ଦ କରି ଦିଆଯାଇଥିଲା ।  ଅନେକ ଦାବି କରିଥିଲେ ଯେ, ଟ୍ରେନ ଟାଇମ୍ ଟ୍ରାଭେଲର ଚାଲିଯାଇଛି । ୧୯୧୧ ମସିହାରୁ ଏହି ଟ୍ରେନ୍ ୧୮୪୦ ମସିହାର ବ୍ରାଜିଲକୁ ପଛୁଆ ଫେରିଥିବା ମଧ୍ୟ କିଛି କହିଥିଲେ । କିନ୍ତୁ ସତ କ’ଣ ଆଜି ପର୍ଯ୍ୟନ୍ତ କେହି ଜାଣି ନାହାନ୍ତି । ଟ୍ରେନ୍ ଗାଏବ ହେବାର ଅନେକ ବର୍ଷ ପର୍ଯ୍ୟନ୍ତ ୟୁରୋପର ବିଭିନ୍ନ ଦେଶରେ ଏହି ରହସ୍ୟମୟୀ ଟ୍ରେନକୁ ଦେଖାଯାଇଥିବା ଦାବି କରାଯାଇଥିଲା । ଏପରିକି କେଇ ଦଶକ ପରେ ବ୍ରାଜିଲର ଜଣେ ଡାକ୍ତର ଦାବି କରିଥିଲେ ଯେ,ସେ ଯେଉଁ ଡାକ୍ତରଖାନାରେ କାମ କରୁଥିଲେ ସେଠାରେ ୧୦୪ ଜଣ ଇଟାଲୀ ନାଗରିକ ଭର୍ତ୍ତି ହୋଇଥିଲେ । ସେମାନଙ୍କ ମାନସିକ ଅବସ୍ଥା ଠିକ ନଥିଲା ଓ ସମସ୍ତେ କୌଣସି ଟ୍ରେନ୍ ବାବଦରେ କହୁଥିଲେ ।