ଗୁମ୍ଫାରୁ ୬ଲଢୁଆ ବିମାନ ଲୁଟି କାବୁଲ ଅଧିକାର କରିବା ପରେ ତାଲିବାନ ଜଣେ ରାଷ୍ଟ୍ରପତିଙ୍କୁ ପିଟିପିଟି ମାରି ଦେଇଥିଲା !
କାବୁଲ : ଆଫଗାନିସ୍ତାନର ପଞ୍ଜଶିର ଘାଟିକୁ ଛାଡିଦେଲେ ପୁରା ଦେଶ ଏବେ ତାଲିବାନ କବଜାରେ ଅଛି । ତାଲିବାନ ତା’ ଶାସନର ଦ୍ୱିତୀୟ ପାଳି ଆରମ୍ଭ କରିଥିବା ବେଳେ ପ୍ରଥମ ଶାସନ ଅମଳରେ ଘଟିଥିବା କିଛି ଘଟଣାକୁ ନେଇ ଏବେ ଢେର ଆଲୋଚନା ଚାଲୁଛି । ପ୍ରଥମ ପାଳିରେ ତାଲିବାନ ପଥର ମୁର୍ତ୍ତିଠାରୁ ଆରମ୍ଭ କରି ଜିବୀତ ବ୍ୟକ୍ତି ସମସ୍ତଙ୍କ ଉପରେ କରିଥିଲା ଅକଥନୀୟ ଅତ୍ୟାଚାର । ବିରୋଧୀଙ୍କ ପାଇଁ ତାଲିବାନର ଗୋଟିଏ ଦଣ୍ଡ ଥିଲା । ଆଉ ତା’ ହେଉଛି ଅକଥନୀୟ ନିର୍ଯାତନା ପରେ ମୃତ୍ୟୁ । ତାଲିବାନ ତା’ର ପ୍ରଥମ କାର୍ଯ୍ୟକାଳରେ ଦେଶର ଜଣେ ପୂର୍ବତନ ରାଷ୍ଟ୍ରପତିଙ୍କୁ ପିଟି ପିଟି ହତ୍ୟା କରିଥିଲା ।
ନଜିବଉଲ୍ଲା : ସେଇ ରାଷ୍ଟ୍ରପତି ଯାହାଙ୍କୁ ତାଲିବାନ ହତ୍ୟା କରିଥିଲା
୧୯୯୬ ମସିହାରେ ପାକିସ୍ତାନ ପଟୁ ତାଲିବାନ ଆଫଗାନିସ୍ତାନକୁ ପ୍ରବେଶ କରିଥିଲା । ତାଲିବର ଅର୍ଥ ହେଉଛି ବିଦ୍ୟାର୍ଥୀ । ତାଲିବାନର ପ୍ରତି ସଦସ୍ୟ ମଦ୍ରାସାରୁ ଶିକ୍ଷା ଲାଭ କରିଥାନ୍ତି । ବେନଜିର ଭୁଟ୍ଟୋଙ୍କ ଅମଳରେ ପାକିସ୍ତାନ ତାଲିବାନକୁ ତିଆରି କରିଥିଲା । ଲକ୍ଷ୍ୟ ଥିଲା ତାଲିବାନ ଜରିଆରେ ଆଫଗାନିସ୍ତାନକୁ ନିୟନ୍ତ୍ରଣ କରି ଇରାନ,ଭାରତ ଓ ଋଷକୁ ଟକ୍କର ଦେବା । ୧୯୯୬ରେ ତାଲିବାନ କାବୁଲ ଦଖଲ କରିଥିଲା । ସେତେବେଳେ ସେଠାରେ ମୁଜାହିଦ୍ଦିନଙ୍କ ସରକାର ଥିଲା । ମୁଜାହିଦ୍ଦିନଙ୍କ ପଳାୟନ ପରେ ପୁର୍ବତନ କମ୍ୟୁନିଷ୍ଟ ରାଷ୍ଟ୍ରପତି ନଜିବଉଲ୍ଲାଙ୍କୁ ତାଲିବାନ ନୃଶଂସତାର ସହ ହତ୍ୟା କରିଥିଲା । ଜାତିସଂଘ ଅଫିସରେ ଶରଣ ନେଇଥିବା ନଜିବଉଲ୍ଲାଙ୍କୁ ପିଟି ପିଟି ହତ୍ୟା କରାଯାଇଥିଲା । ପରେ ତାଙ୍କ ଗୁପ୍ତାଙ୍ଗକୁ କାଟି ଦିଆଯାଇଥିଲା । ଏହା ପରେ ତାଙ୍କ ମୃତଦେହକୁ କାବୁଲର ଗୋଟିଏ ଟ୍ରାଫିକ୍ ପୋଷ୍ଟରେ କିଛି ଦିନ ପାଇଁ ଟଙ୍ଗାଇ ରଖା ଯାଇଥିଲା । ନଜିବଉଲ୍ଲାଙ୍କ ପରିବାରକୁ ଭାରତ ଶରଣ ଦେଇଥିବାରୁ ସେମାନେ ରକ୍ଷା ପାଇଯାଇଥିଲେ । ନଜିବଉଲ୍ଲାଙ୍କୁ ଭାରତରେ ଆଶ୍ରୟ ଦେବାକୁ ହୋଇଥିବା ଉଦ୍ୟମ ବିଫଳ ହେବା ପରେ ସେ ଜାତିସଂଘ ଅଫିସରେ ଶରଣ ନେଇଥିଲେ । ତାଲିବାନ ପୂର୍ବରୁ ମୁଜାହିଦ୍ଦିନ ମାନେ କାବୁଲକୁ ନିଜ କବଜାକୁ ନେଇଥିଲେ । ଏହି ସମୟରେ ଭାରତ ତାଙ୍କୁ ବିମାନରେ ନୂଆଦିଲ୍ଲୀ ଆଣିବାକୁ ଉଦ୍ୟମ କରିଥିଲା ।
ଯେଉଁଦିନ ନଜିବ ରାଷ୍ଟ୍ରପତି ଭବନରୁ ବିମାନବନ୍ଦର ଅଭିମୁଖେ ଯାତ୍ରା କରିଥିଲେ ସେହି ରାତିରେ ହିଁ ବିମାନ ବନ୍ଦରକୁ ମୁଜାହିଦ୍ଦିନ ନିଜ କବଜାକୁ ନେଇ ଯାଇଥିଲେ । ଫଳରେ ନଜିବ ବିମାନ ଚଢି ପାରିନଥିଲେ । ସେ ଭାରତୀୟ ଦୂତାବାସରେ ଶରଣ ନେବାକୁ ଚାହିଁଥିଲେ କିନ୍ତୁ ଭାରତ ତାଙ୍କୁ ଜାତିସଂଘ ଅଫିସରେ ଶରଣ ନେବାକୁ ପରାମର୍ଶ ଦେଇଥିଲା । କାରଣ ଜାତିସଂଘ ଅଫିସ ଅଧିକ ସୁରକ୍ଷିତ ବୋଲି ସେତେବେଳେ ମନେ କରାଯାଇଥିଲା । ନଜିବ ମଧ୍ୟ ପାଖାପାଖି ଅଢେଇ ବର୍ଷ ଜାତିସଂଘ ଅଫିସରେ ଥିଲେ । ଏହି ସମୟରେ ତାଙ୍କୁ ପାକିସ୍ତାନରେ ଶରଣ ନେବାକୁ ପ୍ରସ୍ତାବ ଦିଆଯାଇଥିଲା । କିନ୍ତୁ ନଜିବ ପାକିସ୍ତାନ ପ୍ରତିନିଧିଙ୍କୁ ଗାଳିଗୁଲଜ କରି ନିଜ ରୁମରୁ ବାହାର କରିଦେଇଥିଲା । ନଜିବ ଜାତିସଂଘ ଅଫିସରେ ଶରଣ ନେଇଥିବା ବେଳେ ମୁଜାହିଦ୍ଦିନ ସରକାରର ପତନ ଘଟିଥିଲା । ଆଉ ତାଲିବାନ ଶାସନକୁ ଆସିଥିଲା । ତାଲିବାନ କାବୁଲ ମଧ୍ୟକୁ ପ୍ରବେଶ କରିବା ପରେ ପ୍ରଥମ କାମ କରିଥିଲା ନଜିବଙ୍କୁ ଖୋଜି ବାହାର କରି ହତ୍ୟା କରିବା ।
ତାଲିବାନ କେମତି ଆରମ୍ଭ ହୋଇଥିଲା ?
୧୯୯୪ରେ ଆଫଗାନିସ୍ତାନରେ ଜଣେ ମୁଜାହିଦ୍ଦିନ ନିଜ ପୂର୍ବତନ ସାଥୀଙ୍କ କାଣ୍ଡକାରଖାନାକୁ ନେଇ ଅସନ୍ତୁଷ୍ଟ ଥିଲା । ସେହି ବ୍ୟକ୍ତିର ନାମ ଥିଲା ମୁଲ୍ଲା ସଲାମ ଅବ୍ଦୁଲ ଜାଇଫ୍ । ଜାଇଫ୍ ସୋଭିଏତ ସଂଘ ଆକ୍ରମଣ କାଲରେ ମୁଜାହିଦ୍ଦିନ ଭାବେ ଜିହାଦ ଲଢିଥିଲା । ୧୯୯୪ରେ ସେ ଏକ ସଂଗଠନ ତିଆରି କରି ମୁଜାହିଦ୍ଦିନ ନେତାଙ୍କୁ କ୍ଷମତାରୁ ବେଦଖଲ କରିବାକୁ ଚାହୁଁଥିଲା । ନିଜ ଉଦ୍ଦେଷ୍ୟ ପୁରଣ ପାଇଁ ଜାଇଫ୍,ମୁଲ୍ଲା ଉମରକୁ ଭେଟିଥିଲା । ମୁଲ୍ଲା ଉମର ସେହି ସମୟରେ କାନ୍ଦାହାର ପାଖରେ ଥିବା ଗୋଟିଏ ଗାଁର ମଦ୍ରାସାର ଶିକ୍ଷକ ଥିଲା । ଦୁଇ ମୁଲ୍ଲା ମିଶି ୫୦ ଜଣ ତାଲିବଙ୍କୁ ନେଇ ତିଆରି କରିଥିଲ ତାଲିବାନ । ଏହି ସମୟରେ ପାକିସ୍ତାନ ମଧ୍ୟ ମୁଜାହିଦ୍ଦିନଙ୍କ କାର୍ଯ୍ୟକଳାପକୁ ନେଇ ଅସନ୍ତୁଷ୍ଟ ଥିଲା । ପାକିସ୍ତାନର ଏକ ବ୍ୟବସାୟିକ ପ୍ରତିନିଧି ମଣ୍ଡଳକୁ କିଛି ମୁଜାହିଦ୍ଦିନ ଅପହରଣ କରି ଟଙ୍କା ମାଗୁଥିବାରୁ ଆଇଏସଆଇ ମୁଜାହିଦ୍ଦିନଙ୍କୁ ପାନେ ଚଖାଇବା ପାଇଁ ତାଲିବାନକୁ ସାହାଯ୍ୟ କରିଥିଲା । ମୁଲ୍ଲା ଉମର ଓ ଜାଇଫ୍ ମିଶି କାନ୍ଦାହାର ସୀମାରେ ଥିବା ସ୍ପିନ ବୁଲଦକ ନାମକ ସହର ଉପରେ କବଜା କରିଥିଲେ । ଏହି ସହର ପାଖରେ ଗୋଟିଏ ପାହାଡ ଥିଲା । ପାହାଡର ଗୁମ୍ଫାରେ ସୋଭିଏତ ଅମଳର ଅସ୍ତ୍ରଶସ୍ତ୍ର ଲୁଚାଇ ରଖାଯାଇଥିଲା । ୨ଶହ ତାଲିବଙ୍କ ସହିତ ଦୁଇ ମୁଲ୍ଲା ପାହାଡ ଗୁମ୍ଫାରୁ ଅସ୍ତ୍ରଲୁଟ କରି କାବୁଲ ଅଭିମୁଖେ ବାହାରି ଥିଲେ । ସେହି ଗୁମ୍ଫାରୁ ମୁଲ୍ଲା ଉମର ପାଇଥିଲା ୬ଟି ମିଗ୍ ବିମାନ । ଯାହା ତାକୁ ବିରୋଧୀଙ୍କୁ ଧ୍ୱଂସ କରିବାରେ ସାହାଯ୍ୟ କରିଥିଲା । କାବୁଲ ଅଧିକାର କରିବା ପରେ ମୁଲ୍ଲାର ପ୍ରଥମ ଆଦେଶ ଥିଲା କାଫିର ନଜିବଉଲ୍ଲାକୁ ଖୋଜି ହତ୍ୟା କର ।
