ହାତୀ ମୃତ୍ୟୁ ରୋକିବ ହ୍ୱାଟସ୍‌ ଆପ୍ ଗ୍ରୁପ୍

ଭୁବନେଶ୍ୱର: ଗଜରାଜଙ୍କ ସୁରକ୍ଷାକୁ ଗୁରୁତ୍ବ । ହାତୀ ମୃତ୍ୟୁ ରୋକିବ ହ୍ବାଟସ୍ ଆପ୍ ଗ୍ରୁପ । ଗତିବିଧି ଉପରେ ନଜର ରଖିବ ବନ ବିଭାଗ । ହାତୀଙ୍କୁ ଘଉଡ଼ାଇବାକୁ ସ୍ବତନ୍ତ୍ର ରଣନୀତି ପ୍ରସ୍ତୁତ ହୋଇଛି । ହାତୀ- ମଣିଷ ଲଢେଇ ହେଉ କି ଚାଷୀଙ୍କ ବିଦ୍ୟୁତ୍ ତାର କିମ୍ବା ଦାନ୍ତ ତସ୍କରୀ ବା ଟ୍ରେନ୍ ଧକ୍କା, ପ୍ରତିବର୍ଷ ବଲାଙ୍ଗିର ଜିଲ୍ଲାରେ ହାତୀ ମୃତ୍ୟୁ ଖବର ଶୁଣିବାକୁ ମିଳୁଛି । ଏହାକୁ ରୋକିବାକୁ ଏବେ ବନ ବିଭାଗ ପକ୍ଷରୁ ପ୍ରସ୍ତୁତ ହୋଇଛି ସ୍ବତନ୍ତ୍ର ରଣନୀତି । ବିଦ୍ୟୁତ୍, ରେଳ ଓ ବନ ବିଭାଗକୁ ନେଇ ତିଆରି ହୋଇଛି ହ୍ବାଟସ୍ ଆପ୍ ଗ୍ରୁପ୍ । ଏହାଦ୍ବାରା ହାତୀଙ୍କ ଗତିବିଧି ଉପରେ ନଜର ରଖିବାରେ ସହାୟକ ହେବ ବୋଲି ଆଶା କରାଯାଉଛି ।

ଝାଡଖଣ୍ଡ ହାତୀପଲ ସବୁବେଳେ ଜିଲ୍ଲାରେ ଉପଦ୍ରବ କରୁଛନ୍ତି । ପ୍ରତିଦିନ ଜମିରେ ପଶି ଫସଲ ନଷ୍ଟ କରୁଛନ୍ତି ଏହି ଜଙ୍ଗଲୀ ଜନ୍ତୁ । ବନ ବିଭାଗ ସେମାନଙ୍କୁ ଘଉଡାଇବାରେ ସକ୍ଷମ ହେଉ ନଥିବା ସହ ଆବଶ୍ୟକ କ୍ଷତିପୂରଣ ଦେଉ ନଥିବା ଚାଷୀମାନେ ଅଭିଯୋଗ କରିଛନ୍ତି । ସେପଟେ ଏନେଇ ପଦକ୍ଷେପ ନିଆଯାଉଥିବା କହିଛନ୍ତି ବନ ଅଧିକାରୀ । ହାତୀଙ୍କୁ ଘଉଡାଇବା ଓ ସେମାନଙ୍କ ସୁରକ୍ଷା ନେଇ ବନ ବିଭାଗ ନୟାନ୍ତ ଥିବାବେଳେ ଅଞ୍ଚଳରେ ଲୋକଙ୍କ ସହାୟତା ଲୋଡିଛି ପ୍ରଶାସନ ।