ଫେବୃଆରୀ ଏକରେ କେନ୍ଦ୍ର ବଜେଟ୍: ଉତ୍କର୍ଷ ଓଡିଶା କନକ୍ଲେଭ ଦ୍ବାରା ରାଜ୍ୟକୁ ଅଧିକ ଅନୁଦାନ ମିଳିବ କି ?
ଭୁବନେଶ୍ବର: ଆସନ୍ତା ୧ ତାରିଖରେ ଆସିବ କେନ୍ଦ୍ର ବଜେଟ୍ । ତେବେ ରାଜ୍ଯରେ ଶିଳ୍ପ ମହାକୁମ୍ଭ ଉତ୍କର୍ଷ ଓଡିଶା ମେକଇନ ଓଡିଶା କନକ୍ଲେଭ ସରିବା ପରେ ବଜେଟରେ ରାଜ୍ଯକୁ ଅନୁଦାନର ପରିମାଣ କ’ଣ ହେବ ତାହାକୁ ନେଇ ଚର୍ଚ୍ଚା ଆରମ୍ଭ ହୋଇଛି । ବିଗତ ବର୍ଷ ମାନଙ୍କରେ ଓଡିଶା ପ୍ରତି ସବୁବେଳେ ବୈମାତୃକ ମନୋଭାବ ପୋଷଣ କରାଯାଉଥିଲା । ବର୍ତ୍ତମାନ ରାଜ୍ଯକୁ ବିଭିନ୍ନ କ୍ଷେତ୍ରରେ ଅଧିକ ଅନୁଦାନ ଆସିବା ଆଶା ରହିଛି ।
ଆସନ୍ତା ଫେବୃଆରୀ ୧ ତାରିଖରେ ଆସିବ କେନ୍ଦ୍ର ସାଧାରଣ ବଜେଟ । ଏହାକୁ ନେଇ ରାଜ୍ଯରେ ଆରମ୍ଭ ହୋଇଛି ଚର୍ଚ୍ଚା । ବଜେଟର ରୂପରେଖ କ’ଣ ହେବ ? ଓଡିଶା ଏଥିରୁ କ’ଣ ଲାଭ ପାଇବ ? ନା ଗତ ଥର ଭଳି ଏଥର ବି ଅବହେଳାର ଶିକାର ହେବ ? ରାଜ୍ଯରେ ବହୁ ଆଡମ୍ବରରେ ଆୟୋଜିତ ହୋଇଥିବା ଉତ୍କର୍ଷ ଓଡିଶା ମେକ ଇନ ଓଡିଶା କନକ୍ଲେଭ ଦ୍ବାରା ରାଜ୍ଯକୁ ଅଧିକ ଅନୁଦାନ ମିଳିବ କି ? ଏଭଳି ଅନେକ ପ୍ରଶ୍ନ ଏବେ ସାଧାରଣରେ ଉଠିଛି ।
ତେବେ ଏହାରି ମଧ୍ୟରେ ରାଜ୍ଯର ଶିଳ୍ପୋଦ୍ଯୋଗୀମାନେ ଅନେକ ଆଶା ଆଂଶକା ପ୍ରକାଶ କରିଛନ୍ତି । ଏମଏସଏମଇ, କେମିକାଲ ଭଳି ଶିଳ୍ପ ପାଇଁ ଏଠାରେ ପର୍ଯ୍ଯାପ୍ତ ସୁଯୋଗ ରହିଥିବାରୁ ବଜେଟରେ ନୂଆ ଅର୍ଥ ବ୍ଯୟ ବରାଦ କରିବାକୁ ସେମାନେ ମତ ଦେଇଛନ୍ତି । ପୂର୍ବ ବର୍ଷ କିଛି ରାଜ୍ଯରେ ରାଜନୈତିକ ଇକୁଏସନ ପାଇଁ ଓଡିଶାକୁ ହତାଦର କରାଯାଇଥିଲା ବୋଲି ସେମାନେ ଅଭିଯୋଗ କରିଛନ୍ତି । ଚଳିତବର୍ଷ ଏହାର ପୁନରାବୃତ୍ତି କିଭଳି ନହେବ ସେନେଇ ଉଦ୍ଯମ ହେବା ଦରକାର ବୋଲି ମତ ଦେଇଛନ୍ତି ବିଶେଷଜ୍ଞ ।
ଓଡିଶା ଲଗାତାର କେନ୍ଦ୍ରୀୟ ଅବହେଳାର ଶିକାର ହୋଇଆସୁଛି । ରାଜନୈତିକ କାରଣରୁ ରାଜ୍ଯ ତାର ହକ ପାଇ ପାରୁନାହିଁ । ପ୍ରାକୃତିକ ସମ୍ପଦରେ ଓଡିଶା ଭରପୂର ଥିଲେ ବି ନିବେଶକ ଏଠାରେ ନିବେଶ କରିବାକୁ ପସନ୍ଦ କରୁନାହାଁନ୍ତି । ତେଣୁ ଏବେ ଡବଲ ଇଂଜିନର ସରକାର ଆସିଥିବାରୁ କେନ୍ଦ୍ର ସରକାର ଆଉ ଠକି ପାରିବେ ନାହିଁ । ଓଡିଶାକୁ ତାର ପ୍ରାପ୍ଯ ପ୍ରଦାନ କରିବେ । ତେଣୁ ବିଳମ୍ବ ନକରି ତୁରନ୍ତ ଏକ ଆଦିବାସୀ ବିଶ୍ବବିଦ୍ଯାଳୟ ପ୍ରତିଷ୍ଠା କରିବାକୁ ଦାବି ଉଠିଛି । ସୁନ୍ଦରଗଡ କିମ୍ବା କୋରାପୁଟରେ ଏନେଇ ଭିତ୍ତିଭୂମି ପ୍ରତିଷ୍ଠା କରିବାକୁ ଉତ୍କର୍ଷ ଓଡିଶା ମେକଇନ ଓଡିଶା କନକ୍ଲେଭରେ ପ୍ରସ୍ତାବ ଦିଆଯାଇଛି ।
ଗତ ଦୁଇ ଦଶନ୍ଧି ଧରି ଓଡିଶା ରାଜନୈତିକ କାରଣରୁ କେନ୍ଦ୍ରଠାରୁ ସହଯୋଗ ପାଇ ପାରୁନାହିଁ । ତେବେ ବର୍ତ୍ତମାନ ରାଜ୍ଯରେ ଡବଲ ଇଞ୍ଜିନ ସରକାର ଥିବାରୁ କେନ୍ଦ୍ରୀୟ ସହଯୋଗର ପରିମାଣ କେତେ ହେବ ତାହାକୁ ନେଇ ଲାଗି ରହିଛି ଉତ୍ସୁକତା ।
