ମୃତ୍ୟୁ ପରେ କେମିତି ହୁଏ ପାପ ପୂଣ୍ୟର ହିସାବ ?

ଭୁବନେଶ୍ୱର: ମୃତ୍ୟୁ ପରେ ଶରୀର ଆତ୍ମା  କୁଆଡ଼େ ଯାଏ ? କ’ଣ କରେ? ଆତ୍ମାର ଗତି ସ୍ୱର୍ଗକୁ କି ନର୍କକୁ ହୁଏ ? ଏ ସମସ୍ତ ପ୍ରଶ୍ନର ଉତ୍ତର ଆଜି ପର୍ଯ୍ୟନ୍ତ ରହସ୍ୟ ହୋଇ ରହିଛି । ଏହି ସବୁ ରହସ୍ୟରୁ ପରଦା ଉଠାଇଛି ଗରୁଡ଼ ପୁରାଣ । ଗରୁଡ଼ ପୁରାଣରେ କୁହାଯାଇଛି ଯେତେବେଳେ ପ୍ରାଣୀର  ମୃତ୍ୟୁ ହୁଏ ସେହି ସମୟରେ ଯମ ଲୋକରୁ ଦୁଇ ଜଣ ଯମ ଦୂତ ଆସିଥାନ୍ତି । ମୃତ୍ୟୁଶଯ୍ୟାରେ ଥିବା ବ୍ୟକ୍ତିର ଶରୀରରୁ ଆତ୍ମାକୁ ବାହାର କରନ୍ତି ଏବଂ ଗଳାରେ ଫାସ ବାନ୍ଧି ଆତ୍ମାକୁ ନିଜ ସାଥିରେ ଯମଲୋକକୁ ନେଇଯାନ୍ତି । ସନାତନ ଧର୍ମରେ ଶରୀରର ମୃତ୍ୟୁ ହେବାପରେ କର୍ମାନୁସାରେ ଆତ୍ମାର ଗତି  ହୋଇଥାଏ  । ଯେଉଁ ବ୍ୟକ୍ତି ସୁକର୍ମ କରିଥାଏ ସେ ସ୍ୱର୍ଗକୁ ଯାଏ ଏବଂ ଯେ  କୁକର୍ମ କରିଥାଏ ସେ ନର୍କକୁ ଯାଇଥାଏ । ଗରୁଡ଼ ପୁରାଣ ଅନୁସାରେ ମୃତ୍ୟୁ ପରେ ଆତ୍ମାକୁ ସର୍ବ ପ୍ରଥମେ ଯମଲୋକକୁ ନିଆଯାଏ । ଯମଲୋକରେ  ଯମରାଜ ପାପ ପୁଣ୍ୟ ଆଧାରରେ ଆତ୍ମାର ଗତି ନିର୍ଣ୍ଣୟ  କରିଥାନ୍ତି ।

ଗରୁଡ଼ ପୁରାଣରେ ପୁଣ୍ୟତ୍ମାର ମୃତ୍ୟୁ ଯେତେବେଳେ ନିକଟତର ହୁଏ, ବ୍ୟକ୍ତି  କିଛି କହିପାରେ ନାହିଁ । ମୃତ୍ୟୁ ସମୟରେ ତାକୁ ଦିବ୍ୟ ଦୃଷ୍ଟି ଆସେ ଏବଂ ତାକୁ ସାରା  ସଂସାର  ବ୍ରହ୍ମମୟ ଦେଖାଯାଏ । ବ୍ୟକ୍ତି ଜଡ଼ ଅବସ୍ଥାକୁ ଆସିବା  ସମୟରେ  ତା’ର ସମସ୍ତ  ଇନ୍ଦ୍ରିୟ ଶକ୍ତି ନଷ୍ଟ ହୋଇଯାଏ । ଯାହାଫଳରେ ମୁହଁରୁ ଲାଳ ଏବଂ ଝାଳ ବାହାରିଥାଏ । ବ୍ୟକ୍ତି ମୋହ ମାୟା ବନ୍ଧନରୁ ମୁକ୍ତ ହୋଇଥାଏ ଏବଂ ତାକୁ କୈାଣସି କଷ୍ଟ ଜଣା ପଡ଼େନାହିଁ ।

ପାପାତ୍ମା ବ୍ୟକ୍ତିର ମୃତ୍ୟୁ ସର୍ବଦା ଭୟଙ୍କର ହୋଇଥାଏ । ଯମ ଲୋକରୁ ଦୁଇଜଣ ଯମ ଦୂତ ଆତ୍ମାକୁ ନେବା ପାଇଁ ଭୟଙ୍କର ଓ ଭୀଷଣ କ୍ରୋଧରେ ଆସନ୍ତି । ପାପାତ୍ମା ବ୍ୟକ୍ତି ଯମ ଦୂତଙ୍କୁ ଦେଖି ବହୁତ ଡ଼ରି ଯାଏ ଏବଂ ଭୟରେ  ମଳ ମୂତ୍ର  ତ୍ୟାଗ  କରିଦିଏ । ଯମ ଦୂତ ପାପାତ୍ମା ବେକରେ ଫାଶ ଲଗେଇ ଯମ ଲୋକକୁ ଟାଣି ଟାଣି ନେଇଯାନ୍ତି । ପାପାତ୍ମା ଶରୀରରେ ପ୍ରବେଶ କରିବାକୁ ବହୁତ ଚେଷ୍ଟା କରେ କିନ୍ତୁ  ଯମ ଫାଶରେ ବନ୍ଧା ହୋଇଥିବାରୁ ସେ ଆଉ ଶରୀରରେ ପଶି ପାରେ ନାହିଁ  । ପାପାତ୍ମାକୁ ଟାଣି ଟାଣି ଯମ ଲୋକକୁ ନେବା  ସମୟରେ ଯମ ଦୂତ  ନର୍କର ସମସ୍ତ ଦଣ୍ଡ ବିଷୟରେ  କହି ପାପତ୍ମାକୁ ଭୟଭୀତ କରାନ୍ତି । ଏତେ  ଭୟଙ୍କର  ଦୃଶ୍ୟ ଏବଂ କଥା ଶୁଣି ପାପାତ୍ମା  କାନ୍ଦିବାକୁ ଲାଗେ । ବାଟରେ ଅଟକି ଯିବା ସମୟରେ ଯମଦୂତ କୁକୁର ଲଗାଇ ପାପାତ୍ମାକୁ କାମୁଡ଼ାନ୍ତି ଏବଂ ପିଠିରେ ଚାବୁକ ମାରି ତାକୁ ଘୋଷାଡ଼ି ଘୋଷାଡ଼ି ଅନ୍ଧକାରରେ ଯମଲୋକକୁ ନେଇଯାନ୍ତି । ପାପାତ୍ମା ବ୍ୟକ୍ତି ଭୂଲୋକରୁ ଯମଲୋକକୁ ଗତି ବିଷୟରେ ଗରୁଡ଼ ପୁରାଣରେ ବର୍ଣ୍ଣନା କରାଯାଇଛି । ମୃତ୍ୟୁପରେ ଭୂଲୋକରୁ ଯମଲୋକକୁ  ଯାତ୍ରା ୪୭ ଦିନ ଲାଗିଥାଏ । ଏଥିପାଇଁ ଆତ୍ମାକୁ ୧୫ଲକ୍ଷ ୮୪ ହଜାର  କିଲୋମିଟର ଗତି କରିବାକୁ ପଡ଼େ । ପାପାତ୍ମାର ଗତି କରୁଥିବା ରାସ୍ତା ଭୟଙ୍କର ଓ କଷ୍ଟ ଦାୟକ ହୋଇଥାଏ ।

ଗରୁଡ଼ ପୁରାଣ ଅନୁସାରେ ପାପାତ୍ମା  ଯମପୁରରେ ପହଞ୍ଚିବା ପରେ ଯମ ପାପ ପୁଣ୍ୟର ତାଲିକାକୁ ବିଚାର କରନ୍ତି । ଯମ ଦୂତଙ୍କ ଦ୍ଵାରା ଦିଆଯାଇଥିବା ଦଣ୍ଡ ଏବଂ ଯମଲୋକକୁ ଆସୁଥିବା ସମୟରେ ତାର ପଶ୍ଚାତାପକୁ ବିଚାର କରି ତାକୁ ପୁଣି ଥରେ ଘରକୁ ପଠାଇ ଦିଅନ୍ତି । ଘରକୁ ଫେରିବା  ସମୟରେ ପାପାତ୍ମା ପୁଣିଥରେ ଶରୀରରେ ପ୍ରବେଶ କରିବାକୁ ଚେଷ୍ଟା କରେ ହେଲେ ଶରୀର ନଷ୍ଟ ହୋଇଯାଇଥାଏ । ପୁଅ କିମ୍ବା ପରିବାର ଦ୍ଵାରା ପିଣ୍ଡ ଦାନ ଦିଆ ନଗଲେ ପାପାତ୍ମା ପ୍ରେତ ରୂପ ଧାରଣ କରି ବହୁତ ଦିନ ପର୍ଯନ୍ତ ଘୁରି ବୁଲୁଥାଏ । ସେଥିପାଇଁ ମୃତ୍ୟୁର ଦଶ  ଦିନ ପର୍ଯ୍ୟନ୍ତ ପିଣ୍ଡ ଦାନ କରିବା ଆବଶ୍ୟକ । ୧୦ ଦିନ ପିଣ୍ଡଦାନର ଚାରି ଭାଗ ହୁଏ । ପିଣ୍ଡଦାନର ଦୁଇ ଭାଗ ମୃତ୍ୟୁ ଦେହକୁ ଦାନ କରାଯାଏ । ତୃତୀୟ ଭାଗ ଯମଙ୍କୁ ଦିଆଯାଏ । ଚତୁର୍ଥ ଭାଗ ପାପାତ୍ମା ରୂପୀ ପ୍ରେତାତ୍ମାକୁ ଗ୍ରାସ କରିବାକୁ ଦିଆଯାଏ ।

ଗରୁଡ଼ ପୁରାଣ ଅନୁସାରେ ପ୍ରେତକୁ ପ୍ରଥମ ଦିନ ପିଣ୍ଡ ଦାନରେ  ମୁଣ୍ଡ ପ୍ରାପ୍ତି ହୋଇଥାଏ । ଦ୍ୱିତୀୟ  ଦିନରେ ବେକ  ଓ କାନ୍ଧ  ତୃତୀୟ ଦିନରେ ହୃଦୟ ଓ ଚତୁର୍ଥ ଦିନରେ ପିଠି ପଞ୍ଚମ ଦିନରେ ନାଭି ଷଷ୍ଠ ଓ ସପ୍ତମ ଦିନରେ ଅଣ୍ଟା ଓ  ତଳଭାଗ ଅଷ୍ଟମ ଦିନରେ ଗୋଡ଼  ନବମ ଦିନରେ ପୂରା ଶରୀର  ଦଶମ ଦିନରେ ଶରୀରକୁ ବହନ କରିବାର ଶକ୍ତି ପ୍ରଦାନ ହୋଇଥାଏ ତଥା ପ୍ରେତର ଭୋକ ଏବଂ ଶୋଷ ଉତ୍ପନ୍ନ ହୋଇଥାଏ  । ଏଗାର ଓ ବାର ଦିନରେ ପ୍ରେତ ଭୋଜନ କରିଥାଏ । ତେର ଦିନ ଯମ ଦୂତ ପ୍ରେତାତ୍ମାକୁ ମାଙ୍କଡ଼କୁ ଧରିବା ପରି ଧରିପକାନ୍ତି ଏବଂ ୪୭ ଦିନରେ ଯମଲୋକରେ ପହଞ୍ଚାଇଥାନ୍ତି  । ପୁଣ୍ୟ।ତ୍ମା ସର୍ବଦା ଭଗବାନଙ୍କ ଆଶିଷ ଲାଭ କରିଥାଏ । ')}