ଜିନ୍ସ ପିନ୍ଧି ଲୋକସଭା କିମ୍ବା ବିଧାନସଭାକୁ ଗଲେ କ’ଣ ହେବ ?

ଅଜୟ ଦେବଗନ ଓ ବିବେକ ଓବରଏଙ୍କର ଏକ ଫିଲ୍ମ ଥିଲା ‘ୟୁବା’ । ଏଥିରେ ବିଜୟ ପରେ ଏମାନେ ଜିନ୍ସ ଓ ଟି-ସର୍ଟ ପିନ୍ଧି ବିଧାନସଭା ଯାଇଥିବା ଦେଖିବାକୁ ମିଳିଥିଲା। ହେଲେ ଏହା କିନ୍ତୁ କେବଳ ଫିଲ୍ମରେ। ଅସଲ ଜୀବନରେ ଆପଣ କେବେ ଦେଖିଛନ୍ତି କି କେଉଁ ନେତାଙ୍କୁ ଜିନ୍ସ, ଟି-ସର୍ଟରେ ଗୃହରେ ପହଞ୍ଚିବା। କିମ୍ବା କେବେ ସୁଟ-ବୁଟରେ ଗୃହରେ ପ୍ରବେଶ କରିବା? ଆମେ ବୋଧହୁଏ ସବୁବେଳେ ଆମର ନେତାମାନଙ୍କୁ ଧଳା କୁର୍ତ୍ତା-ପାଇଜାମାରେ ଦେଖିଛୁ। କେହି କେହି ଏହାସହ ଚାଦର କିମ୍ବା ଜ୍ୟାକେଟ୍ ବି ପିନ୍ଧନ୍ତି । ନେତାମାନେ ନିଜର ଇମେଜ ହିସାବରେ ଡ୍ରେସ୍ କୋଡ୍ ଅନୁସରଣ କରନ୍ତି। ତେବେ ସତରେ କ’ଣ ଏମିତି କିଛି ଡ୍ରେସ୍ କୋଡ୍ ଅଛି କି? ଜଣେ ନେତା ଗୃହକୁ ଜିନ୍ସ ଟି-ସର୍ଟ ପିନ୍ଧି ଆସେ ତେବେ କ’ଣ ହେବ? ଏ ନେଇ ଲିଖିତ ଆକାରରେ କୌଣସି ନିୟମ ଅଛି କି?  ଆସନ୍ତୁ ଜାଣିବା ଏ ସମ୍ପର୍କରେ।

ନିକଟରେ, ଗୁଜରାଟର ସୋମନାଥ ବିଧାନସଭା କ୍ଷେତ୍ରର ବିଧାୟକ ବିମଲ ଚୁଡ଼ାସମା ଏ ନେଇ ଚର୍ଚ୍ଚାରେ ଅଛନ୍ତି। ସେ ଗତ ସୋମବାର ଜିନ୍ସ, ଟି-ସର୍ଟରେ ପିନ୍ଧି ବିଧାନସଭାରେ ପହଞ୍ଚିଥିଲେ । ଆଉ ଏହାପରେ ବାଚସ୍ପତି ରାଜେନ୍ଦ୍ର ତ୍ରିବେଦି ତାଙ୍କୁ ବିଧାନସଭାରୁ ବାହାର କରିଦେଇଥିଲେ। ଏହି ଖବରକୁ ନେଇ ଚାରିଆଡ଼େ ଚର୍ଚ୍ଚା ହେଉଛି । ତେବେ ବିଧାୟକଙ୍କ କହିବା କଥା ଯେ ଜନତା ତାଙ୍କୁ ଏହି ଜିନ୍ସ ଓ ଟି-ସର୍ଟରେ ହିଁ ପସନ୍ଦ କରିଛନ୍ତି ଏବଂ ଭୋଟ୍ ଦେଇ ବିଧାନସଭା ପଠାଇଛନ୍ତି । ସେ କହିଛନ୍ତି ଯେ ଯଦି ବିଧାନ ସଭାରେ ଏଭଳି ଡ୍ରେସ ପିନ୍ଧି ଆସିବା ମନା ତେବେ ମୋତେ ଏହା ସହ ଜଡ଼ିତ କ’ଣ ଆଇନ ରହିଛି ସେ ବିଷୟରେ କୁହନ୍ତୁ । ତେବେ ଆମେ ଆପଣଙ୍କୁ ଜଣାଇବୁ ଯେ ବିଧାନସଭା ଓ ସଂସଦରେ ଡ୍ରେସକୁ ନେଇ କିଛି ନିୟମ ଅଛି ନା ନାହିଁ।  ହେଲେ ଏହା ପୂର୍ବରୁ ଜାଣିବା…

କ’ଣ ଥିଲା ପୂରା ମାମଲା

ବଜେଟ୍ ଅଧିବେଶନ ଆରମ୍ଭରେ ଗୁଜରାଟ ବିଧାନସଭା ବାଚସ୍ପତି ରାଜେନ୍ଦ୍ର ତ୍ରିବେଦୀ ସମସ୍ତ ବିଧାୟକଙ୍କୁ ଜିନ୍ସ ଏବଂ ଟି-ସର୍ଟ ପରି ପୋଷାକ ନ ପିନ୍ଧିବାକୁ କହିଥିଲେ। ସେ ସଦସ୍ୟମାନଙ୍କୁ ଗୃହର ଗରିମା ଅନୁଯାୟୀ ପୋଷାକ ପିନ୍ଧିବାକୁ କହିଥିଲେ। କିନ୍ତୁ ମାର୍ଚ୍ଚ ୧୫ରେ କଂଗ୍ରେସ ବିଧାୟକ ବିମଲ ଚୁଡାସାମା ଜିନ୍ସ ଏବଂ ଟି-ସାର୍ଟ ପିନ୍ଧି ପହଞ୍ଚିଥିଲେ। ଏହାପରେ ବାଚସ୍ପତି ତାଙ୍କୁ ବାହାରକୁ ଯିବାକୁ କହିଥିଲେ । ହେଲେ ବିଧାୟକ ଏହା ସହ ଜଡ଼ିତ କ’ଣ ଆଇନ ଅଛି ପଚାରିବା ଆରମ୍ଭ କରିଥିଲେ। ନିର୍ଦ୍ଦେଶ ପାଳନ ନକରିବାରୁ ସର୍ଜେଣ୍ଟ ବିଧାୟକଙ୍କୁ ଗୃହରୁ ବାହାର କରିଦେଲେ। ବର୍ତ୍ତମାନ ବିଧାୟକ ଚୁଡ଼ାସାମା କହୁଛନ୍ତି ଯେ ଯଦି ଏହିପରି କିଛି ନିୟମ ଅଛି ତେବେ ଏହା ଉପରେ ଏକ ଆଇନ ପ୍ରସ୍ତୁତ କରାଯିବା ଉଚିତ୍।

ଚୁଡ଼ାସାମା ଆହୁରି କହିଛନ୍ତି ଯେ,  ଭାରତର କୌଣସି ବି ବିଧାନସଭାରେ ଏଭଳି କୌଣସି ନିୟମ ନାହିଁ । ସେ କହିଛନ୍ତି ଯେ ଏହା ଏକବିଂଶ ଶତାବ୍ଦୀ। ଯୁବକମାନେ ଯୁବକମାନେ ଜିନ୍ସ ଟି-ସାର୍ଟ ପିନ୍ଧବେନି ତ କ’ଣ ପିନ୍ଧିବେ? ସେ ଅଭିଯୋଗ କରିଛନ୍ତି ଯେ ବିଜେପି କ୍ୟାବିନେଟ ମିନିଷ୍ଟର ଜୟେଶଭାଇ ରାଦାଡିଆ ୩-୪ ବର୍ଷ ହେଲାଣଇ ଜିନ୍ସ ଏବଂ ଟି-ସାର୍ଟ ପିନ୍ଧି ଆସୁଛନ୍ତି। ସେଦିନ ଆଉ ଜଣେ ବିଜେପି ବିଧାୟକ ହି ଜିନ୍ସ-ଟି-ସାର୍ଟରେ ଗୃହରେ ବସିଥିଲେ। ହେଲେ ତାଙ୍କୁ କିଛି କୁହାଯାଇ ନଥିଲା। ହଠାତ୍ ତାଙ୍କୁ କାହିଁକି ବାଚସ୍ପତି ସମସ୍ତଙ୍କ ସାମ୍ନାରେ ଏମିତି କହିଲେ । ଚୁଡ଼ାସାମା କହିଛନ୍ତି ଯେ ବାଚଷ୍ପତ୍ତି ତାଙ୍କର ଅପମାନ କରିଛନ୍ତି।

ଏମିତି କିଛି ନିୟମ ଅଛି କି?

ତେବେ ଆପଣଙ୍କୁ ଜଣାଇଦେଉଛୁ ଯେ ଆମର ଅନୁସନ୍ଧାନରେ ସେପରି କୌଣସି ସୂଚନା ମିଳିଲା ନାହିଁ ଯାହା ସୂଚାଏ ଯେ ଭାରତରେ ସାଂସଦ କିମ୍ବା ବିଧାୟକଙ୍କ ଡ୍ରେସ କୋଡ୍ ସମ୍ବନ୍ଧରେ କିଛି ନିୟମ ଅଛି, ଯାହାକୁ ସେମାନେ ଅନୁସରଣ କରିବାକୁ ପଡ଼ିବ। କିମ୍ବା କିଛି ବିଶେଷ ପୋଷାକ ପିନ୍ଧିବା ପରେ ହିଁ ଘରକୁ ପ୍ରବେଶ କରିବାର ଅନୁମତି ମିଳିବ।  ହଁ, ଏହା ନିଶ୍ଚିତ ଅଛି ଯେ ପୋଷାକ ସୁନ୍ଦର ଏବଂ ଶାଳିନ ହୋଇଥିବ ଏବଂ ଗୃହର ସମ୍ମାନ ସହିତ ଅନୁରୂପ ହୋଇଥିବ। ଅବଶ୍ୟ ଏଠାରେ କାମ କରୁଥିବା କର୍ମଚାରୀ ଓ ଅଫିସରମାନଙ୍କ ପାଇଁ ଏ ନେଇ କିଛି ନିୟମ ରହିଛି ହେଲେ ଗୃହର ସଦସ୍ୟମାନଙ୍କ ପାଇଁ ଏପରି କିଛି ବି ନିୟମ ନାହିଁ ।