ଦିଦି ଶୁଣିଲେନି କେନ୍ଦ୍ର କଥା; ଅଲପନଙ୍କୁ ପଠାଇଲେନି, ବ୍ୟକ୍ତିଗତ ସଚିବ ଭାବେ ନିଯୁକ୍ତ ଦେଲେ..

କୋଲକାତା: ଦିଦି ଶୁଣିଲେନି ମୋଦିଙ୍କ କଥା । ହଁ ଟିକେ କଥାଟା ଶୁଣିବାକୁ ଖଟକା ଲାଗୁଥିବ ନିଶ୍ଚେ । କିନ୍ତୁ ପ୍ରସଙ୍ଗଟି ଠିକ ସେହିପରି । ଅର୍ଥାତ ପଶ୍ଚିମବଙ୍ଗ ମୁଖ୍ୟ ଶାସନ ସଚିବ ଥିବା ଅଲପନ ବନ୍ଦୋପାଧ୍ୟାୟ ଏବେ ଅବସର ଗ୍ରହଣ କରିଛନ୍ତି । କିଛି ଦିନ ପୂର୍ବେ ତାଙ୍କ କାର୍ଯ୍ୟକାଳ ସରୁଥିବାବେଳେ କେନ୍ଦ୍ରକୁ ଚିଠି ଲେଖି ତାଙ୍କ କାର୍ଯ୍ୟକାଳ ସମୟ ବୃଦ୍ଧି କରିଥିଲେ କେନ୍ଦ୍ର ସରକାର । କୋଭିଡ ସମୟରେ ପଶ୍ଚିମବଙ୍ଗ କଥା ବୁଝୁଥିବା ଏଭଳି ଜଣେ ଅଫିସରକ ଅବସର ଠିକ ନୁହେଁ ବୋଲି ଉଲ୍ଲେଖ କରିଥିଲେ ମୁଖ୍ୟମନ୍ତ୍ରୀ ମମତା ବାନାର୍ଜୀ ।

କିନ୍ତୁ ବାତ୍ୟା ୟାସ ପରେ ପ୍ରଧାନମନ୍ତ୍ରୀଙ୍କ ସମୀକ୍ଷା ବୈଠକରେ ମୁଖ୍ୟମନ୍ତ୍ରୀ ଏବଂ ମୁଖ୍ୟ ଶାସନ ସଚିବଙ୍କ ବିଳମ୍ବ ଉପସ୍ଥିତି ରାଜନୀତିକୁ ତେଜି ଥିଲା । ପରେ କେନ୍ଦ୍ର ସରକାର ଅଲପନ ବନ୍ଦୋପାଧ୍ୟାଙ୍କୁ କେନ୍ଦ୍ରକୁ ଡକରା ଦେଇଥିଲେ । ଏପଟେ ଅଲପନକୁ ନିଜ ରାଜ୍ୟରୁ ନଛାଡିବାକୁ ଦୃଢ ବିରୋଧ ଜାରି ରଖିଥିଲେ ମୁଖ୍ୟମନ୍ତ୍ରୀ ମମତା ବାନାର୍ଜୀ । କିନ୍ତୁ ଏହାରି ଭିତରେ ମୁଖ୍ୟ ଶାସନ ସଚିବ ଦାୟିତ୍ୱରେ ଥିବା ଅଧିକାରୀ ନିଜେ ସ୍ବେଚ୍ଛାକୃତ ଭାବେ ଅବସର ଗ୍ରହଣ କରିଛନ୍ତି ।

ଏବଂ ଅବସର ଗ୍ରହଣ କରିବା ପରେ ମମତା ବାନାର୍ଜୀ ତାଙ୍କୁ ନିଜ ବ୍ୟକ୍ତିଗତ ପରାମର୍ଶଦାତା ଭାବେ ନିଯୁକ୍ତ କରିଥିବା ଜଣାପଡିଛି  । ମୋଦି ଦିଦିଙ୍କ ଲଢେଇ ଭିତରେ ଆଇଏଏସ ଅଫିସର ଅଲପାନ ବନ୍ଦୋପାଧ୍ୟାୟ ଏବେ ନୂଆ ଟ୍ୱିଷ୍ଟ ଯୋଡିଛନ୍ତି  ।  ସେପଟେ ମମତା ବାନାର୍ଜୀ କେନ୍ଦ୍ରକୁ ଚିଠି ଲେଖି ଜଣାଇଛନ୍ତି ଯେ,  ଏହି ନିଷ୍ପତ୍ତି ସମ୍ପର୍କରେ କେନ୍ଦ୍ର ସରକାର ରାଜ୍ୟ ସହିତ ପରାମର୍ଶ କରି ନାହାନ୍ତି। ଏହା ଏକ ସମ୍ପୂର୍ଣ୍ଣ ଏକପାଖିଆ ଏବଂ ଅପ୍ରତ୍ୟାଶିତ ନିଷ୍ପତ୍ତି। ଗୋଟିଏ ପଟେ କରୋନା ସଙ୍କଟ ଏବଂ ଅନ୍ୟ ପଟେ ୟାସ ଘୂର୍ଣ୍ଣିବଳୟ ଯୋଗୁଁ ପଶ୍ଚିମବଙ୍ଗ ପାଇଁ ଏହା ଏକ କଷ୍ଟକର ସମୟ। ତେଣୁ ଏଭଳି ସ୍ଥିତିରେ କେନ୍ଦ୍ରକୁ ଡାକିବା ନିହାତି ପକ୍ଷେ ରାଜନୀତି ପ୍ରଣୋଦିତ ବୋଲି ଅଭିଯୋଗ ଆଣିଥିଲେ ମମତା  ।