ରାଜ୍ୟରେ ଦୁର୍ବଳ ହେଲା ଦକ୍ଷିଣ-ପଶ୍ଚିମ ମୌସୁମୀ ବାୟୁ

ଭୁବନେଶ୍ୱର: ରାଜ୍ୟରେ ଦୁର୍ବଳ ହେଲା ଦକ୍ଷିଣ-ପଶ୍ଚିମ ମୌସୁମୀ ବାୟୁ। ଲଗାତାର ୩ ଦିନ ହେବ କମିଲା ବର୍ଷାର ପରିମାଣ । ମୌସୁମୀ ଜନିତ ନିମ୍ନ ଚାପ ରେଖା ସ୍ବାଭାବିକ ଅବସ୍ଥିତିଠାରୁ ଉତ୍ତରରେ ରହୁଛି। ଯାହାର ପ୍ରଭାବରେ ରାଜ୍ୟରେ ମୌସୁମୀ ଦୁର୍ବଳ ହୋଇଛି। ଏହାଦ୍ବାରା ଦୁଇ ଦିନ ହେବ ଦିନ ତାପମାତ୍ରାରେ ବୃଦ୍ଧି ହୋଇଛି ।

ତେବେ ଜଳୀୟବାଷ୍ପ ଉତ୍ତପ୍ତ ବାୟୁମଣ୍ଡଳ ସଂସ୍ପର୍ଶରେ ଆସିବାରୁ ବଜ୍ରପାତ ଆଶଙ୍କା ରହିଛି । କେତେକ ଅଞ୍ଚଳରେ ବିଜୁଳି ଘଡଘଡି ସହ ବର୍ଷା ନେଇ ସତର୍କତା ଜାରି କରିଛି ପାଣିପାଗ କେନ୍ଦ୍ର। ଏଥିପାଇଁ ଆଜି ୧୭ ଜିଲ୍ଲାକୁ ୟେଲୋ ଆଲର୍ଟ ଜାରି କରାଯାଇଛି। ସେପଟେ ଜୁନ ୧ ତାରିଖରୁ ଆଜି ପର୍ଯ୍ୟନ୍ତ ସ୍ବାଭାବିକ ଠାରୁ ୩ ପ୍ରତିଶତ ନିଅଣ୍ଟିଆ ବର୍ଷା ରେକର୍ଡ ହୋଇଛି ।

ସୂଚନା ଅନୁସାରେ ଗତ ୨୮ ତାରିଖରେ ୧ଦଶମିକ୧ ମିମି ବର୍ଷା ରେକର୍ଡ ହୋଇଛି । ଯାହାକି ସ୍ବାଭାବିକ ବର୍ଷା ତୁଳନାରେ 92% କମ । ୨୭ ଜୁଲାଇରେ ୩ଦଶମିକ ୧ ମିମି ବର୍ଷା ରେକର୍ଡ ହୋଇଛି ଯାହାକି ସ୍ବାଭାବିକଠାରୁ ୭୫ ପ୍ରତିଶତ କମ। ସେହିପରି ୨୬ ଜୁଲାଇରେ ୫ ଦଶମିକ ୫ ମିମି ବର୍ଷା ରେକର୍ଡ ହୋଇଛି ।