ଆମେରିକାକୁ ଡେନମାର୍କର ଖୋଲା ଚେତାବନୀ, ଆକ୍ରମଣକୁ ବରଦାସ୍ତ କରିବୁନି
ନନ୍ଦିଘୋଷ ବ୍ୟୁରୋ: ଆମେରିକାକୁ ଡେନମାର୍କର ଖୋଲା ଚେତାବନୀ । ଯଦି ଗ୍ରୀନଲ୍ୟାଣ୍ଡ ଉପରେ ଆମେରିକା ଆକ୍ରମଣ କରେ ତେବେ ଏହାର ସୁରକ୍ଷା ଲାଗି ଡେନମାର୍କ ଆଗେଇ ଆସିବ ବୋଲି କହିଛନ୍ତି ସାଂସଦ ତଥା ଦେଶର ପ୍ରତିରକ୍ଷା କମିଟି ଅଧ୍ୟକ୍ଷ ରାସମସ ଜାର୍ଲୋଭ। ସେ କହିଛନ୍ତି, ଯଦିଓ ଆମେରିକା ସହ ଡେନମାର୍କ ସୈନ୍ୟ ଟକ୍କର ଦେବାକୁ ସକ୍ଷମ ହେବେ ନାହିଁ ତଥାପି ଆମେରିକାର ଆକ୍ରମଣକୁ ବରଦାସ୍ତ କରାଯିବ ନାହିଁ ।
ସେ ଆଗକୁ କହିଛନ୍ତି, ସାମରିକ ଭାବେ ଡେନମାର୍କ ଉପରେ ଆକ୍ରମଣକୁ ଗ୍ରହଣ କରାଯିବ ନାହିଁ । ଯଦି ଏହା ଘଟେ ତେବେ ନାଟୋ ମେଣ୍ଟରେ ଥିବା ଦୁଇ ରାଷ୍ଟ୍ର ମଧ୍ୟରେ ଯୁଦ୍ଧ ଘଟିବ ଯାହା ବିପର୍ଯ୍ୟୟ ସୃଷ୍ଟି କରିବ । ଗ୍ରୀନଲ୍ୟାଣ୍ଡରେ ଆମେରିକାର ପ୍ରବେଶ ଘଟି ସାରିଛି । ତେଣୁ ଗ୍ରୀନଲ୍ୟାଣ୍ଡ ଉପରେ ଆକ୍ରମଣ କରିବାର କୌଣସି ମାନେ ନାହିଁ । ଗ୍ରୀନଲ୍ୟାଣ୍ଡ ବିକ୍ରି ଲାଗି ଉଦ୍ଦିଷ୍ଟ ନୁହେଁ । ଆମେରିକୀୟ ହେବାକୁ ଆମେ ୫୭ ହଜାର ଡେନମାର୍କ ନାଗରିକଙ୍କୁ ବିକ୍ରି କରିପାରିବୁ ନାହିଁ ।
ସେପଟେ ଯଦି ଗ୍ରୀନଲ୍ୟାଣ୍ଡକୁ ନେବା ଲାଗି ଆକ୍ରମଣ କରାଯାଏ ତେବେ ସେଠାରେ ୭୬ ବର୍ଷ ଧରି ଚାଲିଥିବା ପାଶ୍ଚାତ୍ୟ ସାମରିକ ଆଧିପତ୍ୟର ବିଲୋପ ଘଟିବ ବୋଲି ଚେତାବନୀ ଦେଇଛନ୍ତି ଡେନମାର୍କ ପ୍ରଧାନମନ୍ତ୍ରୀ ମେଟ୍ଟେ ଫ୍ରେଡେରିକସନ ।
