ନେପାଳରେ ଶିବଙ୍କ ବିଶାଳ ପ୍ରତିମୂର୍ତ୍ତି, ଜମୁଛି ଶ୍ରଦ୍ଧାଳୁଙ୍କ ଭିଡ଼

କାଠମାଣ୍ଡୁ: ଆଜି ପବିତ୍ର ଏକାଦଶୀ। ଆଉ ଆଜିର ଦିନରୁ ଆରମ୍ଭ ହୋଇଛି ଶିବରାତ୍ରିର ପ୍ରଥମ ପୂଜା। ନେପାଳ କାଠମାଣ୍ଡୁର ଆରାଧ୍ୟ ଦେବତା ପ୍ରଭୁ ଶ୍ରୀପଶୁପତିନାଥଙ୍କ ପୀଠରେ ଆରମ୍ଭ ହୋଇଛି ଶିବରାତ୍ରୀର ପ୍ରଥମ ପୂଜା। ଯେଉଁଠି ଶତାଧିକ ନାଗା ବାବା ସାମିଲ ହୋଇଛନ୍ତି। ବିଧି ଅନୁଯାୟୀ ଆଜି ଏକାଦଶୀ ଠାରୁ ଏଠାରେ ଆରମ୍ଭ ହୁଏ ଶିବରାତ୍ରିର ପ୍ରଥମ ପୂଜା । ଯାହା କେବଳ ନାଗା ବାବା ସାଧୁଙ୍କ ଦ୍ବାରା କରାଯାଇଥାଏ।

ପ୍ରଥମେ ମନ୍ଦିର ଭିତରେ ପଶି ନାଗା ବାବା ମାନେ ସ୍ବତନ୍ତ୍ର ପୂଜାର୍ଚ୍ଚନା କରିବା ପରେ ଏକ ବିଶାଳ ଶୋଭାଯାତ୍ରାରେ ସାମିଲ ହୋଇଥିଲେ। ଏହାସହ ନେପାଳ ଆର୍ମି ବ୍ୟାଣ୍ଡ, ନେପାଳ ସୁରକ୍ଷା କର୍ମୀଙ୍କ ସହ ବହୁ ଅନୁଷ୍ଠାନର କର୍ମକର୍ତ୍ତା ଓ ଛାତ୍ର ଛାତ୍ରୀ ଏହି ଶୋଭାଯାତ୍ରାରେ ସାମିଲ ହୋଇଛନ୍ତି।

ସୂଚନାଯୋଗ୍ୟ, ନେପାଳର ଭକ୍ତପୁର ଜିଲ୍ଲା ସୂର୍ଯ୍ୟ ବିନାୟକ ନିକଟ ପାହାଡ ଉପରେ ରହିଛି ବିଶାଳ ଷ୍ଟାଡିଂ ଶିବ ଷ୍ଟାଚୁ। ଏହା ନେପାଳ ରାଜଧାନୀ କାଠମାଣ୍ଡୁଠାରୁ ୨୦ କିଲୋମିଟର ଦୂରରେ ଅବସ୍ଥିତ। ୨୦୦୩ରେ ଆରମ୍ଭ ହୋଇଥିବା ଏହି ଷ୍ଟାଚୁ କାମ ୨୦୧୧ରେ ଶେଷ ହୋଇଥିଲା। ଏହାର ମୂଳଦୁଆକୁ ମଜଭୁତ କରିବା ପାଇଁ ୧୦୦ ଫୁଟ ତଳକୁ ଖୋଳା ଯାଇଛି। ମୂର୍ତ୍ତିର ଉଚ୍ଚତା ୧୪୩ ଫୁଟ। ହିଲିଟେକ୍ ନାମକ ଏକ କମ୍ପାନୀ ଏହି ମୂର୍ତ୍ତିକୁ ଗଢ଼ିଛି। ପ୍ରତିଦିନ ଏଠାରେ ୫୦୦୦ ଭକ୍ତଙ୍କ ସମାଗମ ହୁଏ।