‘ଯୁଦ୍ଧ ଶେଷ, ଏବେ ଶାନ୍ତିପୂର୍ଣ୍ଣ ସହାବସ୍ଥାନ’: ତାଲିବାନ ମୁଖପାତ୍ର ମହମ୍ମଦ ନଇମ୍

କାବୁଲ୍: ଆଫଗାନିସ୍ତାନରେ ଯୁଦ୍ଧ ଶେଷ ହୋଇଛି । ଏବେ ଆନ୍ତର୍ଜାତିକ ସମୁଦାୟ ସହ ଶାନ୍ତିପୂଣ୍ଣ ସହାବସ୍ଥାନ ପାଇଁ ଚିନ୍ତା କରୁଛି ତାଲିବାନ୍। କାବୁଲ୍ ଅକ୍ତିଆର ପରେ ତାଲିବାନ ମୁଖପାତ୍ର ମହମ୍ମଦ ନଇମ୍ ଅଲଜଜୀରା ଟେଲିଭିଜନକୁ ଦେଇଥିବା ଏକ ସାକ୍ଷାତକାରରେ ଏହି ସୂଚନା ଦେଇଛନ୍ତି। ସେ କହିଛନ୍ତି, ତାଲିବାନ କିପରି ଆଫଗାନିସ୍ତାନକୁ ଶାସନ କରିବ ତାହା ଅଳ୍ପ କିଛିଦିନ ମଧ୍ୟରେ ସ୍ତିର ହେବ। ଏହି ରୂପ ରେଖ ସମସ୍ତଙ୍କୁ ଜଣାଇଦିଆଯିବ। କିନ୍ତୁ ଆନ୍ତର୍ଜାତୀୟ ସମୁଦାୟ ଏଥିରେ କୌଣସି ଭାବେ ଆତଙ୍କିତ ହେବା ଅନୁଚିତ । ତାଲିବାନ କଦାପି ବିଶ୍ବ ସମୁଦାୟଠାରୁ ଅଲଗା ହୋଇ ରହିବାକୁ ଚାହେଁ ନାହିଁ ।

କାବୁଲରୁ ଆଫଗାନ ସେନା ଛତ୍ରଭଙ୍ଗ ଦେବା ପରେ ତାଲିବାନ୍ କାବୁଲକୁ ଅକ୍ତିଆର କରିଥିଲେ। ଏହି ସମୟରେ କୌଣସି ଗୁଳିକାଣ୍ଡ ବା ବିସ୍ଫୋରଣ ହୋଇ ନଥିଲା । ରାଷ୍ଟ୍ରପତି ପ୍ରାସାଦକୁ ଦଖଲ କରିବା ଅବ୍ୟବହିତ ପୂର୍ବରୁ ଏହାର ନିର୍ବାଚିତ ରାଷ୍ଟ୍ରପତି ନିଜର ପରିବାର ଓ ସହଯୋଗୀଙ୍କ ସହ କାବୁଲ୍ ଛାଡ଼ି କାଜାଗିସ୍ତାନ ପ୍ରସ୍ଥାନ କରିଥିଲେ। ଏପରିକି ଆଫଗାନିସ୍ତାନ ସରକାରଙ୍କ ମୁଖପାତ୍ର ତାଙ୍କୁ ପୂର୍ବତନ ରାଷ୍ଟ୍ରପତି ବୋଲି  ସମ୍ବୋଧନ କରିଥିଲେ । ଯୁକ୍ତ ରାଷ୍ଟ୍ର ଆମେରିକା ତାଲିବାନର ଏହି କ୍ଷୀପ୍ର ଅଧିଗ୍ରହଣକୁ ଆକଳନ ବାହାରେ ବୋଲି ଅଭିହିତ କରିଛି । ୱାସିଂଟନ ତାଲିବାନ ଅଧିଗ୍ରହଣ ଆଉ ୩ ମାସ ପରେ ହେବ ବୋଲି ଚିନ୍ତା କରିଥିଲେ । ଏହାର ଗୁଇନ୍ଦା ତଥ୍ୟକୁ ଆଧାର କରି ଆମେରିକା ତାହାର ନିୟୋଜିତ ସୈନ୍ୟଙ୍କୁ ଅପସାରଣ କରିବାକୁ ଯୋଜନା ଆରମ୍ଭ କରିଥିଲା। ହେଲେ ଅପସାରଣ ଶେଷ ନ ହେଉଣୁ କାବୁଲ୍ ଅଧଗ୍ରହଣ ଶେଷ କରିଛି ।

ଆଫଗାନିସ୍ତାନରେ ମାନବାଧିକାର ଉଲ୍ଲଙ୍ଘନ ଓ ମହିଳାଙ୍କ ସ୍ୱାଧୀନତା ନେଇ ଆନ୍ତର୍ଜାତୀୟ ସମୁଦାୟ ଆପତ୍ତି ଉଠାଇଛନ୍ତି । ତାଲିବାନ ଶାସନ ସମୟରେ ଏହି ଅବସ୍ଥା ଆହୁରି ସାଂଘାତିକ ହେବ ବୋଲି ଆଶଙ୍କା ପ୍ରକାଶ ପାଇଛି । କିନ୍ତୁ ନଇମ କହିଛନ୍ତି ସାରୀୟ ଆଇନ୍ ଅନୁସାରେ ମହିଳାଙ୍କ ସ୍ୱାଧୀନତା ଓ ସୁରକ୍ଷାକୁ ଗୁରୁତ୍ୱ ଦେବ ତାଲିବାନ ।