ଆଇପିଏଲ୍ ପୂର୍ବରୁ ଷ୍ଟାଡ଼ିୟମରେ ପଶିଲା କରୋନା
ମୁମ୍ବାଇ: ଆଉମାତ୍ର ଦିନ କେଇଟା ପରେ ଆରମ୍ଭ ହେବ କ୍ରିକେଟ ମହାକୁମ୍ଭ ଆଇପିଏଲ୍ ସିଜିନେ ୧୪ । ଏଥିପାଇଁ ପ୍ରସ୍ତୁତି ମଧ୍ୟ ଶେଷ ପର୍ଯ୍ୟାୟରେ ପହଞ୍ଚିଛି । ହେଲେ ଏହା ପୂର୍ବରୁ ଷ୍ଟାଡିୟମ ଭିତରେ ବି କୋରନା କାୟା ମେଲାଇବା ଆରମ୍ଭ କଲାଣି । ମୁମ୍ବାଇର ୱାଙ୍ଖେଡ଼େ ଷ୍ଟାଡିୟମର ୮ ଜଣ ଗ୍ରାଉଣ୍ଡଷ୍ଟାଫ କରୋନା ସଂକ୍ରମିତ ହୋଇଛନ୍ତି । ତେବେ ଏହାପରେ ଟୁର୍ଣ୍ଣାମେଟକୁ ନେଇ ଚିନ୍ତା ବଡ଼ିଛି।
ସୂଚନା ଅନୁଯାୟୀ, ଗତ ସପ୍ତାହରେ ୱାଙ୍ଖଡ଼େ ଷ୍ଟାଡିୟମର ୧୯ ଜଣ ଗ୍ରାଉଣ୍ଡ ଷ୍ଟାଫଙ୍କ କରୋନା ଟେଷ୍ଟ ହୋଇଥିଲା। ଏଥିରୁ ଗତ ୨୬ ତାରିଖରେ ୩ ଜଣଙ୍କ ରିପୋର୍ଟ ପଜିଟିଭ ଆସିଥିଲା। ଏହାପରେ ଏପ୍ରିଲ ୧ ତାରିଖ ଆଉ ୫ଜଣଙ୍କ ରିପୋର୍ଟ ପଜିଟିଭ ଆସିଥିବା ନେଇ ସୂଚନା ମିଳିଛି।
ଆସନ୍ତା ୯ ତାରିଖଦିନ ଆଇପିଏଲର ପ୍ରଥମ ମ୍ୟାଚ୍ ଚେନ୍ନାଇରେ ଖେଳାଯିବ । ପ୍ରଥମ ମୁକାବିଲା ରୟାଲ୍ ଚ୍ୟାଲେଞ୍ଜର ବ୍ୟାଙ୍ଗଲୋର ଓ ମୁମ୍ବାଇ ଇଣ୍ଡିଆନ୍ସ ମଧ୍ୟରେ ଦେଖିବାକୁ ମିଳିବ। ହେଲେ ଚେନ୍ନାଇ ସୁପର କିଙ୍ଗସ୍ ଓ ଦିଲ୍ଲୀ କ୍ୟାପିଟାଲ୍ସରେ ମଧ୍ୟରେ ହେବାକୁ ଥିବା ଦ୍ୱିତୀୟ ଆଇପିଏଲ୍ ମ୍ୟାଚ୍ ମୁମ୍ବାଇରେ ହିଁ ଖେଳାଯିବ । ତେବେ ଏଭଳି ସ୍ଥିତିରେ ଷ୍ଟାଡିୟମରେ କରୋନା ପଶିବାରୁ ବିସିସିଆଇର ଚିନ୍ତା ବଢ଼ିଛି। ତେବେ ଏହି ଷ୍ଟାଡିୟମର ସମସ୍ତ ପ୍ରବେଶ ଦ୍ୱାରକୁ ସିଲ୍ କରି ମ୍ୟାଚ୍ ଖେଳାଯିବାକୁ ଯୋଜନା ଚାଲିଛି।
ସେପଟେ ମୁମ୍ବାଇରେ ବଢ଼ୁଥିବା କରୋନା ମାମଲାକୁ ଦୃଷ୍ଟିରେ ରଖି ମୁମ୍ବାଇ କ୍ରିକେଟ ଆସୋସିଏସନ୍ ଆଇପିଏଲ୍କୁ ନେଇ ବ୍ୟାପକ ପ୍ରସ୍ତୁତି କରିଛି ଏବଂ ଅତି କମ୍ ଗ୍ରାଉଣ୍ଡ ଷ୍ଟାଫ୍ଙ୍କୁ ଷ୍ଟାଡିୟମରେ ରଖିବା ପାଇଁ ଯୋଜନା କରିଛି।
