ତେଲେଙ୍ଗାନା ବିଧାନସଭା ନିର୍ବାଚନର ଆଜି ମତଦାନ, ସକାଳୁ ଚାଲିଛି ଭୋଟିଂ

ହାଇଦ୍ରାବାଦ: ଆଜି ତେଲେଙ୍ଗାନାରେ ବିଧାନସଭା ନିର୍ବାଚନର ମତଦାନ । ୧୧୯ଟି ଆସନରେ ଆରମ୍ଭ ହୋଇଛି ଭୋଟିଂ । ସଂଧ୍ୟା ୫ଟା ପର୍ଯ୍ୟନ୍ତ ଚାଲିବ ମତଦାନ । ରାଜ୍ୟରେ ୩୫ ହଜାର ୬୫୫ ପୋଲିଂ ବୁଥରେ ମତଦାନ ହେବ । ୩ କୋଟି ୨୬ ଲକ୍ଷ ଭୋଟର ଭୋଟ ଦେବେ  । ମଇଦାନରେ ଅଛନ୍ତି ୨ ହଜାର ୨୯୦ ପ୍ରାର୍ଥୀ । ୧୬ଟି ମାଓ ପ୍ରଭାବିତ ଅଞ୍ଚଳରେ ଅପରାହ୍ନ ୪ଟା ପର୍ଯ୍ୟନ୍ତ ମତଦାନ ହେବ ।

ମୁଖ୍ୟମନ୍ତ୍ରୀ କେସି ରାଓଙ୍କ ସହ ହାଇପ୍ରୋଫାଇଲ ନେତାଙ୍କ ଭାଗ୍ୟ ପରୀକ୍ଷା ହେବ । କେସି ରାଓ ଦୁଇଟି ଆସନ ଗାଜଓ୍ବେଲ ଓ କାମାରେଡ୍ଡିରୁ ବିଧାନସଭା ନିର୍ବାଚନ ଲଢୁଛନ୍ତି । ରାଜ୍ୟ କଂଗ୍ରେସ ସଭାପତି ରେଭାନ୍ତ ରେଡ୍ଡି, ବିଜେପିର ଲୋକସଭା ସାଂସଦ ବନ୍ଦି ସଞ୍ଜୟ କୁମାର ମଧ୍ୟ ନିର୍ବାଚନ ଲଢୁଛନ୍ତି । କାମାରେଡ୍ଡିରୁ କେସି ରାଓଙ୍କୁ ଟକ୍କର ଦେବେ ରାଜ୍ୟ କଂଗ୍ରେସ ସଭାପତି ରେଭାନ୍ତ ରେଡ୍ଡି । ଗାଜଓ୍ବେଲରୁ ବିଜେପି ଇଟାଲା ରାଜେନ୍ଦ୍ର କେସି ରାଓଙ୍କୁ ଟକ୍କର ଦେବେ ।  ଶାସକ ଦଳ ବିଆରଏସ ସମସ୍ତ ୧୧୯ଟି ଯାକ ଆସନରେ ନିର୍ବାଚନ ଲଢୁଛି । ବିଜେପି ସହ ଚର୍ଚ୍ଚିତ ଫିଲ୍ମଷ୍ଟାର ପଓ୍ବନ କଲ୍ୟାଣଙ୍କ ପାର୍ଟି ଜନସେନା ମିଶି ନିର୍ବାଚନ ଲଢୁଛନ୍ତି । ବିଜେପି ୧୧୧ଟି ଆସନରେ ଲଢୁଥିବା ବେଳେ ବାକି ୮ଟିରେ ପଓ୍ବନ କଲ୍ୟାଣଙ୍କ ପାର୍ଟି ନିର୍ବାଚନ ଲଢିବ ।

କଂଗ୍ରେସ ୧୧୮ଟି ଆସନରେ ଲଢୁଥିବା ବେଳେ ସହଯୋଗୀ ଦଳ ସିପିଆଇ ଗୋଟିଏ ଆସନରେ ଲଢିବ । ଅସଦ୍ଦୁଦିନ ଓ୍ବଓ୍ବେସି ସହରାଞ୍ଚଳରେ ଥିବା ୯ଟି ଆସନରେ ନିର୍ବାଚନ ଲଢୁଛନ୍ତି । ବିଆରଏସ ତୃତୀୟ ଥର ପାଇଁ ସରକାର ଗଢିବାକୁ ପ୍ରୟାସ ଜୋରଦାର କରିଥିବା ବେଳେ କଂଗ୍ରେସ କ୍ଷମତାକୁ ଆସିବାକୁ ସବୁ ରଣନୀତି ଆପଣେଇଛି  । ତେବେ ବିଜେପି ମଧ୍ୟ ପଛରେ ପଡ଼ିନାହିଁ ।