ବୀରମିତ୍ରପୁର ନାବାଳିକା ଗଣଦୁଷ୍କର୍ମ ପ୍ରସଙ୍ଗ: ପୀଡିତା ଫେରାର୍

ରାଉରକେଲା: ବୀରମିତ୍ରପୁର ନାବାଳିକା ଗଣ ଦୁଷ୍କର୍ମ ଘଟଣାର ପୀଡିତା ଏବେ ଏସ ଓ ଏସ ଭିଲେଜରୁ ଫେରାର ହୋଇଛନ୍ତି । ଦୁଷ୍କର୍ମ ଘଟଣା ସାମ୍ନାକୁ ଆସିବା ପରେ ପୀଡିତାଙ୍କୁ ଏସ ଓ ଏସ ଭିଲେଜରେ ରଖାଯାଇଥିଲା । ତେବେ ଆଜି ତାଙ୍କର ଦେଖା ମିଳିନଥିଲା । ପୋଲିସ ସୂଚନା ପାଇ ପ୍ରଥମେ ଘଟଣାସ୍ଥଳରେ ପହଞ୍ଚିବା ପରେ ଏବେ ନାବାଳିକାଙ୍କୁ ଠାବ କରିବା ପାଇଁ ଉଦ୍ୟମ ଜାରି ରଖିଛି ।
ଉଲ୍ଲେଖଯୋଗ୍ୟ ଯେ, ବୀରମିତ୍ରପୁର ନାବାଳିକା ଦୁଷ୍କର୍ମ ଓ ଗର୍ଭପାତ କରାଇବା ଘଟଣା ସାମ୍ନାକୁ ଆସିବା ପରେ ରାଜ୍ୟ ପୋଲିସ ତତ୍ପରତା ଦେଖାଇଥିଲେ । କ୍ରାଇମବ୍ରାଞ୍ଚକୁ ତଦନ୍ତ ଦାୟିତ୍ୱ ମିଳିଥିବା ବେଳେ ଦୁଷ୍କର୍ମର ମୁଖ୍ୟ ଅଭିଯୁକ୍ତ ଥାନା ଅଧିକାରୀ ଆନନ୍ଦ ମାଝୀଙ୍କୁ ଚାକିରୀରୁ ବହିଷ୍କାର କରାଯାଇଥିଲା । ପରେ ତାଙ୍କୁ ପୋକ୍ସୋ କୋର୍ଟରେ ହାଜର କରାଇ କାର୍ଯ୍ୟାନୁଷ୍ଠାନ ମଧ୍ୟ ନିଆଯାଇଥିଲା ।