ଛେଳି ଚରାଉଥିବା ବେଳେ ନାବାଳିକାଙ୍କୁ ଅପହରଣ ଉଦ୍ୟମ ଅଭିଯୋଗ, ଛେଚା ଖାଇଲେ ଯୁବକ
ଭବାନୀପାଟଣା: ଛେଳି ଚରାଉଥିବା ବେଳେ ନାବାଳିକାଙ୍କୁ ଅପହରଣ ଅଭିଯୋଗ । ଯୁବକଙ୍କୁ ଧରି ଛେଚିଲେ ଗ୍ରାମବାସୀ । କଳାହାଣ୍ଡି ଜିଲ୍ଲା ବିଶ୍ୱନାଥପୁର ଥାନା ଅଞ୍ଚଳରେ ଘଟିଛି ଏଭଳି ଘଟଣା । ନାବାଳିକା ଅପହରଣ ଅଭିଯୋଗରେ ଜଣେ କ୍ରସର କର୍ମଚାରୀଙ୍କୁ ଅଟକ ରଖିଛି ବିଶ୍ୱନାଥପୁର ପୋଲିସ । ଜଣେ ୧୧ ବର୍ଷିଆ ନାବାଳିକା ଆଜି ନିଜ ଗାଁ ନିକଟରେ ଛେଳି ଚରାଉଥିଲେ । ସେହି ସମୟରେ ପୋଖରୀବନ୍ଧସ୍ଥିତ ରାଧେଶ୍ୟାମ ଅଗ୍ରୱାଲଙ୍କ ଷ୍ଟୋନ୍ କ୍ରସରର ଜଣେ କର୍ମଚାରୀ ନାବାଳିକାଙ୍କୁ ଅପହରଣ ଉଦ୍ୟମ କରିଥିବା ଅଭିଯୋଗ ହୋଇଛି ।
ଚିତ୍କାର ଶୁଣି ପାଖ ଜଙ୍ଗଲରେ କାଠ କାଟୁଥିବା ନାବାଳିକାର ବାପା ପହଞ୍ଚି ଅଭିଯୁକ୍ତ ବିହାର ରାଜ୍ୟର ବୁଧାମ ସାହାଣୀକୁ ଧରିଥିଲେ । ପରେ ଗାଁ ଲୋକଙ୍କୁ ଡାକ ପକାଇ ବୁଧାମଙ୍କୁ ନିର୍ଧୁମ୍ ମାଡ଼ ମାରିବା ସହ ବିଶ୍ୱନାଥପୁର ପୋଲିସକୁ ଖବର ଦେଇଥିଲେ । ପୋଲିସ ପହଞ୍ଚି ଲୋକଙ୍କ କବଳରୁ ବୁଧାମକୁ ଉଦ୍ଧାର କରିଛି । ନାବାଳିକାଙ୍କ ବାପାଙ୍କ ଅଭିଯୋଗକୁ ଆଧାର କରି ପୋଲିସ ଏକ ମାମଲା ରୁଜୁ କରିବା ସହିତ ତଦନ୍ତ କରୁଛି ।
