ଅଧ୍ୟାପକଙ୍କ ଘରେ ରେଡରୁ ମିଳିଲା ୪ କେଜିର ଗହଣା, ନଗଦ ୩୧ ଲକ୍ଷ ୫୦ ହଜାର ଟଙ୍କା
ଗଜପତି: ଗଞ୍ଜାମର କୋଟିପତି ହିନ୍ଦୀ ଶିକ୍ଷକଙ୍କ ପରେ ଭିଜିଲାନ୍ସ ଜାଲରେ ଗଜପତିର କୋଟିପତି ଅଧ୍ୟାପକ । ରେଡ୍ ବେଳେ ଟେରା ହୋଇଗଲା ଭିଜିଲାନ୍ସ ଟିମ୍ । ଆଖି ଖୋସି ହୋଇଗଲା ଅଫିସରଙ୍କର । ଅଚାଳଚଳ ସମ୍ପତ୍ତି ଦେଖି ତାଜୁବ୍ । ଗଜପତି ଜିଲ୍ଲା ଗୁରାଣ୍ଡି ସ୍ଥିତ ମୀନକେତନ ଡିଗ୍ରୀ କଲେଜ ଅଧ୍ୟାପକ ଜି. ନାଗେଶ୍ୱର ରାଓ । ଆୟ ବର୍ହିଭୂତ ସମ୍ପତ୍ତି ଠୁଳ ଅଭିଯୋଗରେ ଅଧ୍ୟାପକଙ୍କର ୬ଟି ସ୍ଥାନରେ ଏକାକାଳୀନ ରେଡ୍ କରିଥିଲା ଭିଜିଲାନ୍ସ ଟିମ୍ ।
ରେଡ୍ ବେଳେ ଭିଜିଲାନ୍ସକୁ ମିଳିଛି ଅଚଳାଚଳ ସମ୍ପତ୍ତିର ତାଲିକା । ୨ କୋଟି ୮୩ ଲକ୍ଷ ୩୬ ହଜାର ଟଙ୍କା ସମ୍ପତ୍ତି ଠାବ କରିଛି ଭିଜିଲାନ୍ସ । ଅସ୍ଥାବର ସମ୍ପତ୍ତିର ମୂଲ୍ୟ ହେଉଛି ୨କୋଟି ୬ ଲକ୍ଷ ୮୭ ହଜାର ଟଙ୍କା । ଅଧ୍ୟାପକଙ୍କ ଓ ତାଙ୍କ ପତ୍ନୀଙ୍କ ନାଁରେ ବିଭିନ୍ନ ସ୍ଥାନରେ ରହିଛି ୫୧ଟି ପ୍ଲଟ୍ । ୩୯୩ ଗ୍ରାମ ସୁନା ଅଳଙ୍କାର ଓ ୩ କେଜି ୪୬୫ ଗ୍ରାମ ରୁପା ସାମଗ୍ରୀ ଜବତ ହୋଇଛି । ଚଢାଉ ବେଳେ ନଗଦ ୩୧ ଲକ୍ଷ ୫୦ ହଜାର ଟଙ୍କା ଜବତ ହୋଇଛି ।
ଏହା ସହିତ ବିଭିନ୍ନ ବ୍ୟାଙ୍କରେ ଫିକ୍ସ ଡିପୋଜିଟ ଓ ଲକର ମଧ୍ୟ ଠାବ ହୋଇଛି । ଗୁରାଣ୍ଡି ମୀନକେତନ ଡିଗ୍ରୀ କଲେଜରେ ଶିକ୍ଷା ବିଭାଗର ଅଧ୍ୟାପକ ଅଛନ୍ତି ନାଗେଶ୍ୱର ରାଓ । ୧୯୯୫ରେ ଚୁକ୍ତିଭିତ୍ତିକ ଭାବରେ ଚାକିରିରେ ଯୋଗ ଦେଇଥିଲେ । ୨୦୦୭ ମସିହାର ତାଙ୍କର ଚାକିରି ସ୍ଥାୟୀ ହୋଇଥିଲା । ଏତେ କମ୍ ସମୟ ଭିତରେ କିଭଳି କୋଟିପତି ହେଲେ ଭିଜିଲାନ୍ସ ଟିମ୍ ତଦନ୍ତ ଜାରି ରଖଛି । ବ୍ରହ୍ମପୁର ଭିଜିଲାନ୍ସ ଏସ୍ପି ଅନୀଲ କୁମାର ପାତ୍ର ଏହି ସୂଚନା ଦେଇଛନ୍ତି ।
