ନନ୍ଦିଘୋଷ ବ୍ୟୁରୋ : ଭିଜିଲାନ୍ସ ଜାଲରେ ୨ ରାଜସ୍ବ ନିରୀକ୍ଷକ। ଜମି ମ୍ୟୁଟେସନ କରିବାକୁ ୩୫ ହଜାର ଟଙ୍କା ଲାଞ୍ଚ ନେଇଥିବା ବେଳେ, ଭିଜିଲାନ୍ସ ହାତରେ ପଡ଼ିଛନ୍ତି ୨ ରାଜସ୍ବ ଅଧିକାରୀ। ପୁରୀ ଜିଲ୍ଲା ପିପିଲି ତହସିଲ ଅଧୀନ ଶୀଉଳା ଆରଆଇ ସର୍କଲରେ ଆଜି ଚଢ଼ାଉ କରିଛି ଭିଜିଲାନ୍ସ ଟିମ୍। ଭିଜିଲାନ୍ସ କବଜାରେ ପଡ଼ିଛନ୍ତି ରାଜସ୍ବ ନିରୀକ୍ଷକ କଲ୍ୟାଣୀ ଜେନା ଓ ARI ପୂର୍ଣ୍ଣଚନ୍ଦ୍ର ବେହେରା। କୃଷି ଜମିକୁ ଘରବାଡ଼ି ଜମିରେ ପରିବର୍ତ୍ତନ ସହ ମ୍ୟୁଟେସନ୍ ପାଇଁ ୩୫ ହଜାର ଟଙ୍କା ଲାଞ୍ଚ ଦାବି କରିଥିଲେ।
ଟଙ୍କା ନଦେଲେ କାମ କରିବେ ନାହିଁ ବୋଲି କହିବା ପରେ ଭିଜିଲାନ୍ସ ନିକଟରେ ଅଭିଯୋଗ ହୋଇଥିଲା। ପରେ ଯୋଜନା ଅନୁସାରେ ଆଜି ଟ୍ରାପ୍ କରିଥିଲା ଭିଜିଲାନ୍ସ ଟିମ୍। ୩୫ ହଜାର ଟଙ୍କା ଲାଞ୍ଚ ନେଉଥିବା ବେଳେ ଉଭୟ ଅଧିକାରୀଙ୍କୁ ଧରିଛି ଭିଜିଲାନ୍ସ। ଶୀଉଳା RI ସର୍କଲ କାର୍ଯ୍ୟାଳୟ ସହ ଦୁଇ ଅଧିକାରୀଙ୍କ ବ୍ରହ୍ମକୁଣ୍ଡି, ଅଚ୍ୟୁତପୁର ଏବଂ ଭୁବନେଶ୍ୱର ରସୁଲଗଡ଼ରେ ଥିବା ଘରେ ଏକକାଳୀନ ଚଢ଼ାଉ କରାଯାଇଛି।
