କୁବେର କନେଷ୍ଟବଳ: ୧୯ ଘଣ୍ଟାର ରେଡ୍, ୫ କୋଟିରୁ ଅଧିକ ସମ୍ପତ୍ତି ଠାବ

ଭୁବନେଶ୍ୱର: ଗିରଫ ପୂର୍ବତନ କୋଟିପତି କନେଷ୍ଟବଳ ପ୍ରସନ୍ନ ବେହେରାଙ୍କ ଘରେ ୧୯ ଘଣ୍ଟା ଧରି ରେଡ୍ କରିଛି ଭିଜିଲାନ୍ସ ଟିମ୍। ଗତକାଲି ବିଳମ୍ବିତ ରାତି ପର୍ଯ୍ୟନ୍ତ ଜାରି ରହିଥିଲା ଚଢାଉ । ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ଆଜି ମାମଲା ରୁଜୁ କରିବ ଭିଜିଲାନ୍ସ । ମାମଲା ରୁଜୁ ପରେ ଭିଜିଲାନ୍ସ କୋର୍ଟରେ ରିମାଣ୍ଡ ଆବେଦନ କରିବ ବୋଲି ସୂଚନା ମିଳିଛି।

ରିପୋର୍ଟ ଅନୁଯାୟୀ, ଗତକାଲି ୫ଟି ସ୍ଥାନରେ ଚଢ଼ାଉ କରିଥିଲା ଭିଜିଲାନ୍ସ ଟିମ୍। ଭିଜିଲାନ୍ସ ରେଡ୍ ପରେ ଅନେକ ଗୁମର ତଥ୍ୟ ସାମ୍ନାକୁ ଆସିଛି । ତାଙ୍କ ପାଖରୁ ୫ କୋଟିରୁ ଅଧିକ ସମ୍ପତ୍ତି ଠାବ କରିଛି ଭିଜିଲାନ୍ସ । ରାଜଧାନୀର ଡୁମୁଡୁମାରେ ପ୍ରସନ୍ନଙ୍କର ଫର୍ଣ୍ଣିଚର ଶୋ ରୁମର ମୂଲ୍ୟ ୧ କୋଟି ୪୭ ଲକ୍ଷରୁ ଅଧିକ ହେବ ହୋଇଥିବା ବେଳେ ୧୮ଶହ ବର୍ଗଫୁଟ ଏରିଆରେ ନିର୍ମିତ ହୋଇଛି ଶୋ ରୁମ । ପ୍ରସନ୍ନଙ୍କ ନାଁରେ ଖୋର୍ଦ୍ଧାର ନୂଆପଡ଼ାରେ ପ୍ଲଟ ରହିଛି, ଏହାର ମୂଲ୍ୟ ୪୫ଲକ୍ଷ ହେବ ।

ସେହିପରି ପତ୍ନୀଙ୍କ ନାଁରେ ଭୁବନେଶ୍ୱର ସୁନ୍ଦରପଦାରେ ୨୪ଲକ୍ଷ ଟଙ୍କାର ଫ୍ଳାଟ ରହିଛି । ପ୍ରସନ୍ନ ଓ ପରିବାର ନାଁରେ ରହିଛି ୫୦ଲକ୍ଷରୁ ଅଧିକ ଟଙ୍କାର ଇନସ୍ୟୁରାନ୍ସ । ୪ଟି ଦାମୀ କାର ଥିବା ବେଳେ ଏହାର ମୁଲ୍ୟ ୩୧ଲକ୍ଷରୁ ଅଧିକ ଟଙ୍କା ହେବ । ୨୧ଟି ବ୍ୟାଙ୍କ ପାସବୁକ, ୨ଲକ୍ଷରୁ ଅଧିକ ଟଙ୍କାର ୨ଟି ବାଇକ ଜବତ କରାଯାଇଛି ।