ଲାଞ୍ଚ ନେବା ବେଳେ ଭିଜିଲାନ୍ସ ଜାଲରେ ଫସିଲେ ପୋଲିସ ବାବୁ

ସୋନପୁର: ଭିଜିଲାନ୍ସ ଜାଲରେ ଫସିଲେ ଆଉ ଜଣେ ପୋଲିସ ବାବୁ । ବାଇକ ଛାଡିବାକୁ ଲାଞ୍ଚ ନେବା ବେଳେ ଧରିଲେ ଭିଜିଲାନ୍ସ ଟିମ୍ । ଘଟଣା ସୁବର୍ଣ୍ଣପୁର ଜିଲ୍ଲା ବୀରମହାରାଜପୁର ଥାନା ଅଞ୍ଚଳର । ଥାନାର ଏଏସଆଇ ବୁଡୁ ଭୋଇଙ୍କୁ ଧରିଛି ଭିଜିଲାନ୍ସ ।

ଅଭିଯୋଗ ଅନୁସାରେ ଏକ ଦୁର୍ଘଟଣା ମାମଲାରେ ବୀରମହାରଜପୁର ପୋଲିସ ଏକ ବାଇକ୍ ଜବତ କରିଥିଲା । ଉକ୍ତ ବାଇକକୁ ଛାଡିବାକୁ ଗାଡି ମାଲିକଙ୍କୁ ପୋଲିସ ବାବୁ ୬ ହଜାର ଟଙ୍କା ଲାଞ୍ଚ ମାଗିଥିଲେ । ଏନେଇ ବାଇକ୍ ମାଲିକ ଭିଜିଲାନ୍ସ ସହ ଯୋଗାଯୋଗ କରିଥିଲେ । ଯୋଜନା ମୁତାବକ ଆଜି ବାଇକ ମାଲିକ ଗାଡି ଆଣିବାକୁ ଯାଇଥିଲେ । ଏହି ସମୟରେ ସେ ରସାୟନ ବୋଳା ୬ ହଜାର ଟଙ୍କା ଲାଞ୍ଚୁଆ ପୋଲିସ ବାବୁଙ୍କୁ ଦେଇଥିଲେ । ଏହି ସମୟରେ ପୂର୍ବରୁ ପ୍ରସ୍ତୁତ ଥିବା ଭିଜିଲାନ୍ସ ଟିମ୍ ତାଙ୍କୁ ଘଟଣା ସ୍ଥଳରେ ଧରିବା ସହ ତାଙ୍କ ପାଖରୁ ରସାୟନ ବୋଳା ଟଙ୍କା ଜବତ କରିଥିଲା ।

ଲାଞ୍ଚୁଆ ପୋଲିସ ବାବୁଙ୍କୁ ଧରିବା ପରେ ପୋଲିସ ତାଙ୍କ ଫାଇଲ ଖୋଳିବା ଆରମ୍ଭ କରିଛି । ଆଗରୁ କେତେ ଲାଞ୍ଚ ନେଇଛନ୍ତି । ଆୟ ବହିର୍ଭୁତ ସମ୍ପତ୍ତି ଠୁଳ କରିଛନ୍ତି କି ଜାଣିବାକୁ ବୁଡୁଙ୍କ ପଟାଭାଡ଼ି ସ୍ଥିତ ଘର ସହିତ ବୀରମହାରାଜପୁର ଥାନାରେ ଚଢାଉ କରିଛି ଭିଜିଲାନ୍ସ ଟିମ୍ ।