ଭିଏତନାମ୍ରେ ହାଇବ୍ରିଡ୍ କରୋନା ଷ୍ଟ୍ରେନ୍ ଚିହ୍ନଟ
ନୂଆଦିଲ୍ଲୀ: କରୋନାର ନୂଆ ଭୂତାଣୁ ଚିହ୍ନଟ । ଭିଏତନାମ୍ରେ ହାଇବ୍ରିଡ୍ କରୋନା ଷ୍ଟ୍ରେନ୍ ଚିହ୍ନଟ ହୋଇଛି । ହାଇବ୍ରିଡ୍ ଷ୍ଟ୍ରେନ୍ ଅର୍ଥାତ୍ ବ୍ରିଟେନ୍ ଓ ଭାରତ ଷ୍ଟେନ୍ ମିଶି ନୂଆ ଷ୍ଟ୍ରେନ୍ ଆସିଥିବା ଜାତୀୟ ଗଣମାଧ୍ୟମରେ ଖବର ପ୍ରକାଶ ପାଇଛି ।
ବିଶେଷଜ୍ଞଙ୍କ କହିବା କଥା ହେଉଛି ଏହି ଷ୍ଟ୍ରେନ୍ ଅଧିକ ମାରାତ୍ମକ । ତେଣୁ ଅଧିକ ସତର୍କ ହେବାକୁ ପଡିବ ବୋଲି କହିଛନ୍ତି ସ୍ୱାସ୍ଥ୍ୟ ବିଶେଷଜ୍ଞ ଡାକ୍ତର ନିରୋଜ ମିଶ୍ର । ଦେଶକୁ ଷ୍ଟ୍ରେନ୍ ଆସିବା ପୂର୍ବରୁ ପଦକ୍ଷେପ ନେବାକୁ ପଡିବ ବୋଲି କହିଛନ୍ତି ସ୍ୱାସ୍ଥ୍ୟ ବିଶେଷଜ୍ଞ ।
ଭାରତରେ କରୋନାର ଦ୍ୱିତୀୟ ପର୍ଯ୍ୟାୟ ଆତଙ୍କ ସୃଷ୍ଟି କରିଛି । ଏଥିରୁ ବଞ୍ଚିବା ପାଇଁ ଲୋକ ଅହରହ ସଂଘର୍ଷ କରୁଛନ୍ତି । ଦୈନିକ ହଜାର ହଜାର ସଂଖ୍ୟାରେ ଲୋକଙ୍କ ଜୀବନ ଯାଉଛି । ଅନ୍ୟପଟେ ଟୀକାକରଣ କେନ୍ଦ୍ରରେ ଟିକା ନେବାପାଇଁ ଲୋକଙ୍କ ଭିଡ଼ ଜମୁଛି । ଅକ୍ସିଜେନ ଅଭାବ ଆଉ ଏକ ବିରାଟ ସମସ୍ୟା ସୃଷ୍ଟି କରିଛି । ଏଭଳି ସ୍ଥିତିରେ କରୋନାର ନୂଆ ଭୂତାଣୁ ଚିହ୍ନଟ ହେବା ଘଟଣା ନିହାତି ଭାବରେ ଲୋକଙ୍କୁ ଡରାଇବା ଆରମ୍ଭ କରିଛି ।
