କଇଁଛ ମାରି ମାଂସ ଖାଇବା ଭିଡିଓ ହେଉଛି ଭାଇରାଲ
ଭୁବନେଶ୍ବର: ଓଡ଼ିଆ ଯୁବକଙ୍କ କଇଁଛ ମାରି ଖାଇବା ଭିଡିଓ ହେଉଛି ଭାଇରାଲ । ତୁରନ୍ତ ଯୁବକଙ୍କୁ ଗିରଫ କରି ଦୃଢ଼ କାର୍ଯ୍ୟାନୁଷ୍ଠାନ ନେବାକୁ ଉଠିଲା ଦାବି । ଅଭିଯୁକ୍ତଙ୍କ ନାଁ ବିବେକ ବୋଲି ଜଣାପଡିଛି ।
ସୂଚନାଯୋଗ୍ୟ, ବିବେକ ତାଙ୍କ ସୋସିଆଲ ମିଡିଆ ସାଇଟ ୟୁଟ୍ୟୁବ ଓ ଇନଷ୍ଟାଗ୍ରାମରେ ଇଣ୍ଡିଆନ ଫ୍ଲାପ ସେଲ୍ ପ୍ରଜାତିର ଏକ କଇଁଛକୁ ମାରିବା ପରେ ରାନ୍ଧି ଖାଇବା ଭିଡିଓ ଅପଲୋଡ କରିଛନ୍ତି । ଗତ ଡିସେମ୍ବର ୨୭ ତାରିଖରେ ଏହି ଭିଡିଓ ଅପଲୋଡ ହୋଇଛି । ଏଥିରେ ସେ କଇଁଛଟିକୁ ଛୁରୀରେ କାଟି ରୋଷେଇ କରୁଛନ୍ତି । ଏହାପରେ ତାକୁ ଖାଇବା ସହ ଖୁସି ହେଉଥିବା ଦେଖିବାକୁ ମିଳିଛି ।
ଏମିତି ଭିଡିଓ ପରିବେଶବିତ ଓ ପ୍ରାଣୀ ପ୍ରେମୀଙ୍କୁ ଗଭୀର ଆଘାତ ଦେଇଛି । ଯୁବକ ଜଣଙ୍କୁ ତୁରନ୍ତ ଗିରଫ କରି ତାଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ନେବାକୁ ରାଜ୍ୟ ମୁଖ୍ୟ ବନ୍ୟପ୍ରାଣୀ ତତ୍ତ୍ୱାବଧାରକଙ୍କୁ ଚିଠି ଲେଖିଛନ୍ତି ସ୍ନେକ୍ ହେଲ୍ପ ଲାଇନ ସାଧାରଣ ସମ୍ପାଦକ ଶୁଭେନ୍ଦୁ ମଲ୍ଲିକ ।
