Flood in Odisha: କେବଳ ମଣିଷ ନୁହେଁ ପଶୁଙ୍କ ଜୀବନ ବଞ୍ଚାଇବାରେ ଲାଗିଛି ପ୍ରଶାସନ
ଜଗତସିଂହପୁର: ବନ୍ୟା ଆସିଛି, ବାସ ଉଜୁଡ଼ି ଯାଇଛି । ନଦୀବନ୍ଧରେ ପଶୁ ସହ ରାତି ବିତାଉଛନ୍ତି ବନ୍ୟା ବିସ୍ଥାପିତ । ହୀରାକୁଦ ଗେଟ୍ ଖୋଲିବା ପରେ ମହାନଦୀରେ ବନ୍ୟା ଆସିଛି । ଜଳମଗ୍ନ ହୋଇ ରହିଛି ଜଗତସିଂହପୁର ଜିଲ୍ଲା ତିର୍ତ୍ତୋଲର ବ୍ୟାପକ ଅଞ୍ଚଳ । ଗାଁରେ ବନ୍ୟା ଜଲ ପଶିବା ପରେ ଏବେ ମଣିଜଙ୍ଗା କେନାଲ ବନ୍ଧ ପାଲଟିଛି ଗୋପାଳସାହିର ୪୦ ପରିବାରର ସାହାରା । ବଢ଼ି ପାଣିରେ ଘର ବୁଡ଼ି ଯାଇଛି । ଫଳରେ ୪୦ ପରିବାର ନିଜ ଗୃହପାଳିତ ପଶୁଙ୍କୁ ନେଇ ତିନିଦିନ ହେଲା ନଦୀ ବନ୍ଧରେ ରାତି ବିତାଉଛନ୍ତି ।
ପ୍ରତିବର୍ଷ ମହାନଦୀରେ ବଢ଼ି ପାଣି ଆସିଲେ ଗୋପାଳସାହିବାସୀଙ୍କ ଚିନ୍ତା ବଢ଼େ । କଣ କରିବେ, କେମିତି ପରିବାର ସହ ପେଟପାଟଣାର ସାଥୀ ଗାଈଗୋରୁଙ୍କୁ ବନ୍ୟା ପାଣିରୁ ରକ୍ଷା କରିବେ । ଏହି ଚିନ୍ତାରେ ବନ୍ୟା ପାଣି ମାଡ଼ି ଆସିଲା ମାନେ ଏମାନେ ମଣିଜଙ୍ଗା କେନାଲ ବନ୍ଧକୁ ଉଠି ଆସନ୍ତି । ଏବର୍ଷ ବି ଠିକ୍ ସେମିତି ଜୀବନ ସହ ଜୀବିକାକୁ ଧରି ନଦୀ ବନ୍ଧରେ ଆଶ୍ରୟ ନେଇଛନ୍ତି ୪୦ ଗୋପାଳ ପରିବାର । ପ୍ରଶାସନ ପକ୍ଷରୁ ସେମାନଙ୍କୁ ଶୁଖିଲା ଖାଦ୍ୟ ଓ ରନ୍ଧା ଖାଦ୍ୟ ଯୋଗାଇ ଦିଆଯାଉଛି ।
ଖୁବଶୀଘ୍ର ବନ୍ୟା ବିସ୍ଥାପିତଙ୍କୁ ପ୍ରଶାସନ ପକ୍ଷରୁ ପଲିଥିନ୍ ଯୋଗାଇ ଦିଆଯିବ । ପ୍ରଶାସନ ମଣିଷ ସହିତ ଗୋପାଳିତ ପଶୁଙ୍କୁ ଧ୍ୟାନ ଦେଇଛି । ବଡ଼ ଗାଇ, ଛେଳିଙ୍କ ପାଇଁ ତିନିଦିନର ଖାଦ୍ୟ ଭାବେ ୧ କେଜି ଲେଖାଏଁ ଓ ଛୋଟ ପଶୁଙ୍କ ପାଇଁ ୨୦୦ ଗ୍ରାମ ଲେଖାଏଁ ୩ ଦିନର ଖାଦ୍ୟ ଯୋଗାଇ ଦିଆଯାଇଛି । ଏଥିସହ ଗୋପାଳିତ ପଶୁଙ୍କ ଚିକିତ୍ସା ନିମନ୍ତେ ଭ୍ୟାମ୍ୟମାଣ୍ୟ ସ୍ୱାସ୍ଥ୍ୟ କ୍ୟାମ୍ପ କରାଯାଇ ଆବଶ୍ୟକୀୟ ଔଷଧ ଯୋଗାଇ ଦେଇଛି ପ୍ରଶାସନ ।
