ଖୁବଶୀଘ୍ର ବଡ଼ପଡ଼ିଆ ପରିବା ମାର୍କେଟରେ ମ୍ୟୁନିସିପାଲଟି ପକ୍ଷରୁ ତିଆରି ହେବ ଭେଣ୍ଡିଂ ଜୋନ୍ । ଏନେଇ ପାରାଦ୍ଵୀପ ବନ୍ଦର ସହିତ ସମସ୍ତ ଆଲୋଚନା ସରିଛି । କିନ୍ତୁ ଏହି କାର୍ଯ୍ୟରେ ସାମାନ୍ୟ ବିଳମ୍ବ ହୋଇଥିଲା, ଏବେ ଏହାର କାମ ଆରମ୍ଭ ହେବ ବୋଲି ମ୍ୟୁନିସିପାଲଟି ଅଧ୍ୟକ୍ଷ ବସନ୍ତ ବିଶ୍ବାଳ ଓ ସ୍ଥାନୀୟ ବିଧାୟକ ତଥା ଶିଳ୍ପ ମନ୍ତ୍ରୀ ସମ୍ପଦ ସ୍ବାଇଁ ପ୍ରକାଶ କରିଛନ୍ତି । ଗତକାଲି ବିଳମ୍ବିତ ରାତିରେ ବଡ଼ପଡ଼ିଆ ପରିବା ମାର୍କେଟରେ ଭୟାବହ ଅଗ୍ନିକାଣ୍ଡରେ କୋଟି କୋଟି ଟଙ୍କାର ସମ୍ପତ୍ତି ପୋଡି ନଷ୍ଟ ହୋଇଯାଇଛି। ଏଥିରେ ୭୦ରୁ ଉର୍ଦ୍ଧ୍ୱ ପରିବା ଦୋକାନ ସମେତ ଦୁଇଟି ବାଇକ ଓ ୮ ଟି ସାଇକେଲ ପୋଡିଯାଇଥିବା ବେଳେ ପନିପରିବା ମଧ୍ୟ ନଷ୍ଟ ହୋଇଯାଇଛି। ଏହି ନିଆଁ ଏତେ ଭୟାବହ ଥିଲା ଯେ ୬ ଟି ଅଗ୍ନିଶମ ବିଭାଗ ଗାଡ଼ି ନିଆଁକୁ ଆୟତ କରିବା ପାଇଁ ୨ ଘଣ୍ଟା ରୁ ଉର୍ଦ୍ଧ୍ୱ ସମୟ ଲାଗିଥିଲା। ଏହି ଘଟଣାକୁ ନେଇ ଶିଳ୍ପ ମନ୍ତ୍ରୀ ସମ୍ପଦ ସ୍ବାଇଁ ଘଟଣାସ୍ଥଳ ପରିଦର୍ଶନ କରିବା ସହିତ ଖୁବଶୀଘ୍ର ଭେଣ୍ଡି ଜୋନ୍ ର କାର୍ଯ୍ୟ ଆରମ୍ଭ ହେବ ବୋଲି ପ୍ରତିଶ୍ରୁତି ଦେଇଛନ୍ତି।
