ଓଲଟିଲା ଗୋରୁ ବୋଝେଇ ପିକଅପ୍ ଭ୍ୟାନ୍, ୫ ଗୋରୁ ମୃତ

ଭଦ୍ରକ/ସୋର: ଭଦ୍ରକ-ଧାମନଗର ରାସ୍ତା ଭଣ୍ଡାରୀପଦି ଛକ ନିକଟରେ ଦୁର୍ଘଟଣା ଘଟିଛି । ଚାଲାଣ ବେଳେ ଦୁର୍ଘଟଣାଗ୍ରସ୍ତ ହୋଇଛି ଗୋରୁ ବୋଝେଇ ପିକଅପ୍ ଭ୍ୟାନ୍ । ଗୋରୁ ବୋଝେଇ ପିକଅପ୍ ଭ୍ୟାନ୍ ଓଲଟି ୫ ଗାଈଙ୍କ ମୃତ୍ୟୁ ହୋଇଛି । ଦୁର୍ଘଟଣାଗ୍ରସ୍ତ ପିକଅପ୍ ଭ୍ୟାନରୁ ୨୫ ଗୋରୁଙ୍କୁ ଉଦ୍ଧାର କରାଯାଇଚି । ଏହାକୁ ନେଇ ସ୍ଥାନୀୟ ଅଞ୍ଚଳରେ ଉତ୍ତେଜନା ପ୍ରକାଶ ପାଇଛି ।

ଉତ୍ତ୍ୟକ୍ତ ଲୋକ ଭଣ୍ଡାରୀପଦି ଛକରେ ଭଦ୍ରକ-ଧାମନଗର ରାସ୍ତା ଅବରୋଧ କରିଛନ୍ତି । ବେଆଇନ୍ ଭାବେ ଗୋରୁ ଚାଲାଣ ବେଳେ ଦୁର୍ଘଟଣା ଘଟିଥିବା ସୂଚନା ମିଳିଛି । ଭଦ୍ରକ ଦେଇ ପୂର୍ବରୁ ବିଭିନ୍ନ ସମୟରେ ଏଭଳି ବେଆଇନ୍ ଗୋରୁ ଚାଲାଣ ବେଳେ ମଧ୍ୟ ଗୋରୁ ବୋଝେଇ ଗାଡ଼ି ଧରାପଡ଼ିଥିଲା ।

ଅନ୍ୟପଟେ ଭଦ୍ରକରୁ ବାଲେଶ୍ୱର ଚାଲାଣ ବେଳେ ଗୋରୁ ବୋଝେଇ ପିକଅପ୍ ଜବତ କରିଛି ସିମୁଳିଆ ଥାନା ପୋଲିସ । ୧୬ ନମ୍ବର ଜାତୀୟ ରାଜପଥର ସିମୁଳିଆ କଲେଜ ଛକ ନିକଟରୁ ୬ଟି ଗୋରୁ ବୋଝେଇ ପିକଅପ୍ ଭ୍ୟାନ୍ ଜବତ କରାଯାଇଛି । ଏଥିରେ ଥିବା ୧୦୩ ଗାଈଙ୍କୁ ଉଦ୍ଧାର କରିଛି ସିମୁଳିଆ ପୋଲିସ ।