ବନ୍ଦେ ଉତ୍କଳ ଜନନୀକୁ ପ୍ରଚାର ପ୍ରସାର ପାଇଁ ସରକାରଙ୍କ ଉଦ୍ୟମ, ସ୍କୁଲ ଛୁଟି ପୂର୍ବରୁ ସମୂହ ଗାନ ହେବ ରାଜ୍ୟ ସଙ୍ଗୀତ
ଭୁବନେଶ୍ୱର: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନିର୍ଦ୍ଦେଶ ପରେ ‘ବନ୍ଦେ ଉତ୍କଳ ଜନନୀ’କୁ ରାଜ୍ୟ ସଙ୍ଗୀର ମାନ୍ୟତା ମିଳିଛି । ତେବେ ରାଜ୍ୟ ସଙ୍ଗୀତ ମାନ୍ୟତା ପାଇବା ପରେ ଏବେ ସମସ୍ତ ସ୍କୁଲରେ ଜାତୀୟ ସଙ୍ଗୀତ ଭଳି ଏହା ମଧ୍ୟ ଗାନ କରାଜିବ । ଏନେଇ ସୂଚନା ଦେଇଛନ୍ତି ସ୍କୁଲ ଓ ଗଣଶିକ୍ଷା ମନ୍ତ୍ରୀ ସମୀର ଦାଶ । ସେ ‘ବନ୍ଦେ ଉତ୍କଳ ଜନନୀ’କୁ ରାଜ୍ୟ ସଙ୍ଗୀତ ମାନ୍ୟତା ପ୍ରସଙ୍ଗରେ ପ୍ରତିକ୍ରିୟା ରଖିଛନ୍ତି ।
କହିଛନ୍ତି, ସବୁଦିନ ସ୍କୁଲ ଛୁଟି ସମୟରେ ‘ବନ୍ଦେ ଉତ୍କଳ ଜନନୀ’ ସଂଗୀତ ଗାନ କରାଯିବ । ଖାଲି ସେତିକି ନୁହେଁ, ସ୍କୁଲ ପାଠ୍ୟକ୍ରମରେ ମଧ୍ୟ ସ୍ଥାନିତ ହେବ ରାଜ୍ୟ ସଂଗୀତ । କିନ୍ତୁ ଚଳିତବର୍ଷ ଏହା ପାଠ୍ୟକ୍ରମରେ ରହିବ କି ନାହିଁ ବିଚାରବିମର୍ଶ ଚାଲିଛି ।
କାନ୍ତକବି ଲକ୍ଷ୍ମୀକାନ୍ତ ମହାପାତ୍ର ଓ ‘ବନ୍ଦେ ଉତ୍କଳ ଜନନୀ’ ସଂଗୀତ ବିଷୟରେ ପିଲାଙ୍କୁ ଅବଗତ କରାଯିବ ବୋଲି ସ୍କୁଲ ଓ ଗଣଶିକ୍ଷା ମନ୍ତ୍ରୀ ସମୀର ଦାଶ କହିଛନ୍ତି । ‘ବନ୍ଦେ ଉତ୍କଳ ଜନନୀ’କୁ ରାଜ୍ୟ ସଂଗୀତର ମାନ୍ୟତା ପାଇଁ ଗତକାଲି କ୍ୟାବିନେଟ ବୈଠକରେ ନିଷ୍ପତ୍ତି ହୋଇଛି ।
