ଗାଜିପୁର: ଗଣତନ୍ତ୍ର ଦିବସରେ ଦିଲ୍ଲୀରେ ହୋଇଥିବା କୃଷକଙ୍କ ଟ୍ରାକ୍ଟର ପରେଡକୁ ନେଇ ଚାରିଆଡେ ଚର୍ଚ୍ଚା। ଏହି ହିଂସା ଘଟଣା ପରେ ଚାଷୀ ଆନ୍ଦୋଳନକୁ ନେଇ ବିଭିନ୍ନ ମହଲରେ ନିନ୍ଦା କରାଯାଉଛି । ଏହି ପରିପ୍ରେକ୍ଷୀରେ ଗାଜିପୁର ସୀମାରେ ବସିଥିବା ଚାଷୀଙ୍କୁ ହଟିଯିବା ପାଇଁ ନିର୍ଦ୍ଦେଶ ଦେଇଛନ୍ତି ସ୍ଥାନୀୟ ଜିଲ୍ଲାପାଳ।
ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ନିର୍ଦ୍ଦେଶ କ୍ରମେ ଏଭଳି ନିଷ୍ପତ୍ତି ନେଇଛି ଗାଜିପୁର ପ୍ରଶାସନ। ସେପଟେ ହିଂସା ଘଟଣାକୁ ନେଇ ପ୍ରଶାସନକୁ ସମାଲୋଚନା କରିଛନ୍ତି ଚାଷୀ ନେତା। ଲାଲକିଲ୍ଲାରେ ଯେଉଁ ଘଟଣା ଘଟିଲା ତାହାର ଯାଞ୍ଚ କରନ୍ତୁ ସୁପ୍ରିମକୋର୍ଟ । ଏଥିରେ ସଂପୃକ୍ତ ବ୍ୟକ୍ତିଙ୍କ ଦୁଇ ମାସର କଲ୍ ଡିଟେଲ୍ସ ଯାଞ୍ଚ କରାଯାଉ । ହିଂସା ନୁହେଁ ଅହିଂସା ମାର୍ଗ ଥିଲା ଚାଷୀଙ୍କ ଲକ୍ଷ୍ୟ ।
ହେଲେ ଚାଷୀମାନଙ୍କୁ ଉସୁକାଇ ନିଜ ମାର୍ଗରେ ସେମାନଙ୍କୁ ପରିଚାଳିତ କରିବାରେ କିଛି ଲୋକ ସଫଳ ହେଲେ । ଯାହାଫଳରେ ଏହାକୁ ନେଇ ଆଜି ନିନ୍ଦିତ ହେଉଛି ପୁରା ଚାଷୀ ସମାଜ । ଆନ୍ଦୋଳନ ଭଙ୍ଗ କରିବା ପାଇଁ ଷଡଯନ୍ତ୍ର ଥିଲା, ଯେଉଁଥିରେ ସଫଳ ହେଲେ କିଛି ଲୋକ । ହିଂସା ଶଦ୍ଦ ଆମ ସୂଚିରେ ନଥିଲା ଆଗକୁ ଶାନ୍ତିପୂର୍ଣ୍ଣ ଆନ୍ଦୋଳନ ଜାରି ରହିବ ବୋଲି କହିଛନ୍ତି ଟିକାୟତ।
ଏହି ଘଟଣା ପରେ ପ୍ରଶ୍ନ ଘେରରେ ଥିବା ଦିଲ୍ଲୀ ପୋଲିସ ଏବେ ଆକସନ ମୁଡକୁ ଆସିଛି । ଚାଷୀ ନେତାଙ୍କ ବିରୋଧରେ ଲୁକ୍ ଆଉଟ୍ ଜାରି କରିବା ସହ ଅନେକ ନେତାଙ୍କୁ ନୋଟିସ୍ ଜାରି କରିଛି ପୋଲିସ । ହିଂସା ଘଟଣାକୁ ନେଇ ଖୁବ ଶୀଘ୍ର ଜବାବ ରଖିବା ପାଇଁ ନିର୍ଦ୍ଦେଶ ରହିଛି ।
ସେପଟେ ଆଜି ପୁଣି ଥରେ ବରିଷ୍ଠ ଅଧିକାରୀଙ୍କ ସହ ଆଲୋଚନା କରିଛନ୍ତି ଦିଲ୍ଲୀ ପୋଲିସ କମିଶନର ଏସ ଏନ ଶ୍ରୀବାସ୍ତବ । ରୁଜୁ ହୋଇଥିବା ମାମଲା ମଧ୍ୟରୁ ୯ଟି ମାମଲା କ୍ରାଇମବ୍ରାଞ୍ଚକୁ ହସ୍ତାନ୍ତର କରାଯାଇଛି । ସ୍ପେଶାଲ ସେଲ୍ ସହ କ୍ରାଇମବ୍ରାଞ୍ଚ କରିବ ହିଂସା ଘଟଣାର ତଦନ୍ତ । ସେପଟେ ଚାଷୀ ନେତା କହିଛନ୍ତି ଲାଲକିଲ୍ଲାରେ ଯେଉଁ ଘଟଣା ଘଟିଲା, ସେଥିପାଇଁ ଯିଏ ଦାୟୀ ତା ବିରୋଧରେ କାର୍ଯ୍ୟାନୁଷ୍ଠାନ ହେବା ଆବଶ୍ୟକ । ଏପଟେ ହିଂସାକାଣ୍ଡରେ ଆହତ ହୋଇ ଚିକିତ୍ସିତ ହେଉଥିବା ପୋଲିସ କର୍ମଚାରୀଙ୍କୁ ଭେଟିଛନ୍ତି ଗୃହମନ୍ତ୍ରୀ ଅମିତ ଶାହା । ପ୍ରାୟ ୩୦୦ ପୋଲିସ କର୍ମଚାରୀ ଆହତ ହୋଇଥିବା ଜଣାପଡିଛି ।
