ନନ୍ଦିଘୋଷ ବ୍ୟୁରୋ : ଏବେ ବି ଉତ୍ତରାଖଣ୍ଡରେ ଜାରି ରହିଛି ଉଦ୍ଧାର କାର୍ଯ୍ୟ। ଏଥିରେ ଲାଗିଛି ବାୟୁସେନାର ହେଲିକପଟର। ଧରାଲି ଓ ହର୍ସିଲରୁ ୩୩ ଥର ଉଡ଼ାଣ ହେଲାଣି। ଏଥିରେ ନିୟୋଜିତ ହୋଇଛନ୍ତି ଉଭୟ ବାୟୁସେନା ଓ ସିଭିଲ୍ ଏଭିଏସନର ହେଲିକପଟର। ଗତକାଲି ପ୍ରାୟ ୨୦୦ ଜଣଙ୍କୁ ଏହି ଅଞ୍ଚଳରୁ ଉଦ୍ଧାର କରାଯାଇଥିଲା। ଫସି ରହିଥିବା ଶତାଧିକ ପର୍ଯ୍ୟଟକଙ୍କୁ ଯୋଗାଇ ଦିଆଯାଇଛି ଖାଦ୍ୟ ଓ ପିଇବା ପାଣି। କେତେକ ସ୍ଥାନରେ ବ୍ରିଜ୍ ଧୋଇ ଯିବାରୁ ନୂଆ ବ୍ରିଜ୍ ନିର୍ମାଣ କରାଯାଉଛି। ଯାହାକି ଶେଷ ପର୍ଯ୍ୟାୟରେ ପହଞ୍ଚିଛି। କିଛି ଦିନ ଭିତରେ ଏହା କାର୍ଯ୍ୟକ୍ଷମ ହେବ ବୋଲି କୁହାଯାଇଛି। ବାଦଲଫଟା ବର୍ଷାରେ ଧୋଇଯାଇଥିଲା ଲିମଚିଗଡ଼ ବ୍ରିଜ। ଲୋକଙ୍କୁ ସ୍ଵାସ୍ଥ୍ୟସେବା ବି ଯୋଗାଇ ଦିଆଯାଉଛି ବୋଲି କହିଛନ୍ତି ଜିଲ୍ଲା ସୂଚନା ଅଧିକାରୀ। ପାନୀୟ ଜଳଯୋଗାଣ ଓ ବିଦ୍ୟୁତ ସେବାକୁ ମଧ୍ୟ ସ୍ଵାଭାବିକ କରିବାକୁ ଚେଷ୍ଟା ଚାଲିଛି। ଉତ୍ତରାଖଣ୍ଡ ଉତ୍ତରକାଶୀ ନିକଟ ଧରାଳିରେ ହୋଇଥିଲା ବାଦଲଫଟା ବର୍ଷା। ଏଥିରେ ବ୍ୟାପକ ଧ୍ଵଂସଲୀଳା ହୋଇଥିଲା।
