ଉତ୍କଳ ବିଶ୍ୱ ବିଦ୍ୟାଳୟ ବହୁ ଯୋଗ୍ୟ ବ୍ୟକ୍ତିଙ୍କୁ ସୃଷ୍ଟି କରିଛି : ରାଷ୍ଟ୍ରପତି

ଭୁବନେଶ୍ୱର : ମାଆ ମାଟି ଓ ମାତୃଭାଷାକୁ ସମ୍ମାନ ଦେଲେ ଆଗକୁ ଉଜ୍ଜ୍ୱଳ ଭବିଷ୍ୟତ ଗଠନ ହୋଇପାରିବ । ଏହାସହ ମାତାପିତା, ଗୁରୁଜନ ଓ ଅଧ୍ୟାପକଙ୍କୁ ମଧ୍ୟ ସମ୍ମାନ ଦେଲେ ଦେଶର ଜଣେ ସୁନାଗରିକ ଭାବେ ନିଜକୁ ଗଢି ତୋଳି ପାରିବେ । ଆଜି ଉତ୍କଳ ବିଶ୍ୱ ବିଦ୍ୟାଳୟର ସମାଵର୍ତ୍ତନ ଉତ୍ସବରେ ଯୋଗଦେଇ ଛାତ୍ରଛାତ୍ରୀଙ୍କୁ ଏପରି ପରାମର୍ଶ ଦେଇଛନ୍ତି ରାଷ୍ଟ୍ରପତି ଦୌପଦୀ ମୁର୍ମୁ । ଉତ୍କଳ ବିଶ୍ୱ ବିଦ୍ୟାଳୟ ବହୁ ଯୋଗ୍ୟ ବ୍ୟକ୍ତିଙ୍କୁ ସୃଷ୍ଟି କରିଛି ।  ଏହି ଅନୁଷ୍ଠାନ ଅନେକ ଛାତ୍ରଛାତ୍ରୀ ଦେଶ ଓ ବିଦେଶରେ ବିଭିନ୍ନ ବଡ଼ ବଡ଼ ପଦ ପଦବୀ ରହି କାର୍ଯ୍ୟ କରୁଛନ୍ତି । ଉତ୍କଳ ବିଶ୍ୱ ବିଦ୍ୟାଳୟର ୫୩ ତମ ସମାଵର୍ତ୍ତନ ଉତ୍ସବରେ ରାଷ୍ଟ୍ରପତି ମୁଖ୍ୟଅତିଥି ଭାବେ ଯୋଗଦେଇ ଦୀକ୍ଷାନ୍ତ ଅଭିଭାଷଣ ରଖିଛନ୍ତି । କାର୍ଯ୍ୟକ୍ରମରେ ସଂମ୍ମାନିତ ଅତିଥି ଭାବେ କୂଳଧିପତି ତଥା ରାଜ୍ୟପାଳ ରଘୁବର ଦାସ, ଉଚ୍ଚଶିକ୍ଷା ମନ୍ତ୍ରୀ ଅତନୁ ସବ୍ୟସାଚୀ ନାୟକ ପ୍ରମୁଖ ମଧ୍ୟ ଉପସ୍ଥିତ ଥିଲେ ।

ପ୍ରାରମ୍ଭରେ ଉତ୍କଳ ବିଶ୍ଵବିଦ୍ୟାଳୟର କୁଳପତି ପ୍ରଫେସର ସବିତା ଆଚାର୍ଯ୍ୟ ସ୍ୱାଗତ ଭାଷଣ ପ୍ରଦାନ କରିଥିଲେ। ଏହି ସମାବର୍ତ୍ତନ ଉତ୍ସବରେ ୧୬୬ ଜଣ ପିଏଚଡି ପାଇଛନ୍ତି ଏବଂ  ୯୫ ଗୋଲଡ଼ ମେଡାଲ ଏବଂ ୬ ଜଣଙ୍କୁ ଏଣ୍ଡୋମେଣ୍ଟ ମିଳିଛି । ସମ୍ମାନସୂଚକ ଡ଼କ୍ଟରକେଟ ଉପାଧିରେ ପାଇଛନ୍ତି ପ୍ରଧାନମନ୍ତ୍ରୀଙ୍କ ପ୍ରମୁଖ ସଚିବ ପ୍ରମୋଦ କୁମାର ମିଶ୍ର, IMD DG ମୃତ୍ଯୁଞ୍ଜୟ ମହାପାତ୍ର, ହିଣ୍ଡାଲକୋର ପରିଚାଳନା ନିର୍ଦ୍ଦେଶକ ସତୀଶ ପାଇ । ଏହି କାର୍ଯ୍ୟକ୍ରମ ଦୀକ୍ଷାନ୍ତ ଭବନରେ ଅନୁଷ୍ଠିତ ହୋଇଥିଲା । ଖୁବଶୀଘ୍ର ବିଶ୍ବବିଦ୍ଯାଳୟର ଦ୍ବିତୀୟ କ୍ୟାମ୍ପସ କାର୍ଯ୍ୟକାରୀ ହେବାକୁ ଯାଉଛି । ରାଜ୍ୟରେ ୧୭୬ କୋଟି ବଜେଟ ଏବେ ୪ହଜାର କୋଟିରେ ପହଞ୍ଚିଛି । ଛାତ୍ରଛାତ୍ରୀଙ୍କୁ ଶିକ୍ଷା ବୃତ୍ତିଠୁ ଆରମ୍ଭ କରି ଅଧ୍ୟାପକ ଅଧ୍ୟାପିକାମାନଙ୍କୁ ରିସର୍ଚ୍ଚ ପାଇଁ ପ୍ରଚୁର ସୁଯୋଗ ସୃଷ୍ଟି ହୋଇଛି ବୋଲି ଏହି ଅବସରରେ କହିଛନ୍ତି  ଉଚ୍ଚଶିକ୍ଷା ମନ୍ତ୍ରୀ ।