ନନ୍ଦିଘୋଷ ବ୍ୟୁରୋ: ବାଂଲାଦେଶକୁ ଆମେରିକାର କଡ଼ା ଚେତାବନୀ। ସବୁ ଧର୍ମ, ସବୁ ସଂପ୍ରଦାୟର ଲୋକଙ୍କୁ ସୁରକ୍ଷା ଦିଅ। ସମସ୍ତଙ୍କ ଅଧିକାରକୁ ସୁରକ୍ଷା ଦିଅ। ଜାତି ଧର୍ମ ବର୍ଣ୍ଣ ନିର୍ବିଶେଷରେ କାହାରି ମାନବିକ ଅଧିକାର କ୍ଷୂର୍ଣ୍ଣ ନ ହେଉ ବୋଲି ହ୍ଵାଇଟ୍ ହାଉସ୍ ପକ୍ଷରୁ ବାଂଲାଦେଶକୁ କୁହାଯାଇଛି। ଶେଖ ହସିନା ସରକାରଙ୍କ ପତନ ପରେ ବାଂଲାଦେଶରେ ଲାଗି ରହିଛି ଅରାଜକତା। ସଂଖ୍ୟାଲଘୁ ସଂପ୍ରଦାୟର ଲୋକଙ୍କୁ ଟାର୍ଗେଟ କରାଯାଉଛି। କେବଳ ଯେ ଦଙ୍ଗାକାରୀମାନେ ଏପରି କରୁଛନ୍ତି, ତାହା ନୁହେଁ ସରକାରୀ ସ୍ତରରେ ବି ପୋଲିସ ଓ ଅନ୍ୟ ସଂସ୍ଥା ହିନ୍ଦୁମାନଙ୍କୁ ଟାର୍ଗେଟ କରୁଛନ୍ତି। ଏହାକୁ ନେଇ ସାରା ବିଶ୍ଵରେ ବିଶେଷ କରି ପଡ଼ୋଶୀ ଭାରତରେ ଉଦବେଗ ପ୍ରକାଶ ପାଇଛି।
କିଛି ଦିନ ତଳେ ଇସ୍କନର ବଡ଼ ବଡ଼ ସନ୍ଥଙ୍କୁ ବିନା କାରଣରେ ଗିରଫ କରି ଜେଲରେ ରଖାଯାଇଛି। ଏପରିକି ସେମାନଙ୍କ ପାଇଁ ମାମଲା ଲଢ଼ିବାକୁ ଓକିଲମାନେ ବି ରାଜି ହେଉ ନାହାନ୍ତି। କେବଳ ଏତିକି ନୁହେଁ, ହିନ୍ଦୁମାନଙ୍କ ସହିତ ବୌଦ୍ଧ, ଶିଖ, ଖ୍ରୀଷ୍ଟିଆନ ବି ଆକ୍ରୋଶର ଶିକାର ହେଉଛନ୍ତି। ମନ୍ଦିର ଭାଙ୍ଗିବା ସହ ମୂର୍ତ୍ତି ଭାଙ୍ଗିଛନ୍ତି ଦୁର୍ବୃତ୍ତ । ବିଭିନ୍ନ ଧର୍ମପୀଠକୁ ବି ଟାର୍ଗେଟ କରାଯାଉଛି। ଏସବୁ ବନ୍ଦ କରାଯାଉ ବୋଲି ଅନ୍ତରୀଣ ପ୍ରଧାନମନ୍ତ୍ରୀ ମହମ୍ମଦ ୟୁନୁସଙ୍କୁ କହିଛନ୍ତି ହ୍ଵାଇଟ୍ ହାଉସର ମୁଖପାତ୍ର ସୁଲିଭାନ। ବାଂଲାଦେଶ ଉପରେ ଆମେରିକା ତୀକ୍ଷଣ ନଜର ରଖିଛି ବୋଲି ହ୍ଵାଇଟ୍ ହାଉସ୍ ପକ୍ଷରୁ କୁହାଯାଇଛି।
