ଦଲାଇ ଲାମାଙ୍କ ଉତ୍ତରାଧିକାରୀ କିଏ ହେବ ? ଚିନ୍ ମୁଣ୍ଡ ଖେଳାଇବା ଆବଶ୍ୟକ ନାହିଁ: ଆମେରିକା
1 min read
ତିବ୍ଦତୀୟ ଆଧ୍ୟାତ୍ମିକ ଗୁରୁ ଦଲାଇ ଲାମାଙ୍କ ଉତ୍ତରାଧିକାରୀ ବାଛିବାରେ ଚୀନ୍ ସରକାରଙ୍କର କୌଣସି ଭୂମିକା ରହିବା ଉଚିତ ନୁହେଁ । ଏନେଇ ମଙ୍ଗଳବାର ବାଇଡେନ୍ ସରକାରଙ୍କ ପକ୍ଷରୁ କୁହାଯାଇଛି । ସ୍ୱରାଷ୍ଟ୍ର ବିଭାଗର ମୁଖପାତ୍ର ନେଡ୍ ପ୍ରାଇସ ତାଙ୍କ ଦୈନିକ ସାମ୍ବାଦିକ ସମ୍ମିଳନୀରେ ଏହି ମନ୍ତବ୍ୟ ଦେଇଛନ୍ତି । ସେ ସିଧାସଳଖ କହିଛନ୍ତି ଯେ, ଦଲାଇ ଲାମାଙ୍କ ଉତ୍ତରାଧିକାରୀ ବାଛିବାରେ ଚୀନ୍ ସରକାରଙ୍କର କୌଣସି ଭୂମିକା ରହିବା ଉଚିତ ନୁହେଁ ।
ପ୍ରାଇସ ଆହୁରି କହିଛନ୍ତି ଯେ, ୨୫ ବର୍ଷରୁ ଅଧିକ ସମୟ ପୂର୍ବରୁ ମଧ୍ୟ ପାଞ୍ଚେନ୍ ଲାମାଙ୍କ ଉତ୍ତରାଧିକାରୀ ବାଛିବା ପ୍ରକ୍ରିୟାରେ ଚୀନ୍ର ହସ୍ତକ୍ଷେପ ଧାର୍ମିକ ସ୍ୱତନ୍ତ୍ରତାକୁ ଉଲ୍ଲଂଘନ କରିଥିବା ଦର୍ଶାଉଛି । ଏଥିରେ ପିଲାଦିନେ ପଞ୍ଚେନ୍ ଲାମାଙ୍କୁ ‘ଗାୟବ’ କରିବା ଏବଂ ତାଙ୍କୁ PRC (ପିପୁଲ୍ସ ରିପବ୍ଲିକ୍ ଅଫ୍ ଚାଇନା) ସରକାରଙ୍କ ଦ୍ୱାରା ମନୋନୀତ ଉତ୍ତରାଧିକାରୀଙ୍କ ସହ ବଦଳାଇବା କଥା ମଧ୍ୟ ଜଡ଼ିତ ।
ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଗତ ବର୍ଷ ଡିସେମ୍ବରରେ ଏକ ଆଇନରେ ହସ୍ତାକ୍ଷର କରିଥିଲେ । ତିବ୍ଦତରେ ଆମେରିକୀୟ ବାଣିଜ୍ୟ ଦୂତାବାସ ପ୍ରିତିଷ୍ଠା କରିବା ଏବଂ ଅନ୍ତରାଷ୍ଟ୍ରୀୟ ମେଣ୍ଟ ନେଇ ଏଥିରେ ଦର୍ଶାଯାଇଥିଲା । ଏହା ଦ୍ୱାରା ତିବ୍ଦତୀୟ ଧର୍ମଗୁରୁ ଦଲାଇଲାମା ଚୟନରେ ଚିନ୍ର ହସ୍ତକ୍ଷେପକୁ ରୋକାଯାଇ ପାରିବ ଏବଂ ତୀବ୍ଦତୀୟ ମାନେ ହିଁ ସେମାନେ ନିଜର ଧର୍ମଗୁରୁ ଚୟନ କରିପାରିବେ ।
ଗତ ଏକ ଦଶନ୍ଧି ଧରି ଚୀନ୍ ଦଲାଇ ଲାମା (୧୫ ତମ ଦଲାଇ ଲାମା)ଙ୍କ ପରବର୍ତ୍ତୀ ଅବତାର ନେଇ ଦାବି କରିଆସୁଛି । ଦଲାଇ ଲାମା ଏବଂ ନିର୍ବାଚିତ ତିବ୍ଦତ ସରକାର ଡ୍ରାଗନର ଏହି ଦାବିକୁ ପ୍ରତ୍ୟାଖ୍ୟାନ କରି ଆସୁଛନ୍ତି । ସେ କହିଛନ୍ତି ପରବର୍ତ୍ତୀ ଅବତାର କେବଳ ତିବ୍ଦତୀୟ ସମ୍ପ୍ରଦାୟର ନିୟମ ଅନୁଯାୟୀ ଚୟନ କରାଯିବ ।
