ଆମେରିକା ସଂସଦ ପରିସରରେ ହିଂସାକାଣ୍ଡ; ୧୫ ଦିନ ଯାଏଁ ପବ୍ଲିକ ଇମରଜେନ୍ସି ଜାରି
ଓ୍ୱାଶିଂଟନ୍: ଆମେରିକା ରାଷ୍ଟ୍ରପତି ନିର୍ବାଚନ ଫଳାଫଳକୁ ନେଇ ବିବାଦ ଥମିବାର ନା ନେଉନି। ଏଭଳି ସ୍ଥଳେ ଆମେରିକା କଂଗ୍ରେସର ଇଲୋକ୍ଟ୍ରାଲ କଲେଜ ବୈଠକ ପୂର୍ବରୁ ଟ୍ରମ୍ପ ସମର୍ଥକ ମାନେ ସଂସଦ ପରିସରରେ ହଙ୍ଗାମା କରିଛନ୍ତି। ଯେଉଁ ହିଂସାରେ ୪ ଜଣଙ୍କର ପ୍ରାଣହାନୀ ଘଟିଛି
ଏହି ବୖଠକ ପୂର୍ବରୁ କ୍ୟାପିଟାଲ୍ ହିଲରେ ଟ୍ରମ୍ପ ସମର୍ଥକ ମାନେ ହତିଆର ଧରି ପ୍ରବେଶ କରିଥିଲେ । ଆଉ ପୋଲିସ ଓ ସମର୍ଥକଙ୍କ ମଧ୍ୟରେ ଖଣ୍ଡଯୁଦ୍ଧ ଆରମ୍ଭ ହୋଇଥିଲା । ଏଥିରେ ଅନେକ ଆହତ ହୋଇଥିବା ବେଳେ ୪ ଜଣଙ୍କର ମୃତ୍ୟୁ ହୋଇଛି । ସମର୍ଥନ କାରୀଙ୍କୁ କାବୁ କରିବାକୁ ଯାଇ ଟିୟର ଗ୍ୟାସ୍ ଓ ଲାଠି ଚାର୍ଜ ବି କରିଥିଲା ଆମେରିକା ପୋଲିସ ।
ସ୍ଥିତି ଅଣାୟତ ହେବାରୁ ଓ୍ୱାଶିଂଟନ ଡିସିରେ ୧୫ ଦିନ ଯାଏ ପବ୍ଲିକ୍ ଇମରଜେନ୍ସି ଜାରି କରାଯାଇଛି । ଟ୍ରମ୍ପଙ୍କ ସମର୍ଥକ କ୍ୟାପିଟାଲ ବିଲ୍ଡିଂର ସୁରକ୍ଷା ଭଙ୍ଗ କରିଥିବା ନେଇ ନବ ନିର୍ବାଚିତ ଉପରାଷ୍ଟ୍ରପତି କମଲା ହାରିସ, ପୂର୍ବତନ ରାଷ୍ଟ୍ରପତି ବାରାକ୍ ଓବାମା ପ୍ରମୁଖ ଟୁଇଟ୍ କରି ଉଲ୍ଲେଖ କରିଛନ୍ତି । ସେପଟେ ଏହି ହଙ୍ଗାମା ପରେ ଇନଷ୍ଟାଗ୍ରାମ, ଟୁଇଟର ଓ ଫେସ୍ବୁକ୍ ପକ୍ଷରୁ ଆମେରିକାର ଡୋନାଲ୍ଡ ଟ୍ରମ୍ପଙ୍କ ଆକାଉଣ୍ଟକୁ ୧୨ ଘଣ୍ଟା ପର୍ଯ୍ୟନ୍ତ ବ୍ଲକ୍ କରାଯାଇଛି ।
ଆମେରିକାର କ୍ୟାପିଟାଲରେ ହିଂସାତ୍ମକ ବିରୋଧ ପରେ ଫାଷ୍ଟ ଲେଡି ମେଲାନିଆ ଟ୍ରମ୍ପଙ୍କ ଷ୍ଟାଫ ମୁଖ୍ୟ ଷ୍ଟେଫାନି ଗ୍ରିଶାମ, ହ୍ୱାଇଟ୍ ହାଉସ୍ ପ୍ରେସ୍ ସେକ୍ରେଟେରୀ ସାରା ମାଥ୍ୟୁ ଓ ଜାତୀୟ ସୁରକ୍ଷା ପରାମର୍ଶଦାତା ରବର୍ଟ ଇସ୍ତଫା ଦେଇଛନ୍ତି ।
ଏହି ଘଟଣାକୁ ରାଜଦ୍ରୋହ କହିବା ସହ ସମ୍ବିଧାନର ରକ୍ଷା କରିବାକୁ ଟ୍ରମ୍ପଙ୍କୁ ଆହ୍ୱାନ ଦେଇଛନ୍ତି ନବ ନିର୍ବାଚିତ ରାଷ୍ଟ୍ରପତି ଜୋ ବିଡେନ୍ । ଠିକ୍ ସେହିପରି ଓ୍ୱାଶିଂଟନରେ ଟ୍ରମ୍ପ ସମର୍ଥକଙ୍କ ହିଂସାକୁ ନେଇ ଚିନ୍ତାବ୍ୟକ୍ତ କଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଲୋକତନ୍ତ୍ରରେ କ୍ଷମତା ହସ୍ତାନ୍ତର ଶାନ୍ତିପୂର୍ଣ୍ଣ ଭାବେ ହେବା ଆବଶ୍ୟକ ବୋଲି ମୋଦି ମତ ଦେଇଛନ୍ତି ।
