ଆମେରିକା ଇତିହାସର କଳାଦିନ, ଫଟୋରେ ଦେଖନ୍ତୁ ଟ୍ରମ୍ପ ସମର୍ଥକଙ୍କ କାଣ୍ଡ
ୱାଶିଂଟନ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସମର୍ଥକ ଓ୍ୱାଶିଂଟନ ଡିସି ସ୍ଥିତ କ୍ୟାପିଟାଲ ହିଲ ମଧ୍ୟକୁ ଅନୁପ୍ରବେଶ କରିଥିଲେ । ସେମାନେ ସେଠାରେ ଭଙ୍ଗାରୁଜା କରିଥିଲେ । ହିଂସା ବେକାବୁ ହେବାରୁ ସେନାକୁ ମୁତୟନ କରାଯାଇଥିଲା । ସୁରକ୍ଷାକର୍ମୀଙ୍କ ଗୁଳିରେ ୪ ଜଣ ଅରାଜକତାବାଦୀ ପ୍ରାଣ ହରାଇଥିଲେ ।
ଟ୍ରମ୍ପ ସମର୍ଥକ କ୍ୟାପିଟାଲ ହିଲକୁ ନିଜ କବଜାକୁ ନେବା ପରେ ସିନେଟରଙ୍କୁ ବାହାର କରି ଦେଇଥିଲେ । ଟ୍ରମ୍ପ ସମର୍ଥକ ପୁଣିଥରେ ଭୋଟ ଗଣତି ଦାବି କରୁଛନ୍ତି । ଓ୍ୱାଶିଂଟନରେ ଟ୍ରମ୍ପ ସମର୍ଥକଙ୍କ ମାର୍ଚ୍ଚ ପରଠାରୁ ସୁରକ୍ଷାକୁ ବଢା ଯାଇଥିଲା ତଥାପି ହିଂସା ହୋଇଥିଲା ।
ଟ୍ରମ୍ପ ସମର୍ଥକ କ୍ୟାପିଟାଲ ହିଲରୁ ନହଟିବା ପରେ ପୋଲିସ ଲାଠିଚାର୍ଜ୍ କରିଥିଲା । ପୋଲିସ ସେମାନଙ୍କଠାରୁ ବନ୍ଧୁକ ମଧ୍ୟ ଜବତ କରିଛି । ବିଶ୍ୱର ଅନେକ ଦେଶ ଏହି ହିଂସାକୁ ନିନ୍ଦା କରିଛନ୍ତି । ଆମେରିକା ଗୃହଯୁଦ୍ଧ ଆଡକୁ ଯିବାର ଆଶଙ୍କାକୁ ନେଇ ବିଶ୍ୱ ଚିନ୍ତିତ ।
ଓ୍ୱାଶିଂଟନ ପୋଲିସ ଅନୁସାରେ ଗୁରୁବାର ହିଂସାରେ ୪ ଜଣଙ୍କ ମୃତ୍ୟୁ ହୋଇଛି । ବିକ୍ଷୋଭକାରୀଙ୍କୁ ସୁରକ୍ଷାବଳ ଅଟକାଇବାରେ ବିଫଳ ହେବାକୁ ସେନାର ଗୋଟିଏ ୟୁନିଟକୁ ଘଟଣାସ୍ଥଳକୁ ଡକା ଯାଇଥିଲା । ୨୦ ମିନିଟରେ ସେନା ୟୁନିଟ୍ କ୍ୟାପିଟାଲ ହିଲରେ ପଂହଚି ସ୍ଥିତିକୁ କାବୁ କରିଥିଲା ।
ଟ୍ରମ୍ପ ନିଜ ସମର୍ଥକଙ୍କୁ ଫେରିଯିବାକୁ ଟ୍ୱିଟ୍ କରି ନିବେଦନ କରିଥିଲେ । ତେବେ ଏଥିରେ ସେ ନିର୍ବାଚନରେ ଜାଲିଆତି ହୋଇଥିବା କଥା ମଧ୍ୟ ଦୋହରାଇଥିଲେ । ନିଜ ସୋସିଆଲ ମିଡିଆ ହ୍ୟାଣ୍ଡେଲରୁ କାଳେ ଟ୍ରମ୍ପ ସମର୍ଥକଙ୍କୁ ଅଧିକ ଉତେଜିତ କରିବେ ସେଥିପାଇଁ ଟ୍ୱିଟର,ଫେସବୁକ ତାଙ୍କ ଆକାଉଣ୍ଟ୍ ବ୍ଲକ୍ କରି ଦେଇଛି । ୟୁଟ୍ୟୁବ୍ ତାଙ୍କ ଭିଡିଓକୁ ହଟାଇ ଦେଇଛି ।
ଆଜି ବୖଠକ ପୂର୍ବରୁ କ୍ୟାପିଟାଲ୍ ହିଲରେ ଟ୍ରମ୍ପ ସମର୍ଥକ ମାନେ ହତିଆର ଧରି ପ୍ରବେଶ କରିଥିଲେ । ଆଉ ପୋଲିସ ଓ ସମର୍ଥକଙ୍କ ମଧ୍ୟରେ ଖଣ୍ଡଯୁଦ୍ଧ ଆରମ୍ଭ ହୋଇଥିଲା । ଆଉ ସମର୍ଥନ କାରୀଙ୍କୁ କାବୁ କରିବାକୁ ଯାଇ ଟିୟର ଗ୍ୟାସ୍ ଓ ଲାଠି ଚାର୍ଜ ବି କରିଥିଲା ଆମେରିକା ପୋଲିସ ।
ସ୍ଥିତି ଅଣାୟତ ହେବାରୁ ଓ୍ୱାଶିଂଟନ ଡିସିରେ ୧୫ ଦିନ ଯାଏ ଇମରଜେନ୍ସି ଜାରି କରାଯାଇଛି । ଟ୍ରମ୍ପଙ୍କ ସମର୍ଥକ କ୍ୟାପିଟାଲ ବିଲ୍ଡିଂର ସୁରକ୍ଷା ଭଙ୍ଗ କରିଥିବା ନେଇ ନବ ନିର୍ବାଚିତ ଉପରାଷ୍ଟ୍ରପତି କମଲା ହାରିସ, ପୂର୍ବତନ ରାଷ୍ଟ୍ରପତି ବାରାକ୍ ଓବାମା ପ୍ରମୁଖ ଟୁଇଟ୍ କରି ଉଲ୍ଲେଖ କରିଛନ୍ତି । ସେପଟେ ଏହି ହଙ୍ଗାମା ପରେ ଇନଷ୍ଟାଗ୍ରାମ, ଟୁଇଟର ଓ ଫେସ୍ବୁକ୍ ପକ୍ଷରୁ ଆମେରିକାର ଡୋନାଲ୍ଡ ଟ୍ରମ୍ପଙ୍କ ଆକାଉଣ୍ଟକୁ ୧୨ ଘଣ୍ଟା ପର୍ଯ୍ୟନ୍ତ ବ୍ଲକ୍ କରାଯାଇଛି ।
